ข้อพระคัมภีร์ยอดนิยมจาก Mateo 24

แบ่งปัน

Bia ẽãta eababʉrʉba bioba zhãrã kʉãgꞌadꞌa ẽbaya. Mawũãmina izhi ewarita jõñeẽna mʉta pẽwã bꞌʉra ẽdrʉya.

Kꞌãwũã bedꞌea biata Daizezeta Nokꞌodꞌebemata jaradꞌaya ẽjũã jõmaʉ̃ maẽ, aramaʉ̃ne zhãrã jõmaʉ̃ba kꞌawuadꞌaya, mobebʉrʉ zeya ewari nʉmʉta jõĩrã.

Marãbara zhõta ũrĩnaña namabidꞌa ãĩbidꞌa, maʉ̃nerã perarãũdua, maʉ̃ jõma mawũã berabꞌariibara, mawũãmina wadꞌi ẽbaya ewari nʉmʉta jõĩrã.

Drua tabꞌeta drua awʉrʉta tabꞌe bawara zhõnaña, nokꞌorãta nokꞌorã awʉrʉ bawara zhõnaña. Nʉmeña puata, jarrabata, ẽjũã ureta baridu maẽ. Maʉ̃ jõma puata jẽdeba nʉmeña.

Bãjã, drua nebaya, mawũãmina mʉ bedꞌeara bari neba ẽã.

Nʉmʉne bio sewata mʉneba zebʉdabara mawũãnaña: Mʉrã zhãrã Ẽdrʉbia. Aramaʉ̃ne bio sewadꞌaya.

Marã chãbꞌaridꞌaya zuburia odꞌamarẽã, aramaʉ̃ne beakuadꞌaya, marã jõmaʉ̃ba juradꞌaya mʉ kꞌarea. Mʉnebemata ĩjã bꞌebara maʉ̃ ewadera bioba ĩjã ẽã duaneña, mawũẽ zhiya zhi jidabidꞌaya, zhiya zhi juradꞌaya. Sewata Daizezeba bedꞌeata jarabibaridꞌe duanaĩta bio piradrʉdꞌaya, aramaʉ̃ne bio sewadꞌaya.

Mawũãnaĩ Jesúsbara panaʉ̃ mawũãsia: Kĩrãkuita bꞌeaudua miõã zhi sewabidꞌa ẽbaita.

Marãsidꞌa aramaʉ̃ kĩrãkꞌa kĩrãkuita bꞌeaudua, mʉ Beubari Bape bꞌadꞌara zei baera marãbara zeita krĩchadꞌa ẽãne.

Maʉ̃ba dauba bꞌeaudua, marãbara kꞌawuadꞌa ẽbaera kꞌãrẽ ʉ̃madaudꞌe zeita mʉta marã Nokꞌora.

Mawũãmina kꞌãrẽ ewade kꞌãrẽ ʉ̃madaudꞌe mawũã berabꞌariira miõba kꞌawua ẽã, miã ángelerã ʉ̃trebemarãbidꞌa kꞌawuadꞌa ẽã, miã mʉãbidꞌa kꞌawua ẽã, awuarabʉrʉ kꞌawua bꞌʉa mʉ Zezebʉrʉ.

Nʉmʉne zhãrã sewata zhãrã ẽdrʉbita duaneña, sewata Daizezeba bedꞌeata jarabibaridꞌe duaneña, ũdudꞌakꞌa zromata okuabʉdaba zhãrã sewadꞌaya, sewaita obꞌedꞌara Daizezeba zhi jʉrʉmata bꞌesidꞌa sewadꞌaya.

Noé ewade berabꞌaridꞌa kĩrãkꞌa berabꞌariya mʉ Beubari Bape bꞌadꞌata zebʉrʉdꞌera. Jari ewadera do birui nawedꞌara nekꞌokua, kꞌãrẽ dokua, miã kꞌãĩkua bꞌeasia Noé jãba zromane edꞌa jʉ̃drʉdꞌa ewariedꞌabai. Adu-a bꞌedꞌe do birupe jõma jogꞌakuasia. Mawũã bꞌeaya mʉ Beubari Bape bꞌadꞌata zebʉrʉdꞌebidꞌa.