Luka' 23
23
Izesu'ni Goni' I-dilisa Pilato' Neida Ele'mizi Vani' Gamazi Gizine'
(Mataio' 27:1-2, 11-14; Maleko' 15:1-5; Zohane' 18:28-38)
1Neloti' nene ingine mukito' oti ele'mizi Pilato' neida vani'. 2Pilato' neida vii api' igi ti' li goni' i-dani': Me ve'mo nene Zuda ve leli' aleve ngele'mizo gopo ogo mino takisi moni nesi nene guvelesi ve Kaesale'ni imamilo laa' ido' aza nene O'moso'mo leli' Zuda vemu' nimiselelesa live nouve noline' nene guvelesi ve naba mamu' nolinako mo guvelesi ve naba nouve losa nolive. 3Ne'mine likevo Pilato' aza ti' lo longo' o-dine': Gaza nene Zuda veti guve'inesi ve naba nabe. Olo. Ne'mine lo longo' o-davo Izesu' aza ti' lo lo-imine': Mo gasika nene nolaine' ve. 4Ne'mine lavo Pilato' aza nene eveneto' medeli mini O'moso inite' lehizi-daa' ave nabasi ido' evene' muki' nesi ti' lo lo-ngimine': Naza me ve'mi lihimemu' vise' uvoni'za ma ningamuve. 5Ne'mine lavo ingine amuzo mili ti' li lani': Evene' muki' nGalilaia misuboukoti' ogo Zudaia misubou' ogo mo melokisi omo pilivo nene ga'ine hizo gamazi apize ngemo lovo do soto' noo-ngimive.
Izesu'ni Goni' I-dilisa Helode' Neida Gohi Ele'mizi Vani' Gamazi Gizine'
6Ne'mine li likevo Pilato' aza a'mine gamazi nene gelo longo' o-ngidine': Ve me ve nene nGalilaia misuboukoti' ve nehe. 7Ne'mine lo longo' o-ngedavo ingine oo likevo Pilato' aza Helode' gizebo o minine' misuboukoti' ve neine' neivo mo ningo gelo a'mine gameneu' Helode' nesi nene a'mine Zelusalemi numuda omo minine' nenako nemu' Pilato' aza nene Izesu'ni nene a'mine Helode' neida imiselavo ele'mizi vani'. 8Ne'mine ikevo Helode' aza nene Izesu'nimu' nene gozopoti' gele mino atoli'mine suno ma do soto' iline' ningelonako lo gala gelo gamene ha'na Izesu'ni ma ninguvoo lo gele'mo vo minaa' ine' nenako Helode' aza Izesu'ni ningo mulunou' lamine' giline'. 9Lanite' goloso gelo Helode' aza Izesu' ogo molo o'mo monine' initekumu' nene longo' o-deka' o-deka' o'mo vo minine'za Izesu' nene gamazi hamokisi ma bekimi ogo lo-emamine'. 10Ne'mine ogavo eveneto' medeli mini O'moso inite' lehizi-daa' ave nabasi ido' mono' apizi ngimaa' ave linge masi ingine igi velela oti amuzo goloso mili goni' i-dani'. 11Ne'mine i-dikevo Helode' ve eze ami pilisi ve've nete divi ledivi' i-di golo izi goboni mili-dani'. Ne'mine niigi guvelesi ve ma nange. Me izevo li oko'nolo' inite' lamine' goloso ma di ngili-dikevo Helode' ne'mo gohi Pilato' neida imiseline'. 12Ido' gomu' nene Pilatoki Helodeki ingine biluva' biluva' igi minasine'za a'mine Izesu'ni goni' i-dasine' gameneloti' nene zogo milasine' ve.
