Yoane 5
5
1Panuma pali fyefyo-fintu kwali necitenje cimbi icaŵaJuda; ŵaYesu naŵo ŵaliile uko kujelusalemi.
2Uko kuJelusalemi apepi napaMusiko waMbelele, eko lili isiŵa, iliilicilwe muŵuEbeya ati niBetesida; kuli lyo lyopele kulisiŋgulucile neliŋga; mwiliŋge'lyo muli imisiko isanu. 3Kaŵili mopele umo mwalukulala aŵantu aŵenji aŵaIwele—nempofu, nefilema, neŵauminine lukoso-aŵalukupembelela ukuŵilaka amenda. 4Pakuti pampindi imbi iŋkalamba yaŵaLesa yalukuselucila mwisiŵa, nekuteŋkanya amenda; paŵantu ŵonse, uyo uwakutaŋgo'kwicila-mo, pakweŵa ati ateŋkanisiwa amenda, ewakuŵusiwa kuŵulwele ŵonso'ŵo ali naŵo.
5Lomba ekwali umbi umwalalume, uwalukutenda imyaka amakumi atatu nemyaka isanu naitatu peulu. 6Peŋka ŵaYesu, pakumuŵona alilele, nekwisiŵa ati alukutenda impindi ikulu, ŵalimwipwisye ati: Kani ulukufwayo'kutenduluka weŵo? 7Naye umulwele nekuŵaasuka ati: Sombi Sikulu, nsikwete umuntu uwakuŋgawika-mo mwisiŵa impindi iyakuŵilaka amenda; sombi pakulukuya neŵo, umbi kale aicila-mo. 8Naŵo ŵaYesu nekumweŵa ati: Ŵuka, upinte uŵulo ŵoŵe, ulukwenda! 9Lomba impindi iyo yopele umuntu uyo aliŵele nemakosa, nekuŵulo'ŵulo bwakwe, nekulukwenda. Akasuŵa ako kali kasabata.
10Pakuti pali fyefyo aŵaJuda ŵalilaŵile kuli woyo uwatendulucile ati: Weŵo, lelo kasuŵa kasabata, tekwelelwa weŵo ukupinto'ŵulo ŵoŵe. 11Naye nekuŵaasuka ati: Uyo uwambusya neŵo wopele ewandaya ati: Uŵule uŵulo ŵoŵe, ulukwenda. 12Naŵo ŵalimwipwisye ati: Mbaninani uwalaŵile'fyo kuli weŵo ati: Uŵule uŵulo ŵoŵe, ulukwenda? 13Sombi uyo uwatendulucile taamwisiŵile-po, pakuti ŵaYesu ŵalikumbulucile, pakuti aŵantu ŵalifulile apo.
14Pantanjile ŵa Yesu ŵalimusanjile mwitempuli, nekulaŵila kuli ye ati: Weŵo ŵona, ulitendulucile; tekuŵifya liŵili, wikesa-kuŵa nacimbi iciŵipile icakucila napaŵulwele uŵo. 15Popele apo umuntu uyo alikumbulucile nekuŵaŵula aŵaJuda ati: NiŵaYesu aŵali ŵambusya neŵo. 16Pakuti pali fyefyo naŵo aŵaJuda ŵaliŵakululwisye ŵaYesu, pakuti ŵalicitile'fyo-fintu pakasuŵa kasabata. 17Sombi ŵa Yesu ŵaliŵaasucile ati: ŴaTata ŵalukucite'milimo iyakufika nakumpindi yaŵukumo, naneŵo ndukwicita. 18Peŋka pakuti pali fyefyo aŵaJuda ŵalifwaisye ukwakucila ukuŵepaya pakuti ŵalipulaisye ifyasabata; nakaŵili pakuti ŵo ŵalisimbwile ŵaLesa ati niŵaTata, ŵalukulipalanya aŵene pamo naŵaLesa.
19Pakuti pali fyefyo ŵa Yesu ŵaliŵaasucile ati:
Cine cine, ndukumuŵuleni ati Umwana tesi ukucita akantu umwine, sombi fyeŋke'fyo ifi aŵono'kucita ŵaWisi efi esi ukucita; pakuti fyonse'fyo ifi waŋgacita ŵaWisi, fyopele'fyo neMwana kaŵili efi aŋgacita, 20Pakuti ŵa Wisi ŵalukumutemwo'kwakuti Umwana waŵo, nekumulanjisya fyonse'fyo ifi ŵalukucita aŵene. Kaŵili naimbi imilimo ŵakamulanjisya iyapatali iyakucila napali yiyi, ati mukalukukaŋkamana lukoso.
