Chivkeeb 8
8
Dlej Nqeg
1Vaajtswv yeej ncu ntsoov Nau-es hab txhua yaam tsaj kws nrug nwg nyob huv lub nkoj, nwg txhaj ua kuas cua ntsawj, hab dlej pib nqeg zuj zug moog. 2Tej qhovdlej txhawv huv nplajteb txawm txhaws hab rooj ntug txawm kaw. Naag ca le tu, 3hab dlej pib nqeg zuj zug tau ib puas tsib caug nub. 4Ces nub kaum xyaa lub xyaa hli ntuj lub nkoj txhaj lug khuab rua sau lub hauv roob Alalaj. 5Dlej pheej nqeg zuj zug lawm, hab nub xab ib lub kaum hli ntuj txhaj pum tej hauv roob tshwm tuaj.
6Tom qaab plaub caug nub, Nau-es txhaj qheb qhovrais nkoj 7tso ib tug uab laag yaa tawm moog, tug uab laag ntawd yaa yuj moog yuj lug txug thaus dlej nqhuab taag. 8Tom qaab ntawd, Nau-es rov tso dlua ib tug nquab yaa tawm moog saib dlej nqeg taag lawm los tsi tau, 9tug nquab nrhav tsi tau chaw tsaws le, rua qhovdlej tseem nyaab puv nkaus huv nplajteb nuav. Tug nquab txhaj yaa rov lug tsaws ntawm lub nkoj, hab Nau-es cev teg moog muab tug nquab lug rua huv lub nkoj. 10Nwg tog tau xyaa nub ntxiv hab rov tso dlua ib tug nquab yaa tawm moog saib. 11Thaus yuav tsaus ntuj tug nquab txhaj kwv tau ib rev nplooj txiv ntoo roj ntawm nwg tug kaug ncauj yaa rov qaab lug cuag Nau-es. Thaus Nau-es pum le ntawd, nwg txhaj paub has tas dlej nqeg ti aav lawm. 12Ces nwg rov tog tau xyaa nub hab tso dlua ib tug nquab yaa moog saib dlua ib zag ntxiv, tabsis zag nuav tug nquab tsi yaa rov lug lawm.
13Nau-es noobnyoog muaj rau pua ib xyoos, rua lub ib hlis ntuj nub xab ib, nub ntawd dlej nqhuab taagnrho huv tuabsi lawm. Nau-es yaws tej vuag kws vuv lub nkoj, tsaa qhovmuag saib ibncig ntawd, hab pum aav tub pib qhuav lawm. 14Ces nub neeg nkaum xyaa lub ob hlis ntuj lub nplajteb nuav qhuav taagnrho.
15Vaajtswv has rua Nau-es has tas, 16“Koj hab koj quaspuj, koj cov tub, hab koj cov nyaab ca le tawm huv lub nkoj nuav moog. 17Mej coj taagnrho tej tsaj tsi has tsaj nyeg, tsaj qus, naab, qaav, hab noog huv tuabsi nrug koj moog, kuas tej tsaj ntawd fuamvaam moog puv nplajteb.” 18Yog le ntawd, Nau-es txhaj coj nwg quaspuj, nwg cov tub, hab cov nyaab tawm huv lub nkoj moog. 19Taagnrho tej tsaj luj tsaj miv kws nyob sau npoo aav, tej noog kws yaa sau nruab ntug, nyag ua nyag ib paab tawm huv lub nkoj lug ua tsheej paab tsheej pawg lawv le nyag yaam tsaj rua saab nrau.
Nau-es Fij Khoom rua Vaajtswv
20Nau-es teeb tau ib lub thaaj rua tug TSWV, nwg muab tej tsaj huv hab tej noog ib yaam ib tug coj lug tua hab muab hlawv taagnrho fij rua Vaajtswv sau lub thaaj ntawd. 21Tej paa khoom fij ntawd tsw qaab ntxag ua rua tug TSWV txaus sab heev, hab tug TSWV xaav has tas, “Kuv yuav tsi foom phem rua lub nplajteb ib zag ntxiv, vim tej kws tuabneeg ua ntawd le lawm, kuv paub tuabneeg yeej ibtxwm xaav phem thaus yau lug. Kuv yuav tsi ua rua txhua yaam kws muaj sa kuas raug puamtsuaj le kws kuv tau ua taag lug nuav lawm. 22Yog lub nplajteb nuav tseem muaj nyob, yuav muaj caij cog qoobloo hab muaj caij sau qoobloo, muaj caij ntuj kub ntuj no, muaj caij ntuj qhua hab caij ntuj naag, muaj nruab nub hab mo ntuj moog ibtxhis tsi kawg.”
ที่ได้เลือกล่าสุด:
Chivkeeb 8: HNJ2000
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© 2000 United Bible Societies. All rights reserved.