Izesu' Nene Helelive Li Zuda Vete Pilato'ni Gamazi Gosoho' Nasaha' Li-imi Goni' I-dani' Gamazi Gizine'
(Mataio' 27:15-26; Maleko' 15:6-15; Zohane' 18:39–19:16)
13Ido' Helode' aza gohi Pilato' neida imiselavo Pilato' aza eveneto' medeli mini O'moso inite' lehizi-daa' ave nabasi gizebo vesi ido' evene' linge ma mukikisi do nubo o-ngedo 14ti' lo lo-ngimine': Lingine ve mene nenita ele'mizi igisa ve mene evene' ga'ine hizo lovo do a'ningu' izaa' neive likevo naza nene lengi' vetido' mo ne'mine ido' nilahe lo longo' o-do vise' uvoni' nene lingine gili' nalo. Lingine goni' nii-dangu' nene monovo do goloso ine' monovo nene ma ningamoloni' ogave. 15Ido' naza ve me'mo monovo goloso dani' monovolo'vemu' vise' ogo ma ningamuvoni' ma'mine ogo Helode' ezesi ma ningamosa nene imisele hulave. Aza ma vise' ogo ningidiniko mela imiselavo amidine. Nemu' lingine gili' nalo. Ve me ve nene bele helelone' votigilelo' ogo lihime ma damive. 16-17Nemu' nene naza ami ma lo-ngedekuvo ngibilaa' ani' gavosodunu' bilavo bilavo imiselekuvo vilive. 18Ido' evene' muki' ingine mukito' geke' li gamazi ti' li lani': Ve mene bele helo Balabasi'ni nene hulo heta o-danivo lelita alive li lani'. 19A'mine Balabasi' nene Zelusalemi numuno ebeku' Loma ngamanila lovo do soto' ogo evenekisi ma bele helavo di huli galapusou' imikavo minine' ve. 20Ne'mino minivemu' nene ne'mine likevo Pilato' nene Izesu'ni haza hulo-dekuvo vilive lo gelo evene' nene gohi gamazi lo-ngimine'za 21evene' ingine gama gama gizi ti' li lani': Lohoto' zalo' belezo, belezo lani' ve. 22Ne'mine li likevo Pilato' aza gomu' gamene sita' line' nene gilamavo gohi ti' lo lo-ngimine': Nanitekumu' lohoto' zalo' belelone. Inite' goloso ine' nene nanite' nolive. Monovo goloso davo bele helelone' monovo've nene ma nolihe lo vise' uvoni'za ma ningo do soto' amuve. Nemu' nene naza ami ma lo-ngedekuvo ngibilaa' ani' gavosodunu' bilavo bilavo imisele hulolove. 23Ne'mine lo line'za evene' ingine Pilato' line' gamazi nene gilahe gilamahe igi mini Izesu' nene mo lohoto' zalo' helelive li mili hiti hiti' igi geke' geke' goloso livi' livi' adi'mo Pilato' gamazi've nene ivile' ani' ve.
Pilato' Aza Izesu'ni Nene Lohoto' Zalo' Bililizave Lo Eveneliti A'ningu' Molani' Gamazi Gizine'
24Ne'mine ogavo Pilato' aza engi' lani' gamazilo' nene gele ngemo Izesu'ni bililizave lo lo hukine' ve. 25Ne'mine ogo ve ma gomu' Zelusalemi numuno ebeku' lovo do soto' ogo evenekisi ma bele helavo galapusolo' huli-dikevo minive nene mo galapusoloti' osu' lo lelita alive li lave nene galapusoloti' osu' lo-dosa Izesu'ni nene engi' lu'nido' e'meto ami pilisi veti a'ningu' molavo di vani' ve.
