KAHBHAO 8
8
Yung Jeppü
1Shejao Kahvangi Noah hatü büpa mü jahas mongei nyupü yemhimakthü deih-ei dang, hatü Kahvangi vanglük lükhüei yung jepei leishih. 2Sheyü kahmong yung hatü phumshang vang shaden küptüktü vang nekei-i dohhü. 3Sheyü youngmü youngmü yung jepteke. Nyih 150 dohpü lemei yung jepei lei, 4hatü len nyetpabü nyih anpünyetpabü kü Ararat Kahshangei jahas maangteke. 5Len anpabü thahshi yung jepei jepei lei, hatü lenyang anpabü shongpü nyih kü kahshang teppü eeteke.
6Nyih pinyi pheikü Noah-i ümha shaden aptü, 7ashaba hük shom, shejao hapa ashaba nyokei nelei-i yung mangjep thahshi piteiyei nyudai. 8Hapheikü büpai kahdok leipü yung jeplashang shei veinüng athuba hük shom. 9Shejao kahdok shak kü yung maei nyupü nangkü bakhen shing nedangi shao Noah touei jahaslei piyei lei. Hanangkü büpai athuba yepei yah-ei jahas mongei shülang. 10Büpai nyih nyet danei nyutü shao athuba shom. 11Om mü athubai julei olive pünien hük japtü büpa touei leijateke. Hahepak küang Noah-i kahdoknyü leipü yung jepteke shei nying. 12Büpai shao nyih nyet angtü nyipabü athuba shom shejao hapa hepak keyü athuba nyokei neleija. 13Noahlei bong kho vok mü hük shongpü len shongpü nyih kü kahdoknyü leipü yung jepdai. Hahepak kü Noah-i jahas kübü adok aptü veishingkü kahdokü üdaitü eeteke. 14Len nyipabü nyih hapünyetpabü kü kahdokü meishi üdaitü nyu.
15Hahepak kü Kahvangi Noah kü, 16“Nüng, anyüha, hapeüthü hatü hathülei nyühathü peü jahas mongeipü vamkei. 17Nüng mü nyupü yem lemphüouhiyüh, yemhimak hatü kahdok leipü yemhamakha peü vamhütuh; shejüang jomi cheha shaanei li daei kahdoknyü makahen” shei e. 18Hanangkü Noah, chenyüha, hapeüthü hatü hathülei nyühathü peü vamteke. 19Jahas mongeipü yemhimak, ouhiyüh peü lem hük pheikü hük shei vamteke.
Noah-i Jakpü Moila Shuohpü
20Hapheikü Noah-i Shembüpa kü moidü hük ling, hatü daülangpü yemhimak hatü ou hanei yah-ei halei jakpü moila shuoh. 21Hapa vong meipü jakpü moila Shembüpa kü büjapü kü büpai büpalei mongei, “Sheyü shinnyih pheikü shennyak hük hashih mebü mongdang kü ten mon deihjao, shennyak tata kü ngei kahdok kü nethaüvaüpih; nevaijü ngei shelei mahtükpükei sheyü yemhimakthü nemahtükpih. 22Kahdoknyülei nyupü thahshi sheili haihen hepak, vethen hepak, kaongpü, shaampü hepak, shao hatü ünyü hepak, nyihnüng yanüng nedoh-i nyuhen” shei e.
ที่ได้เลือกล่าสุด:
KAHBHAO 8: PHOMBSI
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Phom Naga Bible - DAÜLANGPÜ LAIHING
Copyright © 2005 by The Bible Society of India
Used by permission. All rights reserved worldwide.