Mose I, 8
8
Nyu kpekpemi ɔ se po
1Mawu kai Noa kɛ lohwe ɔmɛ tsuo nɛ e kɛ mɛ ngɛ lɛ ɔ mi ɔ; Mawu ha nɛ kɔɔhiɔ ko ba fia, nɛ nyu ɔ bɔni miimi. 2A tsi nyu hɛngmɛ ɔmɛ nɛ ngɛ zugba a a nya, nɛ a nga hiɔwe saflɛ ɔmɛ. Kɛkɛ nɛ hiɔmi ɔ se po, 3nɛ nyu ɔ bɔni miimi bɔɔbɔɔbɔɔ ngɛ zugba a nɔ. Ligbi lafa kɛ nyingmi enuɔ se ɔ, nyu ɔ nɔ gbɔ. 4Hlami kpaagone ɔ ligbi nɛ ji nyɔngma kɛ kpaago ɔ nɔ ɔ, lɛ ɔ ba sa si ngɛ Ararat yo ɔ he. 5Nyu ɔ mii hluu kɛ ya si hlami nɛ ji nyɔngma a. Hlami nɛ ji nyɔngma a kekleekle ligbi ɔ nɔ ɔ, yo ɔmɛ a yi mi je kpo.
6Ligbi nyingmi eywiɛ se ɔ, Noa bli saflɛ ɔ nɛ e je ngɔ wo lɛ ɔ nɛ e kpɛ ɔ he ɔ, 7nɛ e ngmɛɛ kuakualabite ko he. Se kuakualabite ɔ kpale we kɛ bɛ; e te kɛ bɔle si hluu kɛ ya si be nɛ nyu ɔ mii ta zugba a nɔ. 8Nɛ́ Noa na kaa kuakualabite ɔ bɛ ɔ, e ngmɛɛ okpo ko hu he nɛ e kɛ hyɛ kaa nyu ɔ mii ta lo. 9Se okpo ɔ nɛ he ko nɛ e ma, ejakaa nyu ha zugba a tsuo nɔ kɛ mwɔɔ; lɔ ɔ he ɔ, e kpale kɛ ba lɛ ɔ he. Noa sɔle e nine nɛ e nu okpo ɔ kɛ wo lɛ ɔ mi. 10E mlɛ otsi, nɛ e ngmɛɛ okpo ɔ he ekohu. 11Gbɔkuɛ nya si ɔ, okpo ɔ kpale kɛ ba Noa ngɔ kɛ e nya he oliv tso ba mumu; nɛ enɛ ɔ Noa kɛ le kaa nyu ɔ mii ta zugba a nɔ. 12E mlɛ otsi ekohu, nɛ e ngmɛɛ okpo ɔ he. Se jehanɛ ɔ lɛɛ okpo ɔ kpale we kɛ bɛ hu.
13Benɛ Noa ye jeha 601 ɔ, jamɛ a jeha a we kekleekle hlami ɔ we kekleekle ligbi ɔ nɔ ɔ, nyu ɔ mii ta zugba a nɔ. Noa jé lɛ ɔ yi bumi nɔ́ ɔ, nɛ e na kaa zugba a gbli. 14Hlami enyɔne ɔ, ligbi nyingmi enyɔ kɛ kpaago ɔ nɔ ɔ, zugba a nɔ gbli ta.
15Mawu de Noa ke, 16“O kɛ o yo ɔ, kɛ o binyumu ɔmɛ kɛ a yi ɔmɛ nɛ je kpo ngɛ lɛ ɔ mi. 17Je lohwe ɔmɛ kpo kɛ ba: pɛlitsɛmɛ, nane eywiɛɛywiɛtsɛmɛ, kɛ ní nɛmɛ nɛ sãã si, konɛ a fɔ nɛ a ha zugba a tsuo nɔ.” 18Kɛkɛ nɛ Noa kɛ e yo ɔ, kɛ e binyumu ɔmɛ kɛ a yi ɔmɛ je kpo ngɛ lɛ ɔ mi. 19Lohwe ɔmɛ tsuo kulaa je kpo ngɛ lɛ ɔ mi, kɛ a henɔ kɛ a henɔ: pɛlitsɛmɛ, nane eywiɛɛywiɛtsɛmɛ, kɛ ní nɛmɛ nɛ sãã si.
Noa sã bɔ
20Noa ma bɔ sami la tɛ ha Yawɛ, nɛ e ngɔ we mi lohwehi nɛ a he tsɔ ɔ eko tsuaa eko kɛ sã sami bɔ ngɛ nɔ: pɛlitsɛmɛ kɛ nane eywiɛɛywiɛtsɛmɛ. 21Yawɛ nu bɔ ɔ he via, nɛ e ná he bua jɔmi. Kɛkɛ nɛ e de e he ke, “I be níhi nɛ wami ngɛ a mi ɔ tsuo a hɛ mi kpatae kikɛ nɛ ɔ hu kɔkɔɔkɔ. 22Ligbi abɔ nɛ je ɔ ngɛ nɛ ɔ, ní dumi kɛ ní kpami be, fĩɛ be kɛ latsa be, gbo kɛ gbiɛ, nyɔ kɛ pia se be poe gblegbleegble.”
ที่ได้เลือกล่าสุด:
Mose I, 8: Dangme
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Bible in Dangme © Bible Society of Ghana, 2018.