Luke 23

Pilate Anga Jesu Apuiju

(Matt 27:1-2,11-14; Mrk 15:1-5; Jhn 18:28-38)

1Chuin mipi kikhom chengse chu akipat doh-un, ama chu Pilate henga akaitaovin ahi. 2Chuin ahehse panun, Hichepa hin, Keima Christa leng kahi atia, Caesar kai peh ding akhama, kanampiu apuiset kamu uve, atiuve.

3Chuin Pilate'in adongin, Nangma Judah te Lengpa nahim? ati. Chuin aman adonbutnin, Naseikhai, ati.

4Chuin Pilate'in thempu pipuiho le mipi jah-a, Hichepa chunga khansetna imacha kamupoi, ati.

5Chuin amaho ahapan cheh-un, Hichepa hin Galilee gama kipanin hiche kom geijin Juda gam khotinah ahille ahillen, mi jouse achohnoh jin ahi, atitaovin ahi.

Herod Henga Jesu Kisol

6Chuin Pilate'in Galilee thu ajah phah chun, Ama hi Galilee mi ham? tin adonge. 7Chuin ama chu Herod thuneina gam mi ahi ahet phatnin, Herod hengah asoltan ahi; ijeh-inem itile hiche laija chu ama Jerusalem'a uma ahi. 8Chuin Jesu amu phat chun Herod akipah lheh jengin ahi. Ijeh-inem itile aman athu ajah jeh-a sotna pat ama chu mu atup ahitan; chule thil kidang abol khattou mu ding kinem lheh ahi. 9Chuin Herod chun thu tamtah adongin, ahivangin aman imachan adonbutpoi. 10Chuin thempu pipuiho le danthu sunho adingun, ama chu ahehheh jengun ahi. 11Chuin Herod le asepaiten nahsahmon abolun, totnopnan aneijun, pon loupi asilpeh-un, chuin Pilate heng lama ahin solkit taove. 12Hiche nitah chun Herod le Pilate akihou thei lhontan ahi; ijeh-inem itile chuche masanga chu kidou jing ahi lhone.

Jesu Tha Dinga Athu Atanlhah-u

(Matt 27:15-26; Mrk 15:6-15; Jhn 18:39—19:16)

13Chuin Pilate'in thempu pipuiho le vaipoho chule miho chu akou khomin, 14Ajah uva, Miho apuisei tia hichepa hi kahenga nahinkaiju ahin; veuvin, keiman amo amolou phatechan na-ang sunguvah kapatepmin, nanghon nahehnao thudola chun achungah themona kamupon; 15Chule Herod jengin jong amupoi: ijeh-inem itile aman ihenguva ahinsol kit tai; chule veuvin, aman athina theilom imacha abolpoi. 16Hijeh chun keiman bolgim ingting, lhadohtange, ati.

17(Hiche kut sunga chu amaho chu mi khat alhadohpeh tei ngai ahi).

18Ahivangin amahon thakhat tah-in asamun, Hichepa hi sumangin, Barabbas neilhadoh peh-un, atiuve. 19Ama chu khopi sung chonoh jehle atoltha jeh-a songkul'a kikhuma ahi.

20Chuin Jesu chu alhadoh nom jeh-in, Pilate'in ajah uva thu asei kitnin; 21Ahivangin amahon, Ama chu thingpel'a khenbeh-in, thingpel'a khenbeh-in, tin asamtauve.

22Chuin aman athumvei na-in, Ibolin-em? Hichepan ipi suhset aneijem? Keiman thina theilom ama chunga ima kamupoi; hijeh chun bolgim ingting lhadoh tange, ati.

23Ahivangin amahon aw sangtah-in ahasapcheh-un, thingpel'a akhetbeh teina dingin athumun ahi. Chuin amahole thempu pipui aw chun anehjou jotai. 24Chuin athum banguva bol dingin Pilate'in thu alhuh sahtan ahi. 25Chuin aman khosung chonoh le tolthat songkul'a kikhum athumpau chu alhadohpeh-in; Jesu vang chu amaho lunggot banga dingin apedohtan ahi.

Jesu Thingpel'a Kikhetbeh

(Matt 27:32-44; Mrk 15:21-32; Jhn 19:17-27)

26Chuin akaimang phatnun, gama kona hung Cyrene gam mi Simon chu amanun, Jesu nung lama pu dingin achungah thingpel chu angamun ahi.

27Chule mihonpi atamatam le a-op chum chuma kap numei mipi nasatah-in anung ajuijun ahi. 28Ahin Jesu akiheijin ajah uva, Jerusalem chanute, keima neika hih-un, nangho le nachateo dingjoh-in kapmun. 29Ijeh-inem itile, veuvin, Achingho le chavop khalou naobu, chule naonoi chepsah khalouho anun nomui ati nadingu hitobang nikho chu hung lhung ding ahi. 30#Hos 10:8; Tph 6:16. Chutengle amahon molsang jah-a, Neilhuh khumun, atiuva lhang jah-a, Neikhu khumun neiselun, ati dingu ahi. 31Ijeh-inem itile amahon thing hing bon hitia abolule, thing go i-aloda dinguham? ati.

