Jon 2

Elkak elbal ni jolo go Kana

(1 Kor 15:51-52; Hib 1:12)

1Eji ma kang nfung ebal, elkak elbal jolo go Kena ji Galili. Nnyehn Jisos jolo ona. 2Jisos, bo tꞌtob tiing-e elkak elbal nio, a abatꞌtoono ebe. 3Eji amahm male no, owo nnyehn Jisos kehm bake ba tong-e re, “Amahm ebmal.”

4Jisos kehm-e faange re, “Nnenkal, nꞌnan a kp-m tohngo anv kak go ntong nyia?#2:4 Mat 12:48-50. Ngare nyꞌnyame ka rehng.”

5Owo nnyehn Jisos kehm tongo alokeltum ba jolo o re, “Limen ajehng ajehng ji á bahk-n tongo!”

6Etu ebrakebra jolo ona, nya bo bumu re bo jo ba ru elbo ana atahm ebo bungu no.#2:6 Mak 7:1-4. Jolo agburu atulahb nya nnen a nnen, nya etu ajehng ajehng jo yele rehng egalon eltahl, tohko jol ano eltahl egalon ewubu. 7Jisos kehm bungu tong bo re, “Song tuken alahb, wahn ba ruru go atulahb nyao!”

Bo kehm tuku alahb, ba ruru atulahb nyao kpee.

8Á kehm tongo bo re, “Limen alahb maa, wahn song ka nfakamahm!” Bo kehm limi, tahm a ma.

9Nfakamahm no elkak nio kehm wuungu alahb mao ma ma siingi amahm.#2:9 2 Kor 5:17. Á kahnem edi ji lohngo lohng ba. Alokeltum bao ba limi lim alahb mao, bo jo kꞌkahn. Owo á kehm lungu nlumanne, 10kehm-e tongo re, “Nne awohng awohng kpo tohko ka amahm ma nno. Eji bo ma wo kpꞌbuumu, á kehm gohro ka bo ma ki ga nob. Wobrod amahm ma nno bum gona tete sik anv!”

11Ngbokambang a nkpokosi nyi Jisos limi no nyi a, á limi go Kana ji Galili. Owo á tibi ellub ene. Abatꞌtoono ebe kehm taame tv-e. 12Owo Jisos kehm tahme go Kapenium, a nnyehn, a abonanyehn, a abatꞌtoono ebe. Owo bo kange abon afung ntiil.

Ana Jisos tahme go etahk Esowo

(Mat 21:12-13; Mak 11:15-17; Luk 19:45-46)

13Ngare nyio elkak ni aneb Jus ni bo kpo lung re Pasova ebkabbe. Owo Jisos kehm tahme go Jerusalem. 14Etahk Esowo ona wo, á nyehne ane ba jo gungu efong, a ejoro, go mbehl, fere nyehn ane ba jo yaange akpohko jehk no, kpꞌyaange akpohko go akpꞌkuru ebo. 15Jisos kehm soro ko ebrꞌrare, kam ane kpee yehke go etahk Esowo jio, a efong efong fvfo. Á sale akpohko nya abayaangakpohko, fere gbul akpꞌkuru ebo tuubu go. 16Á kehm tongo ane bao ba jo gungu mbehl re, “Roden nsol nyia, wahn song a nyi! Kana rod etahk Nsoo, bum ana edi are!”

17Abatꞌtoono ebe kehm soro buumu ana nwer Esowo bungu no re, “Ntir nyi n yehke kak, eji n tuungu etahk Esowo, nyi nyi bahke fere wul-m.”

18Jus kehm-e bahbe re, “Elliingi ani a bahk-r tibi, eji e lꞌkahn re, a kpi nsahm nyi a kpo lim nsol nyia?”#2:18 Mat 21:23.

19Jisos kehm faange bo re, “Waan etahk Esowo jia, m bahke tuungu si ji nfenfe go nfung era.”#2:19 Mat 26:61; 27:40,63.

20Jus kehm bungu re, “Bo ko nnya atahl abal a nnya erakera, si etahk Esowo jia, ji ji a ma fere tong re, a bahke tuungu si go nfung eraa?” 21Etahk Esowo ji Jisos jo bung bade, ngubjing enye nyi.#2:21 1 Kor 6:19.

22Ngare nyi á nyahme go elkv, abatꞌtoono ebe bꞌbuumu alum nyao nya á bungu no. Owo bo kehm taame tv nwer Esowo, fere taame tv alum nya Jisos bungu no.

Ana Jisos kpꞌkahne ane kpee

23Eji Jisos jolo go Jerusalem ngare nyio nyi elkak Pasova, ane gbalee ba taame no tv mbing enye, eji bo nyehne akpokosi nya á jo lim.#2:23 Jon 10:42; 11:45. 24Á joom bum bo go etingitingi, tibre á jo kahne bo kpee, ana bo li no. 25Kpeem fuumu re nne awohng awohng tong-e bade ana ane li no, tibre yefono antahng kꞌkahn ana ntim ane li no.#2:25 Mak 2:8.

ที่ได้เลือกล่าสุด:

Jon 2: ekaNT

เน้นข้อความ

แบ่งปัน

คัดลอก