MARKUS 9
9
1Un dau Yesus laʹa: “Nawai tiga le ini. Un palai mikem dini, abeʹ lepe ikem ke matai kena hem ke taʹan puyan pengaren Allah nai luhaʹ ngan nyingan ne.”
Puyan pekaliu layen Yesus
(Un te neng Matius 17.1-13; Lukas 9.28-36)
2Nem tau ʹo ina, sulo tai Yesus ngkin Peterus, ngan Yakup, nan Yaya ngan ne. Tai re telu tengen le mukat ca mudung iaʹ mpau. Dalau re telu naʹat Yesus, tai pekaliu ne diseʹ layen ne, 3ngan gelam me puteʹ, ngan serema diseʹ e. Puteʹ e lapa ʹo puteʹ iaʹ dulu sukat uyan kusun tanaʹ ini. 4Sulo re telu diaʹ bayaʹ katuk Yesus didai taʹan Ilia ngan Musa petiraʹ ngan Yesus. 5Penco Peterus pisiu, un dau ue neng Yesus: “Amai, tiga ne ban telu petegoʹ kini. Ban ne ameʹ ubaʹ ke uyan telu re lepau, ca mikoʹ, ca me Musa, ngan ca me Ilia.” 6Tai bisau ne tekaʹ Peterus de telu, ina ukoʹ Peterus abeʹ un tisen tuman kenai isiu ue.
7Sulo nai ca abun mekep ngelingau ida mung, ngan un dau ca isiu nai cen abun ina, un dau ue: “Ini ne atek Anak keʹ, iaʹ pengemalaʹ keʹ. Ngeringa ne dau ue.” 8Kun nte naʹat pipa ida, bekaʹ abeʹ de taʹan aheʹ pe, bang Yesus tengen le iaʹ un ngan nte.
9Ngajan nte nai puno mudung, ina kun Yesus mulen ida telu man iaʹ pekini dau: “Puyan iaʹ ikem lepa taʹan ina are, ayen ncem peletoʹ badaʹ me aheʹ aheʹ kelunan kena ke nai Anak Sio ini numpak mudip cen patai ie.”
10Ida bayaʹ te dau Yesus. Un sepuʹo ida petiraʹ a neng ata re tengen, un dau re: “Inu sen isiu ‘numpak mudip cen patai’ ina taʹin?” 11Sulo re telu lemutu Yesus: “Moʹ inu diaʹ guru Adet Yahudi badaʹ atek Ilia iaʹ ading ke nai luhaʹ tupe?”
12Un dau Yesus mipa ida: “Lan te atek Ilia lete iaʹ ading nai, apan ne petenup ketoʹ inu. Kenuen pe pekina, un sepuʹo dau Kitap badaʹ Anak Sio ini ke sihoʹ tuyen bioʹ, ngan dulu ke pet te ʹo. Moʹ inu ue pekina dau baʹan ncem tupe? 13Akeʹ badaʹ mikem, lepa ne nai Ilia luhaʹ. Dulu lepa uyan pengubaʹ kimet de neng ia, bayaʹ ban tiraʹ Kitap iaʹ marung neng ia.”
Yesus paget ca anak iaʹ bali nelasek
(Un te neng Matius 17.14-21; Lukas 9.37-43a)
14Dalau kenai re telu abeʹ kukoʹ diaʹ kadoʹ ida diaʹ bayaʹ katuk Yesus dina are, kun nte taʹan ca mpun kelunan kadoʹ laʹa. Un pe diaʹ guru Adet Yahudi paseʹ dau ngan nte kina. 15Tecu re taʹan kenai Yesus, sulo tai re ngasa palaʹ ia ngan selama dau re. 16Sulo Yesus lemutu ida diaʹ bayaʹ katuk ke dina: “Moʹ inu hem paseʹ ngan nte tupe?”
17Nai ca laki cen ahang dulu kina, penco ho mipa Yesus, un dau ue: “Ahaʹ guru, nai heʹ ngkin anak laki heʹ palaʹ ikoʹ, ban bali nelasek ia, ngan ameng pe ia. 18Tegoʹ bali ina ngebaran neng ia, sulo ho lemintet ia kaʹ tanaʹ, ngan budaʹ paʹ a, ngan naret jipen ne, ngan keresen libut usa ha. Lepa ne akeʹ nyat ida diaʹ bayaʹ katuk koʹ pekarap bali ina, un sepuʹo abeʹ de senteng.”
