SIEMCHILBU 2
2
1Tuachi’n lei leh van leh asung a umte zousie toh siem zousieng ahita hi. 2#Pawt. 20.11#Heb. 4.4,10Tualeh Pasian in ani sagi niin azouta a, tuachi’n ani sagi niin anasep zousie apat akhawlta hi. 3Tualeh Pasian in ani sagi ni khu aguolzawl a, asiensuota hi, aziehpen tua niin Pasian in asep abawl zousie apat akhawlta hi.
Mihing siemna
4Lei leh van siem dan khu tambang ahi, Mangpa Pasian in lei leh van asiem ni in. 5Tuachi’n lei a loupa mawngmawng leitungah aum nai sih a, tualeh leitungah haichi mawngmawng apou nai sih hi. Aziehpen Mangpa Pasian in leitungah guo azu sah nai sih a, tualeh lou hou ding mihing koima aum nai sih hi. 6Hinanleh leitung apat tuimei ahing kaitou a, leitung pumpi anom sah hi. 7#1 Kor. 15.45Tualeh Mangpa Pasian in, lei a leivui in mi asiem a, anahkosung ah hinna hu aha khum a, tuachiin mi khu hinna nei mihing ahing suohta hi.
8Tualeh Mangpa Pasian in suolam ah Eden huon khat asiem a, khunah a mihing siem khu aumsah ta hi. 9#Kihil. 2.7; 22.2,14Tualeh leitung apat in Mangpa Pasian in singkung etla huoitah leh nehthei chinteng apousah a; hinna sing leh sie leh pha theina sing zong huon laikimtah ah apousah hi.
10Tuachi’n Eden apat in lui khat huon tapnou ding in aluong khie a, khunakipat in a kikhenzah a kaa li asuoh ta hi. 11Aka khatna min Pishon ahia, khumkhu Sana tamna Havilah gam kuolkhum a luong ahi. 12Tualeh tua gam sana khu ahoi a, Bdelium leh Onix suongte zong aum hi. 13Tualeh lui nina min Gihon ahia, Kush gam kuol khuma luong khu ahi. 14Lui thumna min khu Hiddekel ahia, Assiria gam suolam ah aluong hi. Tualeh lui lina khu Euphrates ahi.
15Tuachi’n Mangpa Pasian in Mihing khu azawpi a, Eden huon kem ding leh veng ding in akoita hi. 16Tualeh Mangpa Pasian in mihing kungah “Huon a sing chinteng ga zousie na ut ut in na ne thei ding hi. 17Hinanleh sie leh pha theina singga khu na neh ding ahi vawtsih hi, na neh leh na neh ni mama in na shi ngeingei ding hi”, chi’n thu apie hi.
18Tualeh Mangpa Pasian in “Pasal amatang a aum ahoi sih, ama panpi ding, akithuopi dia kilawm bawlpieh vawng e”, achi hi. 19Tualeh Mangpa Pasian in lei #Lei: Hebru ham in Adamah ahia, mihing zong Adam chi ahia, mimasa pen Adam khu lei a pat a lah doh ahizieh in Adam akichi hi. akipat in gamsa chinteng leh tungleeng vate chinteng asiem a, tualeh amin ding uh bang ahisah mawng eimah chi athei na ding in Adam kung ah ahing zawpi a, tualeh ganhing zousiete khu Adam in amin uh ana phuo pieh bang zelin amin uh ahi denta hi. 20Tuachi’n Adam in Ganta zousie tungleeng vate leh gamsate amin avaw chiet a, hinanleh Adam ading in apanpi ding leh akithuopi ding aum sih hi.
21Tuachi’n Mangpa Pasian in Adam a imut asuah sah a, tuachiin nuomtah in a imu sah a, tualeh anahgute khat aladoh a, khummun khu asa ma in asuhdim pieh hi. 22Tualeh Mangpa Pasian in Adam nahgu alaahdoh khu numei in asiem a, amanu Adam kungah ahing zawpi hi. 23Tualeh Adam in, “Tam khu tuin ka gute gu leh ka tasate tahsa ahia, Pasal akipat kiladoh ahiman in Numei a kichi ding hi”, achi hi. 24#Mat. 19.5; Mak. 10.7,8; 1 Kor. 6.16; Eph. 5.31Tuaziehin, pasal in anu leh apa anuasie ding a, azi lam ah abeh ding hi, tuachiin sakhat ahi ta ding uhi.
25Tualeh Adam leh azi khu ani un guohtang in aum ua, hinanleh azum sih uhi.
ที่ได้เลือกล่าสุด:
SIEMCHILBU 2: ZOUBSI
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.