Lukéstar 10
10
1Uló so uló, naznačínel o Góspodos pánda eftávardeš, thai doné amalén, bičhalél anglál pes sjakoné dizjáte, sjakoné thanéste, káte mangél ov‐da te džal.
2Phenél lénge: I žétva barí isí, amí o žetvárja xaŗí. Molínen‐pes tumé, ta te bičhalél e žetvákoro Góspodos, ta t’aavén pe žetváte.
3Džan‐ta, bičhaláv tumén sar bakrén ándo ruvá.
4Má‐anén kisí, džéba mí‐anén, tjiraxá má‐anén, thai te na poklonínen níkaske andé droméste.
5Andé jekhé kheréste kána den andré, phenén‐ta: Adalké kheréste selámi t’oovél.
6Amí te isí e selamjákoro čhavó othé, to selámi kaačhól uprál les, amí te nanái othé, ka irínel paš tuménde.
7Áčhon‐ta othé kheré, thai so si lénge xan‐ta, pién‐ta, sóske o butjákoro, léske‐da t’oovél e kirjákere páres. Ma‐džan kher kheréste.
8Jekhé dizjáte kána den andré, thai tumén posreštínen, so den tuménge, te xan‐da;
9E nasfalén‐da kai andré isí te sastjarén, lénge‐da te phenén: Tuménge aló o thagaribé e Devléskoro.
10Amá jekhé dizjáte kána den andré thai o komšídes nána posreštínen tumén, džan‐ta andár o úlitzes thai te vikínen:
11Tumaré Dizjákeri pošík‐da kai lepínel, amaré urjaibnástar kosás; amí te džanén, avél o thagaripé e Devléskoro.
12Tuménge phenáv‐dani: Odolké dieséste e dizjáke Sodómos o háli lákoro, adalké dizjákere haléstar pó‐lačo k’oovél.
13Čingár thai bibáxt túke, Korazáin, túke‐da bibáxt Bethsáida, sóske ándo Tíros, t’ándo Sidónos áko edekí barí butí ulí, pišmáni ulé sas‐bi, ándo than urjavdé t’ándo práhos.
14Amí tuméndar pó‐lačes k’oovél e Sidonóske, thai e Tiróske kana ovén sudimé.
15Tu‐da, ái Kafernáum, kai sinján edekí baró, dži ándo nébos to baribé, dži ándo thagaribé e bengéskoro kaperés.
16Ko tumén šunél, man‐da šúnel thai kándel. Ko tumén aprasál, man‐da aprasál, ko man aprasál, odolkés‐da kai man bičhaldjás, aprasál.
17Irínen‐pes o eftávardeš thai dúi manúš, lošánen, phenén: Góspodi! O bengá‐da ándo aláv toŗó amén kánden.
18Phenél lénge: Sar o jîldîrîmi dikhljóm e bengés, e nebéstar perindós.
19Áke dinjóm tumén zor, ta te phirén uprál e sapén, thai uprál e skorpionén, thai uprál e düšmanjéskeri síla; naští kerél tumén ziáni čípota.
20Má‐lošánen, kai tuménde kánden o bengá, amí te lošánen kai ándo nébos isí pišimé tumaré alavá.
21Odiká óra lošánilo (lošasájlo) ándo Sfjáto Dúxos, phendjás: Ábe Bába, blagodarínav‐man túke, Góspodi (Rája) e nebóskoro thai e dünjáskoro, sóske e godiaveréndar adalká garadján, e tsiknénge sikadján. Va, Bába‐be, sostár adžuká manglján.
22Sa adalká e Dadéstar mánge ulé, thai ko si o čhavó níko na džanél, sámo o Dad džanél, ko si o Dad sámo o Čhavó džanél, thai odovká‐da, káske kasikavél les o Čhavó.
23Irínel‐pes pe amalénge, phenél: Blagoslovimé thai baxtalé o jakhá kai dikhén so dikhén tumé.
24Sostár tuménge phenáv: But proróki thai but thagará mangénas te dikhén so tumé dikhén, amá nána dikhénas, thai mangénas te šunén so tumé šunén, amí nána šunénas.
25Áke uxtjél jek zakónnikos, iskušínel les, phenél: Ábe Učítel, so te keráv, ta t’oovél mánge o džiipé o biagoréskoro?
26Phenél léske odovká: Ándo zakónos so pišínen, sar četínes?
27Džewábi del adavká: Te dukhás te Devléske, (e Raiéske) sa vogjésa, sa dušása, sa silása, sa godjása, thai te dukhás te komšúske sar túkedani.
28Phenél: Lačés vakerdján: Čoká ker, ta t’ovés dživdó.
29Amí ov mangél te kerél pes čačó e vakeribnáste, e Isúske phenél: Mo komšís ko isí?
30Vakerél o Ísus:
Siné kai siné jek manúš, geló Jerusaliméstar Jerixóste, perén čorá palál léste, nangjarén les, čhinén les, ačhavén les epkáš muló, džan‐peske.
31Siné‐da jek rašái, džal adalké droméstar, dikhél les, e epkáš mulés, džal‐peske, nakjél.
32Čoká jek diákonos, kána paš pašé isí adalké thanéste, dikhél les, ov‐da nakjél.
33Amí siné jek Samaritános, e džabnáste kai isí, avél paš les, dikhél les, merhaméti isí les dži léste;
34Paš les avél, phándel o dabá, andé lénde mol thai zeitíni čhórdel, uprál pe grastés thovél les, ándi kŭrčma igálel les, dikhél les.
35Tasjá ikálel dúi kotór lové del ko kŭrčmáris, phenél: Dikh‐ta les. Savé lovén pó‐but kaplatínes asál léske, me, phenél o Samaritános, kána irínav man, kadáv tut napálpale.
36Odolké trinéndar savó, mislínes, uló léske, e epkaš čhindéske nái‐lačó?
37Phenél: Odovká, kai sas les merhaméti dži léste. Phenél o Ísus: Dža‐ta, ker‐ta čoká.
38Nakló so nakló, avén jekhé dizjáte. Thai jek džuvlí, i Márta, posreštínel les pe kheréste.
39Isí‐da la jek phen, i María, ói‐da sa bešél ándo piŗé e Isúskoro, pe vakeribnáste šunél.
40Amí i Márta butjarní si thai vrénno, térdjol paš les, phenél: Góspodi, nána dikhés‐li me phenjá, ói kai mukél man, kórkoŗi te butjaráv? Phen‐ta láke ta te pomožínel man.
41Phenél o Ísus: Martoŗíje Martíje, but des tut godí, thai butjarní sinján,
42Amí sámo jek trébe te kerés. I María ándi butí o pó‐lačó kotór liljás, nána kalínjovel látar.
ที่ได้เลือกล่าสุด:
Lukéstar 10: ARL1912
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
