Yakkha 2023 WBT/NEBS  (NT) Drama

या लेन हेक्‍साङ् येसुङा पात्‍तुरुस, याकुब नुङ् उनुन्‍छा युहान्‍ना से उङ्‌नुङ् खेतुचिहोङ् चान्‍चान्‍ना चोम्‍कोङ् पोटि ख्‍या॥ न्‍नाबे उङ्‌चिङा न्‍सोहेक्‍सुनुङ् येसुगा रुप हेकोना लेक्‍सा॥ उका उनाचिक नाम लोॽवा चाम्‍काचोक्‍मा तारोक्‍तु, न्‍हाङ् ओतेकचि च्‍हेन छेम सोॽमायि मेयामाहा न्‍लेक्‍सा॥ न्‍हाङ् थाप्‍थुम्‍बे निङ्‌वाफुमाभाङ् चेक्‍खुबा मोसा नुङ् एलिया न्‍नाबे ओताचिहोङ् येसुनुङ् साला लेन्‍मा तारोक्‍ताचु॥ खा निसुहोङ् पात्‍तुरुसङा येसु लु, “हाङ्‌बा, कानिङ् न्‍नाबे वाइहा इखिङ् उचुन लेक्‍साहा॥ ङ्‌गा न्‍निङ्‌वा काङ्‌मेॽनाभोङ् का नाबे सुम्‍चि याक्‍सा चोग्‍वाङ्‌चिङाहा, एको ङ्‌गा लागि, एको मोसागा लागि न्‍हाङ् एको एलियागा लागि॥”
पात्‍तुरुस खाॽला कामास्‍यानिङ् फुहा खिम्‍फुरुम्‍मा तायाहोङ् उङ्‌चि मोप्‍तिचि, न्‍हाङ् खिम्‍फुरुम्‍माहोङ्‌भाङ् खाॽलाना सेम्‍ला लोन्‍दा, “ना का आलुङ्‌मा तुक्‍तुङ्‌ना आच्‍या ओम, नानुङ् का तुक्‍नुङ् चोन्‍दास्‍यामाङ्‌ना॥ न्‍निङ्‌दा उङा लुइघा चेॽया खेप्‍सानुम॥” न्‍ना सेम्‍ला ङ्‌खेप्‍सुहोङ् चेलाचि तुक्‍नुङ् ङ्‌गिसिता न्‍हाङ् फोप म्‍फोप्‍ता॥ ङ्‌खाॽनिङ्‌गो येसु तायाहोङ् ङ्‌खाचि तोक्‍निसाङ् लुचि, “पोगानि, ङ्‌गिसितानिन!” न्‍हाङ् ङ्‌खाचि म्‍बोगाहोङ् न्‍सोनिङ् न्‍नाबे येसु से न्‍निसु॥
चोम्‍कोङ्‌भाङ् ङ्‌ङुङ्‌मास्‍यानिङ् येसुङा लुचि, “खेप्‍सानुम, याॽमिगा उच्‍या स्‍यानाभाङ् हिङ्‌गिलिक मेलेङ्‌ले सोम्‍मा न्‍निङ्‌दा निसुम्‍घा खा चेॽया इसा चा न्‍लुयानुम्‍चिम्‍निन॥”
न्‍हाङा चेलाचिङा येसु न्‍छिम्‍दु, “धार्मासाप्‍ला चिन्‍खुबाचिङा इजाङ् एलिया माङ् ओन्‍दाङ् तामापोर्छो भोङ् ङ्‌गामेहा?”
येसुङा ङ्‌खाचि लुचि, “एलिया जेप्‍पा तामेॽना, न्‍हाङ् उङा घाक चेॽया फेरि तोक्‍स्‍वाहा॥ ङ्‌खाॽनिङ्‌गो खेप्‍सानुम, का न्‍निङ्‌दा लुमेॽनेनिन, एलिया ओन्‍दाङ्‌माङ् तायाब्‍यामाना, उङ् याॽमिचिङा चिनान्‍जोगुनिन, न्‍हाङ् उङ्‌चिङा इमिन चोक्‍मा म्‍मितु ङ्‌खाॽला न्‍जोगु॥ ङ्‌खाॽलामाङ् याॽमिगा उच्‍याङा चा ङ्‌खाचिगा मुकपाहाङ् तुखि आङ्‌मा पोराचोङ्‌मेहा॥” न्‍हाङा उङा बाप्‍तिस्‍मा पिखुबा युहान्‍नागा उतुम्‍बे कायामाना राइछोभोङ् चेलाचिङा ङ्‌ङासु॥