19Sulo Yesus pisiu ida mung: “E ikem kelunan diaʹ abeʹ un un pengelan. Kudaʹ majan nceʹ ke pemung ngan ncem pa hem ke ngelan tupe? Kudaʹ majan nceʹ ke pedenaʹ ngan ncem? Nai ne ngkin anak ina palaʹ akeʹ.” 20Penco nai re ngkin ia palaʹ Yesus.
Dalau bali ina taʹan Yesus, penco ho ngebaran neng anak ina laʹa, ngan lemintet ia kaʹ tanaʹ, ngan diʹang diʹang kiseʹ e, mentung budaʹ paʹ a. 21Kun Yesus lemutu amai anak ina: “Kudaʹ majan ne seʹ e pekini?”
“Cen tading iʹut te,” kun dau ue. 22“Lemuto ho ten ke lematai ia, ngan lemitet ia neng luten, ngan tai petuhun kaʹ dalem sungai. Buk koʹ senteng, kudaʹ pe ikoʹ un saheʹ neng ameʹ, ngan mepo ameʹ ading.”
23Un dau Yesus: “Ahaʹ, un dau hoʹ neng akeʹ re: ‘Buk koʹ senteng.’ Moʹ abeʹ ketoʹ inu inu ne iaʹ atek senteng neng kelunan diaʹ un pengelan.”
24Sulo amai anak ina ngelengap, kun dau ue: “Atek ngelan te akeʹ. Kudaʹ pe ikoʹ mepo akeʹ neng pengetepa pengelan nceʹ.”
25Moʹ Yesus malap kelunan kadoʹ dina ke ngeseʹ ia, penco ho cuk bali jaʹat ina, kun dau ue: “E bali ameng ngan bali dengen, tai ne ikoʹ kelap cen anak ini. Ayen ncoʹ nai kedalem ia laʹa.” 26Penco bali ina ngelengap ngan bioʹ dau, ngan nyarem kuʹo kenai sepen anak ina laʹa. Sulo nai ie kawang kelap cen ia. Koʹ baʹan ca patai re seʹ anak ina, pa dulu kuma ha: “Seʹ e matai ne ini.” 27Kun Yesus ngkang ujoʹ anak ina, mentung nge meteʹ ia, sulo nai ie nekejeng.
28Lepa Yesus tai kedalem amin laʹa, kun nte telu diaʹ bayaʹ katuk ke nyelem nai lemutu ia, un dau re: “Moʹ inu meʹ supeʹ pet bali idai are tupe?”
29Un dau Yesus: “Ca naʹan ini. Bang temameʹ le iaʹ senteng pekarap bali iaʹ pekini. Diaʹ ca nyahut de sukat ne.”
Ca liwai laʹa Yesus badaʹ neng puyan ne ke matai
(Un te neng Matius 17.22-23; Lukas 9.43b-45)
30Puke ne ida telu, sulo tai re masat ngalang tanaʹ Galilia. Kimet Yesus abeʹ ubaʹ dulu diaʹ ca ke tisen kempi ukoʹ o, 31moʹ o ke pekatuk ida diaʹ bayaʹ katuk ke, un dau ue: “Anak Sio ini dulu ke dakep ngan naʹ ia me kelunan diaʹ ke lematai ia ʹo. Un sepuʹo neng iaʹ ketelu tau ue, ia kenai beteʹ numpak mudip laʹa.”
32Abeʹ de tisen pekimet sen katuk ina. Ngan laʹa takut pe ida lemutu ia neng idi.
Aheʹ iaʹ atek bioʹ
(Un te neng Matius 18.1-5; Lukas 9.46-48)
33Tai sabeʹ de kaʹ Kapernaum. Lepa tai re kedalem amin, kun Yesus lemutu diaʹ bayaʹ katuk ke dina, un dau ue: “Inu iaʹ ikem paseʹ kahang janan ida are tupe?”