32Hichea chun amatoh thatha ding akhang gilou adang mi ni jong apuijun ahi. 33Chuin Calvary #23:33: Calvary: Latin paova Calvary, Aramaic paova Golgotha, hichu lugu mun tina ahi. atiu mun chu alhun phatnun, ama chu thingpelah akhenbeh-un, chule akhang giloute ni jong chu khat ajet lamah, khat avei lamah akhenbeh-un ahi. 34#Labu 22:18. Chuin Jesu'n, Pa, amaho hi ngaidamin; ijeh-inem itile amahon abolu hi ahepouve, ati. Chuin avangphapha changhen tin vang akiveuvin aponsil chu akihom taove. 35#Labu 22:7. Chule miho chu adingun ave jingun ahi. Chuin alah uva um vaipohon chun anelpeh-un, Midang bon huhhing-a chu; Pathen lhen Christa chu ahile, ama kihuh hinghen, atiuve.

36 # Labu 69:21. Chuin sepaiho jong chun totnop nan aneijun, akoma ahungun, lengpiga twi thuh apeuvin; 37Juda te lengpa nahile kihuh hingin, atiuvin ahi.

38Chule ama hi JUDA TE LENGPA AHI, tia Greek, Latin, chule Hebrew paova kisun hetsahna achung vumah aumin ahi.

39Chuin akikhaija khang gilou teni khat chun ajonhouvin, Nangma Christa chu nahile nangma kihuh hingin lang keini jong neihuhhing lhontang, ati.

40Ahivangin khatpa chun ama chu adonbutnin aphoh-in, Talent thakhat namat khom jenga jong, nangman Pathen jeng jong nagin louham? 41Eini hi talent man ding dol mong ihi; ajehchu ithilbol manbou ikisan ahi: hichepa vanghi ima suhset neilou ahi, ati. 42Chuin aman Jesu henga, Pakai nalenggam ma nalhun teng neihe jingin, ati.

43Chuin Jesu'n amapa jah-a, Tahbeh-a kaseipeh nahi, Tunia gam loupi-a #23:43: Gamloupi: Paradise, vangam seina-a kimang. keimatoh i-um khom ding ahi, ati.

Jesu Thi

(Matt 27:45-46; Mrk 15:33-41; Jhn 19:28-30)

44Hichu nidan gup don ahin, chua pat chun nidan ko geijin gam jouse chunga thim ahung jingin; 45#Pot 26:31-33. Nisa athimtan, chule houin'a pondal len chu alailunga akeh lhan ahi. 46#Labu 31:5. Chuin Jesu'n aw gingtah-in asamin, Pa, nakhutna kalhagao kapedoh-e, atin atantai.

47Chuin sepai jalamkai chun thil soh umchan chu amun phatnin, Pathen avahchoijin, Hichepa hi michonpha tahbeh mong ahi, ati.

48Chuin vetchah chu ve dinga hung khom mipi ho chun thilsoh umchan chengse chu amuvin, a-op beng bengin akinungle taovin ahi. 49#Luk 8:2-3. Chule akihetpiho le Galilee gama kona ahin kilhonpi numei ho jong chu galkanga adingun, chuti thilsoh hochu amu jingun ahi.

Jesu Avuiju

(Matt 27:57-61; Mrk 15:42-47; Jhn 19:38-42)

50Chuin, veuvin, houvai poloi lah-a chun amin Joseph atiu mikhat aumin; amachu miphatah le chonphatah ahi. 51Aman amaho kihousomna le thilbol chu ajop pon ahi. Amahi Judah ho khopi Arimathea kho-a kon ahin, chule Pathen gam ngah jinga um ahi. 52Hiche mipa hi Pilate henga ahungin, Jesu long chu athumtai. 53Chuin along chu alalhan, tupat pon nemin atomin, amasanga koimacha koikhahna lou song kilai lhan sunga chun alupsahtan ahi. 54Hiche ni chu kigot ni ahin, chule cholngah nikho jong anaitan ahi.

55Chuin Galilee'a kona ahinlhonpi numei ho chun anung ajuijun, lhanle along chu iti akoiju agaveuvin ahi. 56#Pot 20:10; Danb 5:14. Chuin amaho kinungle uvin, lounam le thao namtui akigot uvin; chule danthupeh dungjuijin cholngah nin akicholngah-un, ahi.

ที่ได้เลือกล่าสุด:

Luke 23: THADBSI

เน้นข้อความ

แบ่งปัน

คัดลอก