न्‍हाङा येसु नुङ् उका चेलाचि प्‍याक याॽमिचि ङ्‌वायाना ठोङ्‌बे न्‍लासाराया॥ न्‍नाबे एको याॽमि येसुगा उयुम्‍बे ताया, न्‍हाङ् लाङ्‌छुकपे युङाहोङ् खाॽला लु, “हाङ्‌बा, आका आच्‍या दाया चोगु! इजाङ्‌बाङ्‌निङ् न्‍ना खिरिरिबाङा याक्‍सुक्‍सुहोङ् तुक्‍नुङ् तुखि आङ्‌मासिमेॽना॥ न्‍ना दाफे-दाफे पेन्‍धेत्‍वा न्‍हाङ् मि नुङ् माङ्‌च्‍वाबे आन्‍नुङ्‌मेॽना॥ न्‍ना का ङ्‌गा चेलाचिगाबे खेतुङ्, ङ्‌खाॽनिङ्‌गो उङ्‌चिङा नुमेॽमा ङ्‌यासुनिन्‍ना॥”
न्‍हाङ् येसुङा लुचि, “इमिन्‍हा बिस्‍वास मेॽनिङ्‌हा नुङ् तोप्‍सिसिइघा याॽमिचि! हेॽनिङ् सोम्‍मा का न्‍निङ्‌दानुङ् वाङा? का इखिङ् साहाचोक्‍नेनिन? सोङ् न्‍ना नाबे आप्‍तानुम॥” न्‍हाङा येसुङा न्‍ना इसिॽना मुइ थिन्‍दु, न्‍हाङ् न्‍ना इसिॽना मुइ लोन्‍दाख्‍या॥ न्‍हाङा न्‍ना बाबु सोलोक नुया॥
मिहेक्‍साङ् चेलाचिङा स्‍वाक येसु न्‍छिम्‍दु, “कानिङ् च्‍हेन न्‍ना इसिॽना मुइ इजाङ् लोन्‍नाहाङ्‌मा ङ्‌यासुम्‍ङान्‍ना?”
येसुङा लुचि, “इजाङ्‌बाङ्‌निङ् न्‍निङ्‌दाबे बिस्‍वास मिॽयाङ्‌सेॽना॥ का जेप्‍पा लुमेॽनेनिन, न्‍निङ्‌दाबे यारोगा दाना हिङ्‌ना से बिस्‍वास वायानिङ्‌बि, ना चोम्‍कोङ् ‘नाभाङ् खेब्‍या’ लुम्‍गाभोङ् ना खेमेॽना॥ न्‍निङ्‌दा चोक्‍मा मेयामाहा इहाचा मान्‍हा॥ [ङ्‌खाॽनिङ्‌गो खाॽलाना इसिॽना मुइ च्‍हेन पार्थाना नुङ् उपाबास मेॽनिङ् लोन्‍नाहाङ्‌मा ङ्‌यामेन्‍ना॥”]


उङ्‌चि फेरि गालिल लिङ्‌खामबे न्‍छुप्‍सा न्‍हाङा येसुङा उका चेलाचि खाॽला लुचि, “याॽमिगा उच्‍या न्‍लाब्‍वाहोङ् याॽमिचिगा मुकपे म्‍बिवा॥ ङ्‌खाचिङा उङ् न्‍सिस्‍वा, ङ्‌खाॽनिङ्‌गो सुम्‍ना लेन उङ् फेरि स्‍यानाभाङ् हिङ्‌गिलिक लेङ्‌मेहोङ् पोङ्‌मेॽना॥” खा चेॽया ङ्‌खेप्‍सुहोङ् चेलाचिगा तुक्‍नुङ् उङ्‌चि निङ्‌वा तुगा॥

येसु नुङ् उका चेलाचि काफार्नाहुमबे न्‍दायाब्‍या॥ न्‍हाङा निङ्‌वाफुमापाङ्‌गा तिरो पोक्‍खुबाचि पात्‍तुरुसकाबे न्‍दायाहोङ् न्‍छिम्‍दु, “इना न्‍निङ्‌गा चिन्‍खुबाङा निङ्‌वाफुमापाङ्‌गा तिरो हुङ्‌वाहा?”
पात्‍तुरुसङा लुचि, “हुङ्‌वाहा, इजाङ् मेहुङ्‌मा?”
पात्‍तुरुस पाहोङ्‌बे उयाहोङ् उङा येसु चेक्‍लाप्‍मा हाक्‍निङ् ओन्‍दाङ् येसुङा पात्‍तुरुस खाॽला लु, “ओ सिमोन, न्‍दा इ मिमेकाना? ताम्‍दाङ्‌फुमाबेॽहा हाङ्‌चिङा इसाभाङ् तिरो म्‍बोग्‍वाहा? उङ्‌चि च्‍याचिभाङ् येम, हेकोहा याॽमिचिभाङ् येम?”
पात्‍तुरुसङा पोलोवा पि, “हेकोहा याॽमिचिभाङ्॥”
येसुङा लु, “ङ्‌खाॽलाभोङ् उङ्‌चि च्‍याचिङा तिरो हुङ्‌मा पोरान्‍जोङ्‌मेन्‍हा॥ ङ्‌खाॽनिङ्‌गो कानिङ् खा याॽमिचिभाङ् इसिॽनुङ् लेङ्‌मा न्‍लेङ्‌मेन्‍हा, ङ्‌खोङ्‌माङ् न्‍दा तालबे बाल्‍छि एसेख्‍या॥ न्‍हाङा घाक हाक्‍निङ् ओन्‍दाङ् आयाना नासा लोन्‍दुघोङ् न्‍नागा उया होसु, न्‍नाबे न्‍दा एको युप्‍पा याङ् तुप्‍स्‍वागा न्‍ना तिरो पोक्‍खुबाचिगाबे खेतुघोङ् एन्‍चिङ्‌गा तिरो हुङु॥”

ฟัง मात्‍ति 17