34Abeʹ de mipa ia, uban kahang janan ida paseʹ neng ahang ida selepeʹ neng puyan aheʹ iaʹ ke bioʹ mida. 35Sulo Yesus madung ngan mengin diaʹ puloʹ dua usa diaʹ bayaʹ katuk ke. Un dau ue neng ida: “Aheʹ iaʹ ubaʹ ketai ading, tekep pe naʹ usa ha tahaʹ bayaʹ lan, ngan ngulaʹ usa ha neng dulu mung. 36Sulo Yesus alaʹ ca anak dumit, pejeng ia neng juma ida. Kun Yesus nyekapu anak ina, mentung nge pisiu ida: 37“Aheʹ iaʹ ke alaʹ ca anak dumit koʹ baʹan ini are ngan selama dalem ngadan nceʹ, seʹ e ke alaʹ akeʹ ngan selama lete ina. Ngan laʹa aheʹ iaʹ alaʹ akeʹ ngan selama, seʹ e ke alaʹ ngan nyelama ia iaʹ cuk akeʹ nai ina lete pe. Abeʹ e bang akeʹ tengen le.”
Iaʹ abeʹ un nyakat ilu, ia iaʹ pepo ngan le
(Un te neng Lukas 9.49-50)
38Un dau Yaya pisiu ngan Yesus: “Ahaʹ guru, lepa meʹ taʹan ca laki iaʹ pet bali dalem ngadan ncoʹ. Kun meʹ mulen ia, moʹ abeʹ e kahum neng mpun le dini.”
39Un dau Yesus: “Ayen mulen ia, ban kelunan iaʹ uyan puyan nyingan dalem ngadan nceʹ, abeʹ e senteng ke laho pejaʹat akeʹ. 40Kelunan aheʹ iaʹ abeʹ un nyakat ilu, ia lete iaʹ pepo ngan le. 41Nawai tiga le neng ini. Buk aheʹ iaʹ ke naʹ sungai ikem ke nisep ban ne ngimet ikem diaʹ mahu ngadan anun Keristus, kelunan ina, atek ke ke alaʹ bang nge lete.”
Pengeten ngkin penyalaʹ
(Un te neng Matius 18.6-9; Lukas 17.1-2)
42Un dau Yesus laʹa: “Un anak iʹut diaʹ ngelan akeʹ. Buk un aheʹ iaʹ ke peluʹap kimet te nai bayaʹ akeʹ, pulang tiga kelunan ina nelu ca lesung batu neng batuk ke, ngan lemenca ia kaʹ banget iaʹ dalem le. 43Tuman ina, buk ujoʹ kem iaʹ ke peluʹap kimet cem nai bayaʹ akeʹ, tiga hem netek ke. Pulang tiga hem tai kaʹ dalem udip surga abeʹ un ujoʹ ceng bese, neng ʹo dua re ujoʹ kem peging ngan usa hem ke sihoʹ ukum luten iaʹ are un tisen ketai pataʹ. 44Kina ulet da be un tei matei ngan luten be un tei pataʹ. 45Ngan laʹa buk taket cem iaʹ ke peluʹap kimet cem nai bayaʹ akeʹ, tiga hem netek ke. Pulang tiga hem tai kaʹ dalem udip surga abeʹ un taket ceng bese, neng ʹo dua re taket peging ngan usa hem ke sihoʹ ukum luten. 46Kina ulet da be un tei matei ngan luten be un tei pataʹ. 47Ngan laʹa buk mata hem iaʹ ke peluʹap kimet cem nai bayaʹ akeʹ, tiga hem miluk ke. Pulang tiga hem tisen puyan pengaren Allah ke ngaren ilu kelunan man mata hem ceng bese le, neng ʹo dua re mata hem peging ngan usa hem dulu ke pet kaʹ dalem ukum luten. 48Ban kina penuyen neng kelunan are un ketai nteng, koʹ baʹan dau ca isiu are, iaʹ pekini dau ue: ‘Tekaʹ kimet penawai ie pe abeʹ un ketai matai, ngan luten ne pe abeʹ un ketai pataʹ.’
49“Mung kelunan ke tisen pengeten koʹ baʹan puyan ca luten are, ngan pekina pe koʹ baʹan ca usen iaʹ ke ngeme lekai are. 50Usen ina tiga lete, un sepuʹo buk usen ina ketai jeling, kumpin le ngelaʹit te laʹa. Tiga hem alaʹ katuk ini, koʹ baʹan ca usen iaʹ un neng ahang ikem are. Ina te ikem ke un udip iaʹ tadan neng ahang ikem semaheʹ.”
Айни замон обунашуда:
MARKUS 9: KNT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.