Matthew 7
7
Mi küjo küphu mo küthüra küti
1Neko mi müjo hi; sülize miri ne müjo talho; 2Kükrenamoli, ne-e süh mi müjo küsüo miri süo süh ne müjo zoto tina. 3Sülize, no dipüh bi die ntho n mhülü sühthü kübao lü mozo die n sazüh-o mhülü sühco kübao pe yo la? 4Mori, no dipüh bi die ntho n mhülü sühthü kübao lü mozo die n sazüh-o yisü, apo n mhülü sühco-o ka vate, sidie poyo la? 5No küthüra küti-o, ntho n mhülü sühthü-o khiva mürate, sülize no nsazüh-o mhülü sühco-o ngo müle mülu die khi vato. 6Mhakümüsa khapüh tüshi prü hite; mori ti püma kürühpü kügü püh thüvo mhuzülü sü hite, süko u phe püh süko küdu mo rürüh pra ukü püh ne rhe ri zoto küti na.
Murimu die sho küti
7Shote, süze khapüh ne prüto, phute, süze ne ngoyito; cekha küdü züzo te, süze khrisü ne prüto. 8Süze thüma kühopühri shoyo kütimi ngoyi yo, mo phuyo kütimi ngoyi yo; cekha küdüyo kütimi ri mi khrisü sümi prüyo. 9Süze, ne dolü sopühno unu-e tsükhrüda sho lize kütsü püh prüyo la? 10Mori, pu khu sho lize tünyhi khi püh prüyo la? 11Ne küsümi thori mhaküve püh nenu nene küprü do seyo lize tüyo küba neko Po-e mhaküve dithüdüpüh püh mi Puce shoyo kütiko prü süta? 12Süna mi neyo mha dipüh thisü lize nenü sheli neri süsü bi die thipüh miyo süte, kükrenamoli, thüzhoo mo sadzühküseko zübo hihi zo tina.
Kharü kümürüho zühlüyi no küsü
13Neko kharü kümürüho züh lüyi te, kükrenamoli, mi züh kükalü küvo khrü-o müyo mo sho süo müthi, mo thüma kükro sho süo züh lü tayo. 14Süri, mizüh kürhüh lü küvo kharüo mürüh mo pu shori kürühbüh, mo süo ngo küyi thüma tsa.
Pu seyo no pubo se küyi
15Kücezü sadzühküseko yo neko münuyi te, süko tüko khüne süh die neko ce vori yo; eli puko lü lükhrono tüküti saceko zo. 16Neko puko se yono puko se yito; mi tsahubo yono khubüh se rayi yo me? Mori hushihu bo yono shedüse rayi yo me? 17Sühbo küve kühopühri use küve jiyiyo; eli sühbo küsü khü use küsü ji tayo. 18Sühbo küve püh-e use küsü ji ta ndi, mori sühbo küsü püh-e use küve ji ta yomo. 19Sühbo kühopühri use küve jiyi kümo khü ve va die püh melü kügü vayo. 20Küthozo, neko use yono puko seyi to.
Kütso küto thüla nha
21Thüma A yisü, Nyepoo, Nyepoo, ziyoti mütü ri tüyo küdebalü lütso tayi lho; eli, tüyo küba Apoo müdoko thiyo küti-o zoto. 22Sünhasü thüma kükro A yisü, Nyepoo, Nyepoo ha nza süh sadzühküse po mo me? Ha N za süh thürüküsü hu mome? Mo ha N zalü no mhatho kuku küzho kükro ri thi sü mome? süzi to. 23Eli, I puce po die, I neko se mo ho, neko mha küsü küthiko neko ta a thürütate zita to.
Ce-mezhüh püh kümülü müde küsü
24Süna thüma kühopüri azü hiko rünyiyi die thi mo züh küyimi püh udo küveo kütsü tsüroyo pu ce thi küyi züh kümüde süto. 25Sücesü türü shüh vori die züde süri, mo tükhra khrade vori ce süo hü, süri ce süo rütu prü mota, kükrenamoli, ce süo kütsü tsüro yono pu me shühyi kütana. 26Eli thüma kühopühri azü hiko rünyiyi yo süri thi mo zühyi yomo lize süo püh thüma udo di die thusünyolü pu ce thi küyi züh kümüde süto. 27Sücesü türü sü mo zü de süri, mo tükhra vori die ce süo hü, sücesü ce süo rütu müsü shühta. 28Süsa Jisu zü hiko pothü küsüsa, thümako Pu kümütha zü na puko malhü thita. 29Kükrenamoli, Pu lüsiküseko bi mo die Pu kuku ne shüh die puko mütha küta na.
ที่ได้เลือกล่าสุด:
Matthew 7: NAG5BSI
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Chakhesang Chokri Naga New Testament © Bible Society of India, 2015. Used by permission. All rights reserved worldwide.
