Tongo nda ti aye 1
1
TONGO NDA TI AYE TI DUNIA
1–11
Nzapa asara dunia
1Na tongo nda ni, Nzapa asara yayu na sese.
2Sese ni ayeke gi senge, ye oko ayeke daa pepe. Ndo avuko pitipiti na ndö ti angu so ali mingi; yingo ti Nzapa ayeke ya na ndö ti angu ni. 3 Nzapa atene: “Ayeke nzoni ndo avuru!” Si ndo ni avuru. 4Nzapa abaa so vurungo ndo ayeke nzoni. Lo kangbi popo ti vurungo ndo na vukongo ndo. 5Nzapa adi iri ti vurungo ndo “kota lâ”, lo di iri ti vukongo ndo “bi”. Lakui ahon, ndaperere asi. Kozo lango laa.
6 Nzapa atene: “Ayeke nzoni mbeni ye asigigi si akangbi popo ti angu!” 7Ye ni asi tongana ti so lo tene. Nzapa asara mbeni ye so akangbi popo ti angu ti nduzu na angu ti sese. 8Nzapa adi iri ti ye so akangbi popo ti angu “le ti nduzu”. Lakui ahon, ndaperere asi. Use lango laa.
9 Nzapa atene: “Ayeke nzoni angu so ayeke na gbe ti nduzu abongbi tere ti ala na ndo oko si holengo ndo asigigi.” Ye ni asi tongana ti so lo tene. 10Nzapa adi iri ti holengo ndo ni “sese” si lo di iri ti gba ti angu ni “akota ngu-ingo”. Nzapa abaa so ye ni ayeke nzoni. 11 Nzapa atene: “Ayeke nzoni sese asara titene apere na akeke asigigi, amara ni nde nde. Apere ni na ale ti lungo ni na tere ni, na akeke nde nde so ayeke le, na ale ti lungo ni na ndö ni. Ye ni asi tongana ti so lo tene. 12Sese asara si apere na akeke asigigi, amara ni nde nde. Apere ni ayeke na ale ni so ayeke sara titene afini ni asigigi. Akeke ni ayeke na alengo ti ala so ayeke sara titene ambeni fini keke ni asigigi. Nzapa abaa so ye ni ayeke nzoni. 13Lakui ahon, ndaperere asi. Ota lango laa.
14 Nzapa atene: “Ayeke nzoni aye so ayeke su asigigi na le ti nduzu ti kangbi popo ti kota lâ na bi. Fade aye ni ayeke sara titene azo ahinga alango ti amatanga, na ambeni lango nde nde, na angu so ayeke hon. 15Na nduzu kâ, fade ala yeke su na ndö ti sese!” Ye ni asi tongana ti so lo tene. 16Nzapa asara akota ye so ayeke su so use. Lo sara kota ni titene aduti tongana makonzi na kota lâ si lo sara kete ni titene aduti tongana makonzi na bi. Lo sara nga atongoro. 17Nzapa azia aye ni na le ti nduzu titene ala su na ndö ti sese, 18ala duti tongana amakonzi na kota lâ nga na bi si ala kangbi popo ti vurungo ndo na vukongo ndo. Nzapa abaa so ye ni ayeke nzoni. 19Lakui ahon, ndaperere asi. Osio lango laa.
20Nzapa atene: “Ayeke nzoni aye so ayeke na fini asi singo na ya ti angu si andeke ahuru na ndö ti sese, na le ti nduzu.” 21 Nzapa asara akota nyama ti ya ti kota ngu-ingo, na amara ti aye nde nde so kue ayeke na fini, ala so asi singo si ayeke tambula na ya ti angu, na amara ti andeke so kue ayeke huru. Nzapa abaa so ye ni ayeke nzoni. 22Nzapa asara tufa na ndö ti ala, atene: “Ala du amolenge, ala wu mingi, ala mu ya ti akota ngu-ingo kue; andeke awu, amu ndö ti sese kue!” 23Lakui ahon, ndaperere asi. Oku lango laa.
24 Nzapa atene: “Ayeke nzoni sese asara titene amara ti anyama nde nde kue abaa gigi: anyama ti kodro, anyama so ayeke hara harango, na anyama ti ngonda!” Ye ni asi tongana ti so lo tene. 25Nzapa asara amara ti anyama nde nde ti ngonda; lo sara amara ti anyama nde nde ti kodro, na amara ti anyama nde nde so ayeke hara harango. Nzapa abaa so ye ni ayeke nzoni. 26 Nzapa atene: “Ayeke nzoni e sara zo titene lo kpa e, titene lo duti tongana e! Lo sara komandema na ndö ti asusu ti ya ti kota ngu-ingo, na ndö ti andeke ti nduzu, na ndö ti anyama ti kodro, na ndö ti sese kue, na ndö ti anyama so ayeke hara harango na sese!”
27 Nzapa asara zo, zo ni akpa Nzapa,
lo sara zo ni akpa gi lo Nzapa.
Lo sara ala, koli na wali.
28 Nzapa asara tufa na ndö ti ala si lo tene na ala: “Ala du, ala wu mingi, ala mu ndö ti sese kue, ala sara titene aye ti sese kue aduti na gbe ti ala! Ala sara komandema na ndö ti asusu ti ya ti kota ngu-ingo, na ndö ti andeke ti nduzu, na ndö ti anyama so kue ayeke hara harango na sese!” 29Nzapa atene: “Mbi mu na ala apere so kue ayeke na ndö ti sese si ale ni ayeke daa, na akeke so kue alengo ni ayeke daa si le ni ti lungo ni ayeke daa. Mbi mu ni na ala titene aga kobe ti ala. 30Ti anyama so kue ayeke na ndö ti sese, na andeke so kue ayeke huru na nduzu, na aye so kue ayeke tambula na sese si ayeke na fini, mbi mu apere na akeke titene aga kobe ti ala.” Ye ni asi gi tongana ti so lo tene. 31Nzapa abaa aye so kue lo sara: aye ni ayeke nzoni mingi. Lakui ahon, ndaperere asi. Omene lango laa.
ที่ได้เลือกล่าสุด:
Tongo nda ti aye 1: MNF2010
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© La Société Biblique de Centrafrique 2010