Izesu'ni Di Vi Lohoto' Zalo' Bilani' Gamazi Gizine'
(Mataio' 27:32-44; Maleko' 15:21-32; Zohane' 19:17-27)
26Ne'mine ogavo Izesu'ni nene ele'mizi di nivavo ve ma Afilika misubo gaheve Kilene misuboukoti' minive gulive Simoni' aza nene Zelusalemi numuno ebe' hetati' ogo tauniko dizo voloso adoti' ogo akalo' neivo ningisa Izesu' gehe do vo minine' lohoto' za nene gehe do e'meto alive li gihi-dikevo geho e'meto vine' ve. 27Ne'mine igi nivavo evene' muki' goloso nene nge'meti nivavo a'mingu' vene' ma vani' nete Izesu'ni nene mulumo gili-di a'nine gesebe' izi ive nama i-di'mi e'meti vani' ve. 28Ne'mine i'mi nivavo Izesu' nene mine velepe' izo ti' lo lo-ngimine': Zelusalemi venekizo, nenikumu' nene ive nama ami asi langisetinemukisi ido' lengi' izipahatinemukisivo' nene ive ilo. 29Ido' lingine ne'mine ilizani' nene mene gili' nalo. Gamene ma soto' olosa neine' soto' ilingu' nene gohuno venekumukisi izipe gidamani' venekumukisi ido' izipe amine ngimamaa' nani' venekumukisi nene evenelite ti' li lilisave: Geni naba soto' o neingu' mene Izipaha'ine nomivo minani' ne'mo nene mo lamine' minikeve li lilisave. 30Ido' a'mine gamene nene evenelite golo nabamu' nene ngutoko lemo molo hite-ledevo ido' golo ngomomu' nene ogo do haleke-ledevo lilizani' gamene mineleseive. 31Ne'mine lo ti' lo lo-ngimine': Naza ne'mine noluvoni' nene ne'mine ma i-nidilizani' nene naza evene' lamine' olo' gosoho' ne'mine minuve ma nene ne'mine i-nidilisani'za alinge' gamene ato' ma soto' ilingu' lingine monovo goloso daa' nave olo' goko' ne'mine gili minave nene agae, inite' di nadi' i-lingidi' nalizavo.
32Ido' gizengize ve sita' ma nesi nene Izesungisi maka' lohoto' zalo' ngibili hililisa ngele'mizi di vani' ve. 33Mo ngele'mizi vi ebe' ma gulive Godo'ine Amuzo ve laa' ado' nene heteli a'mido' nene Izesu'ni lohoto' zalo' bili badisa ido' gizengize ve sita' nesi nene ngibili hela hela ana hulaa' idaasi hulamaa' idasi badi-ngidani' ve. 34Ne'mine ikevo [Izesu' nene ti' lo line': Ahono, ingine mene igi mili nani' inite' nene gili guni amaze. Lihime'ine hulo-ngedezo. Ne'mine lavo] ingine Izesu' oko'nolo' inite' nene zaho dalihe dalihe li geheni ngomo ngomo hulaa' zohi' ani'. 35Ne'mine navo evene' ma nene a'mine ngibili badado' nene oti mini ningi minani'. Ido' Zuda veti gizebo ve'ine nete nene divi ledivi' igi gize' zohika eikumu' li mini ti' li lani': Aza nene evene' do ngu' izo do lamine' o-ngedaa' ive ve lani' nenako aza nene leli' do lu' izelive lo O'moso'mo imiselelesa live nene ei' neivo ma ei' oko'no nene do u' izezo lovo. 36Ne'mine likevo ami pilisi ve netesi nene gize' zohika li golo izi vaini noso ekese' o vine' nene nalihe li neida di igi imilisa igi 37ti' li lani': Gaza nene Zuda veti guve'inesi ve naba noo ma nene gasika gei' nene do gu' izevo. 38Ido' lohoto' za veleta nene luhuvo ma ti' li gizikani' nene bili gi'mizikani': Me ve nene Zuda veti guve'inesi ve naba ve.
39Ido' gizengize ve ngibili badani' sitakuti' mali'mo nene Izesu'ni dovo ledevo' ogo ti' lo lo-dine': Gaza nene do lu' izelive lo O'moso'mo gimiselelesa live ma nene nane. Olo. Nemu' amuzokasi nane' noloseinako nemu' gasika gei' nene do gu' izo ido' lezesi do lu' izevo. 40Ne'mine lo line'za gizengize ve ma ne'mo nene elemo ti' lo lo-imine': Lezesi ezesi nene hamo' olo' nogizune' nenako gaza ne'mine gamazi lo-deliningumu' nene O'moso'mo lihime gemeleseinako O'mosomu' golisesi mo gelamabe. Olo. 41Leze mene libilani' nene gizengize oga' usine' lihimete malo' nene apasi nilibilani' nene mo lisihe' o neive. Ido' ve me ve nene inite' ma do goloso amido' hazau' nibilave. 42Ne'mine losa Izesu'ni ti' lo lo-imine': Izesuvo, gaza eveneto' gizebo iline' amuzo dosa aline' gamenelo' nene nenikumu' gelezo. 43Ne'mine lavo Izesu' aza ti' lo lo-imine': Naza mo lamineto' ti' lo nolo-gimuve. Idise mene Okulumo' ebe' gulive Paladisi ebeku' gesi nesi makato' bizo minelesusive.