21Pakuti koti nifyopele'fyo ifi ŵalukuŵaŵusya aŵafwile ŵaWisi nekuŵasinsimuna, fyopele'fyo neMwana alukuŵasinsimuna aŵantu ŵopele aŵo alukufwaya. 22Naŵo ŵaWisi taŵasololola imilandu yaŵantu, neli nipamuntu umo, sombi ŵo ŵalimupele Umwana waŵo ukusololola konse, 23ati aŵantu ŵonse ŵakalukumucindika Umwana koti nifyopele'fyo ifi ŵaŵacindika ŵaWisi. Uyo utaalukucindika Umwana, icine taalukucindika neli niŵaWisi aŵamutumine.
24Cine cine, ndukulaŵila kuli mweŵo ati, uyo ulukumfwisya amasiwi anji nekupema-mo muli ŵaŵo aŵantumine, uyo euli nemweo uwamuyayaya, naye taakesa kusininwa-po; sombi afuma-mo mumfwa, ainjila muMweo. 25Cine cine, ndukumuŵuleni ati, ilukwisa impindi, eyafika pano, iyo ŵakumfwa aŵafwile isiwi lyaMwana waŵaLesa; peŋka aŵo aŵalukuliumfwa ŵakalukuli neMweo. 26Pakuti koti nifyopele'fyo ifi ŵali nemweo aŵene ŵa Wisi, fyopele'fyo kaŵili ŵalimupele Umwana waŵo ukulukwikele nemweo umwine: 27nakaŵili ŵalimupele uŵukulu ubwakusololole'milandu, pakuti ye Mwana waMuntunsi.
28Tekulukukaŋkamana pakuti pali fyefyo; pakuti ikesa impindi iyo lomba, aŵantu ŵonse aŵali mufilende ŵakomfwe'siwi lyakwe, 29nekufuma-mo; aŵo aŵalukucite'fiweme ŵakaŵuka liŵili ukwaMweo; sombi aŵo aŵalukucite'fiŵipile ŵakaŵuka liŵili ukwakusololola.
30Neŵo neŋka nsiisi ukucita neli kantu; koti nifyopele'fyo ifi numfwa, fyopele'fyo nakaŵili ndasololola; nako ukusololola kwanji kuliluŋgeme, pakuti nsilonda ukufwaya kwanji, sombi ukufwaya kwaŵaŵo aŵantumine eko ndonda. 31Kani neŵo neŋka ndukulisimicila, ukusimika kwanji takulukwikala kwacine. 32Epwali naumbi ulukunsimicila; kaŵili ndiisi ati ukusimiko'ko uku alukunsimicila kwacine.
33Mweŵo mwalitumine aŵantu kuli Yoane, naye aliŵele nimboni yaŵucine; 34sombi ukusimiko'ko uku mpoka takufumine kuŵantunsi; sombi ndukulaŵile' fyo ati mukapuluke. 35Uyo-Yoane ewali mumosyo uwakwaka nekutuŵa; kaŵili impindi ice mwalukusumino'kusaŋgalala mukusweta kwakwe.
36Sombi ukusimiko'ko ndi nako kulicilile uŵukulu napali koko ukwakwe Yoane; pakuti imilimo iyo ŵaTata ŵampela ati njikonsye, imilimo yopele'yo iyi ndukucita, ilukunsimicila neŵo ati ŵaTata eŵantumine. 37Kaŵili ŵaTata aŵantumine aŵene ŵalukunsimicila neŵo. Mweŵo insiku syonse tamwalukuliumfwa-po isiwi lyaŵo, neli kuŵona nefumbi lyaŵo; 38kaŵili nemasiwi aŵo tamwakwete akwikala mumitima yenu; pakuti tamulukumucetekela uyo uyu ŵatumine.
39Mweŵo mulafwaya-fwaya mumalembo, pakuti mulukulaŋguluka ati muli o emuli neMweo uwamuyayaya; lomba ayo opele calukusimike'fyakuli neŵo; 40sombi tamulukufwaya ukwisa kuli neŵo ati mukaŵe neMweo. 41Neŵo nsipoka kuŵantunsi ukucindikwa, tau; 42sombi ndimwisini ati tamukwete uŵutemwe bwaŵaLesa mumitima yenu. 43Ndiisile neŵo mwisina lyaŵaTata; peŋka tamulukumpoka; sombi kani umbi akese mwisina lyakwe umwine, uyo eye mukapoka icine. 44Mweŵo mulukwisiŵa syani ukucetekela, mwemulukucindikansyanya; sombi uŵuleme uŵufumine kuli ŵaLesa aŵali ŵeŋka tamulukuŵupensela?
45Tekulukweŵa ati ŋkamusinineni kuli ŵaTata, koku: epwali uwakumusinineni, niMose, muli woyo wopele emo mupema; 46pakuti ŋga mwalukucetekela Mose, naneŵo ŋga mulukuncetekela; pakuti ye alilembele ifyakuli neŵo. 47Sombi kani tamulukucetekele'fyo ifi alembele, mbasyani muŋgacetekela amasiwi anji neŵo?
Айни замон обунашуда:
Yoane 5: AAL59
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Lamba Bible Version © United Bible Societies, 1959.