Yakkha 2023 WBT/NEBS  (NT) Drama

ङ्‌खिङ्‌बेला येसुगाबे चेलाचि न्‍दायाहोङ् न्‍छिम्‍दु, “वालोक राज्‍याबे घाक हाक्‍निङ् माडा इसा ओम?”
येसुङा एको पिछा काहोङ् ङ्‌खाचिगा उलुम्‍बे येप्‍मेतु, न्‍हाङ् लुचि, “का जेप्‍पा लुमेॽनेनिन, न्‍निङ्‌गा निङ्‌वा हिक्‍सुम्‍गाहोङ् मिमिॽहा पिछाचि लोॽवा न्‍लेक्‍सिगान्‍भोङ् हेॽनिङ्‌चा वालोक्‍का राज्‍याबे उमा न्‍दोक्‍त्‍वाम्‍गान्‍ना॥ ना पिछा लोॽवा निङ्‌वाबे, ‘का मिङान’ मिखुबा याॽमिमाङ् वालोक्‍का राज्‍याबे घाक हाक्‍निङ् माडा लेङ्‌मेॽना॥ इसाङा आका आनिङ्‌बे एको मिना पिछा स्‍वागात चोग्‍वा, न्‍नाङा का स्‍वागात चोङ्‌मेङ्‌ना॥”


“ङ्‌खाॽनिङ्‌गो काबे बिस्‍वास चोक्‍खुबा खा मिमिॽहाचि माध्‍येबे एको इसाङा पाप चोक्‍मेत्‍वा, न्‍ना गो ओखोमबे माडा लुङ्‌खाक्‍का डेङ्‌खा छुम्‍बिॽमाहोङ् घाइरोना सामुन्‍दाराबे लुम्‍नाहाङ्‌मा माङ् न्‍नागा लागि उचुन लेङ्‌मेहा॥ धिक्‍कार ना कायुङ्‌लेन! इजाङ्‌बाङ्‌निङ् कायुङ्‌लेनबे याॽमिचि पापपे आमेॽमाहा चेॽया वान्‍ने॥ पापपे आमेॽमाहा चेॽया गो तामेॽमाङ्, ङ्‌खाॽनिङ्‌गो धिक्‍कार न्‍ना याॽमि, इसाभाङ् ङ्‌खा चेॽया तामे!
“म्‍मुकङा कि न्‍लाङ्‌ङा न्‍दा पाप चोक्‍मेमेकाहाभोङ् न्‍ना चेनाहाक्‍सु॥ हिच्‍चि-हिच्‍चि न्‍लाङ्-म्‍मुकनुङ् हेॽनिङ्‌चा मेन्‍सिखुबा मिबे आमा हाक्‍निङ्‌गो एको मुक मेॽनिङ् एको लाङ् मेॽनिङ् हेॽनिङ्‌चा मेन्‍सिमाना हिङ्‌लुङ् तोक्‍मामाङ् उचुन्‍ना चेॽया ओम॥ न्‍हाङ् ङ्‌खाॽलामाङ् न्‍दा म्‍मिकङा पाप चोक्‍मेमेकाहाभोङ् न्‍ना चा लोन्‍धाक्‍सु॥ हिच्‍चि मिकनुङ् नाराक्‍का मिबे आमा हाक्‍निङ्‌गो एको से मिकनुङ् हेॽनिङ्‌चा मेन्‍सिमाना हिङ्‌लुङ् तोक्‍मामाङ् उचुन्‍ना चेॽया ओम॥”