Izesu' Hiline' Gamazi Gizine'
(Mataio' 27:45-56; Maleko' 15:33-41; Zohane' 19:28-30)
44Ne'mine lo nolivo holise' tuvelu (12) kiloku ne'mine neivo ho' lamivo ebe' mukiku' nene liti'muso ize gese' ogo mine do vo tili (3) kiloku nivenga' ogavo gohi labana' iline' ve. 45Ido' mono' numuno nabau' O'moso'mi kekeize numuno lulo ve li numuno lulo ma lavolavo naba' nabadunu' izi huki O'moso'mo minaa' ingu' dizaa' aka hizi tilikani' nene belo ho' lo sita' ogo ngolo' line' ve. 46Ne'mine ogavo Izesu' nene asi naba lo ti' lo line': Ahono, neni' vo'nehaza nene gei' angau' nomuluve. Ne'mine losa ahu' do dizo nohulo hiline'. 47Nohilivo ami pilisi veti gizebo ve aza nene soto' ine' inite' nene ningo O'moso'mi gulive do naba o-do ti' lo line': Mo lamineto' me ve ma nene mo evene' lisihe' minani' neive. 48Ne'mine lo lavo a'mine Izesu'ni bililizani' ningilisa a'mida igi di gese' ave muki' ingine a'mine soto' ine' inite' nene ningi mulumo naba goloso gili a'ine gesebe' izi'mi izi'mi numu'nida tine' mili vani' ve. 49Ido' ne'mine navo ei' zogo ve zuho mukikisi nGalilaia misuboukoti' maka' ani' venekisi nene hoto' ile mini a'mine soto' ine' inite' nene ningi minani' ve.
Izesu'ni Galese Izi-dani' Gamazi Gizine'
(Mataio' 27:57-61; Maleko' 15:42-47; Zohane' 19:38-42)
50-51Ido' ne'mine ikevo ve ma gulive Zosehe' aza nene Zuda veti numuno ebe' ma Alimataiati' ve minine'. Aza nene evene' lamine' hehe lo minive Zuda veti kanisoleti muliseuti' ve minine'za kanisole linge nete Izesu'ni belelone li lovo gizi li hukisa a'mine nite' igi mili angu' nesi nene gele ngemamine' ve. Asi O'moso'mo eveneto' gizebo iline' gamene alingumukovo' nene gizebo ogo minaa' ive minine' ve. 52A'mine ve ne'mo nene Pilato' neida vo Izesu' oko'nomu' nene nemelive lo longo' ine' ve. 53Ne'mine ogavo ha do vo molo-delesane lavo Izesu'ni nene lohoto' zaloti' apaso do lemo lavolavo lamineku' asabu' izo do vo gonoso galese gehengu' ma golo'vati lili' angu' nene evene' hamokisi ma mili-ngidamangu' api' ogo molo-dine' ve. 54A'mine molo-dine' gamene nene holise' gameneu' nalizani' noso' nite' di va'va' igi mili minaa' gamene Falade minine' nenako engi' holise' minaa' ani' gamene nene mo alitelesa neivo molo-dine' ve. 55Ne'mine neivo nGalilaia misuboukoti' Izesu'ni e'meti ani' vene' nene Zosehe' aza Izesu'ni nene do zala molo-delihe li ningilisa e'meti vi a'mine gonoso galese nene ningi gonoso molo-dine' nesi nene ningani' ve. 56Mo ningisa tine' mili numu'nida vi gonoso nene geleso unuvo ogalive li gonosolo' hilaa' ani' uveli ato ato' nene di va'va' igi minisa holiseku' nene engi' lou' gamazi'mo lido' e'meti haza mini gili minani' ve.
Айни замон обунашуда:
Luka' 23: aso
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.