“थाङ्‌थाङ् वायानि, न्‍निङ्‌दा खा मिमिॽहाचिबे एको चा हेला न्‍जोगानुम्‍चिम्‍निन॥ का न्‍निङ्‌दा लुमेॽनेनिन, ङ्‌खाचि सोखुबा उङ्‌चिगा वालोक्‍दुतचि साधाइ वालोकपेॽना निङ्‌वाफुमा आप्‍पागा उयुम्‍बे ङ्‌वान्‍नेहा॥ (इजाङ्‌बाङ्‌निङ् याॽमिगा उच्‍या गो म्‍मासाब्‍याहाचि हिङ्‌मेसे तायाना ओम॥)
“न्‍निङ्‌दा इ मितिॽवाघा? होम्‍बोक ओटा सामुङ् वाखुबा याॽमिगा एको सामुङ् मासाब्‍याभोङ् न्‍ना इ चोङ्‌मेॽना लोप्‍पि? न्‍नाङा ङ्‌खा पापा ओटा सामुङ्‌चि कोङ्‌गुखाबे नाॽवाचिहोङ् न्‍ना मासाब्‍याना एको सामुङ् योक्‍से ङ्‌खेमेन्‍नायि? न्‍हाङा उङा न्‍ना तुप्‍सुभोङ्, का जेप्‍पा लुमेॽनेनिन, ङ्‌खा म्‍मासाब्‍यानिन्‍हा पापा ओटा सामुङ्‌चिगा लागि हाक्‍निङ्‌चा न्‍ना तुप्‍सुना एको सामुङ्‌गा लागि उङ् तुक्‍नुङ् चोन्‍सिमेॽना॥ ङ्‌खाॽलामाङ् वालोकपे वाखुबा निङ्‌वाफुमा आप्‍पाङा चा खा मिमिॽहाचिबे एको चा म्‍मान्‍दिॽनिन्‍नि मिमेॽना॥


“एको बिस्‍वासिङा ङ्‌गा बिरुद्‌दाबे पाप चोगुभोङ्, ख्‍याघोङ् उङ् से वानिङ् उङा चोगुहा गाल्‍ति सोॽमेतु॥ न्‍नाङा ङ्‌गा चेॽया खेप्‍सुभोङ् न्‍ना ङ्‌गाम्‍निभाक लेङ्‌मेॽना॥ ङ्‌खाॽनिङ्‌गो ङ्‌खेप्‍सुनभोङ् न्‍दानुङ् हेकोहा एकोहिप्‍पाङ् याॽमिचि खेतुचिघोङ् ख्‍या, इजाङ्‌बाङ्‌निङ् धार्मासाप्‍लाबे छेप्‍ताहा लोॽवा खिमा-तुमाहा चेॽया तोङ्‌मागा हिप्‍पाङ् कि सुम्‍भाङ् साचि युङ्‌माहाचि॥ ङ्‌खिङ्‌होङ्‌चा उङा चेॽया ङ्‌खेप्‍सुनभोङ्, छुम्‍वाङ्‌बे ख्‍याघोङ् चेॽया युक्‍सु॥ न्‍नाङा छुम्‍वाङ्‌गा चेॽया चा ङ्‌खेप्‍सुनभोङ्, उङ् हेकोहा जातिगा याॽमिचि नुङ् तिरो पोक्‍खुबाचि लोॽवा लेङ्‌नि॥
“जेप्‍पा का न्‍निङ्‌दा लुमेॽनेनिन, ना कायुङ्‌लेनबे न्‍निङ्‌दा इहा थुन्‍द्‌वाम्‍गा, ङ्‌खा वालोकपे चा थुम्‍मेहा॥ न्‍हाङा ना कायुङ्‌लेनबे न्‍निङ्‌दा इहा फुक्‍स्‍वाम्‍गा, ङ्‌खा वालोकपे चा फुङ्‌मेहा॥ का फेरि चा जेप्‍पा लुमेॽनेनिन, ना कायुङ्‌लेनबे न्‍निङ्‌दा माध्‍येबे हिप्‍पाङ्‌ङा एको निङ्‌वागा लेङ्‌मेचिघोङ् इहा नाङ्‌मेचुगा, ङ्‌खा वालोकपेॽना निङ्‌वाफुमा पाङा न्‍जिङ्‌दा पिमेचिघा॥ इजाङ्‌बाङ्‌निङ् हेॽने हिप्‍पाङ् कि सुम्‍भाङ् आका आनिङ्‌बे न्‍छुम्‍मे, का न्‍नाबे ङ्‌खाचिनुङ् वामेङ्‌ना॥”


न्‍हाङा पात्‍तुरुस येसु वायानाबे तायाहोङ् येसु छिम्‍दु, “हाङ्‌बा, आका बिरुद्‌दाबे पाप चोङ्‌नुङ्‌खुबा का इखिङ् खेप छेमा पिङ्? इना ला खेप सोम्‍मा?”
येसुङा पोलोवा पि, “ला खेप से मेन्‍ना, लाखेङ् गुना ला खेप सोम्‍मा! न्‍हाङामाङ् वालोक्‍का राज्‍या गो एको हाङ्‌ङा उका नोकोरचिनुङ् हिसाब-किताब नाक्‍तुचिहा चेॽया नुङ् तोङ्‌मेॽना॥ न्‍ना हाङ्‌ङा हिसाप नाक्‍मा तारोक्‍तुचिनिङ् एखेङ् माहोम्‍बोक साम्‍मेङ् याङ् नाॽवा खेखुबा एको याॽमि हाङ्‌गाबे न्‍दा॥ ङ्‌खाॽनिङ्‌गो न्‍ना याॽमिनुङ् नाॽवा हुङ्‌मा खोतुनुङ् याङ् म्‍मायान्‍होङ् हाङ्‌ङा उङ्‌नुङ् वायाहा घाक थोक, उहिङ्‌खुमा, उच्‍याचि न्‍हाङ् उङ् आफाइ चा इन्‍चामाहोङ् नाॽवा हुङ्‌माना आग्‍गे पि॥ ङ्‌खाॽनिङ्‌गो न्‍ना नोकोरङा हाङ्‌गा उलाङ्‌बे सेमेसाङ् खाॽला लु, ‘हाङ्‌बा, एहिलेन सोम्‍मा कुसाङ्, का ङ्‌गा घाक नाॽवा हुङ्‌वाङ्‌हा॥’ न्‍हाङा हाङ्‌ङा न्‍ना नोकोर उलुङ्‌मा तुक्‍तुहोङ् उका घाक नाॽवा लेतुबि, न्‍हाङ् उङ् लेहाक्‍सु॥
“ङ्‌खाॽनिङ्‌गो न्‍ना नोकोर ख्‍या॥ खेॽमास्‍यानिङ् उङ्‌नुङ् काम चोक्‍खुबा उकाम्‍निभाक तुप्‍सु॥ न्‍नाङा उङ्‌भाङ् ए होम्‍बोक युप्‍पा याङ् नाॽवा खेतुक्‍सा॥ उङा न्‍ना उकाम्‍निभाक ओखोमबे लाबुहोङ् लु, ‘न्‍दा खेतुघा नाॽवा लोप हुङु!’ न्‍ना उकाम्‍निभाकङा उलाङ्‌बे सेमेसाङ् खाॽला लु, ‘एहिलेन सोम्‍मा कुसाङ्, का घाक नाॽवा हुङ्‌वाङ्‌हा॥’ ङ्‌खाॽनिङ्‌गो उङ् ङ्‌गाक्‍सान, न्‍हाङ् ख्‍याहोङ् नाॽवा मेहुङ्‌ले सोम्‍मा छेक्‍पाङ्‌बे छेक्‍तु॥
“न्‍नानुङ् काम चोक्‍खुबा हेकोहा काम्‍निभाकचिङा खा घाक चेॽया न्‍निसु न्‍हाङ् इब्‍बे-इब्‍बे ङ्‌खुम्‍दिन्‍नुङ् ङ्‌ङेता॥ न्‍हाङ् ङ्‌खाचि ङ्‌ख्‍याहोङ् घाक चेॽया हाङ् ङ्‌खेम्‍मेतु॥ न्‍हाङा हाङ्‌ङा न्‍ना नोकोर काहोङ् लु, ‘ओ दुस्‍टा नोकोर, न्‍दा म्‍मुक फाक्‍तुचिगा न्‍हाङ् का ङ्‌गा घाक नाॽवा लेम्‍बिॽनेन॥ का न्‍दा दाया चोक्‍नेन्‍ना लोॽवा न्‍दा चा न्‍दानुङ् काम चोक्‍खुबा ङ्‌गाम्‍निभाक दाया चोक्‍मा पोर्ने न्‍सायान्‍नायि?’ न्‍हाङा हाङ्‌गा तुक्‍नुङ् ओलोक खोताहोङ् न्‍ना नोकोरङा घाक याङ् मेहुङ्‌ले सोम्‍मा छेक्‍पाङ्‌बे छेक्‍माना आग्‍गे पिचि॥”
न्‍हाङा येसुङा उका चेलाचि लुचि, “न्‍निङ्‌दानुङ् छेमा नाक्‍खुबा न्‍निङ् फुनुन्‍छा नानुन्‍छाचि निङ्‌वाभाङ् छेमा म्‍बिम्‍चिम्‍गानभोङ्, वालोकपेॽना निङ्‌वाफुमा आप्‍पाङा चा न्‍निङ्‌दा ङ्‌खाॽलामाङ् चोगिॽवाघा॥”

ฟัง मात्‍ति 18