Ad’u Tinda 6
6
Tchod’a hi sumid’a ti zul heî
1Ata yima suma nde zul yam andagad’a, a nga vut gro aropma mi na, 2Alona groma#6.2 Alona groma: Nala, Malaika suma a le tchod’ina, d’oze suma a kal yam ndrozinina. a we gro arop ndazina a djif irazi heî, a man suma a nde irazina, a vigiziya.
3Kayam ndata, Ma didina mi dala: An mba ni ar Muzuk mana mba mi kak ki sana gak didin ndi; kayam mam mi sana mba mi mid’a, mba mi le bizad’a ni kis yam dok mbà.
4Kur bur máma suma fuyogeina a nga yam andagad’a tua, ata yima Alona groma a mba a zlap ki gro aropmina, a vut grona; azi ni suma ad’eng suma a nga adjeuna, ni suma simiyêzi nde yina heîna.
5Ata yima Ma didina mi we tchod’a hi suma nga d’i i avogovok djib’er mazid’a burâ pet ni yam tcho d’a led’ina, 6mi mbut hat hurum yam le d’a mi le sana yam andagad’id’a. Kayam ndata, hurum zal ngola, 7mi de kurum ala: An mba ni dap ahle suma an lazi yam andagad’ina woyo, nala, suma, azureina, ambureina, ahle suma a dram kä na kaluweina, kayam an hurun hat ngola yam le d’a an lazid’a. 8Wani Noe ni sama djivina avok Ma didina.
Noe mi min batod’a
9Wana ni zla d’a ded’a yam Noe-d’a: Noe ni sama d’ingêr ma d’engzengâ avok Alona, mi tit zlapa kAlona. 10Mi vut grona hindi, nala, Sem, Ham ki Jafet.
11Alona mi we suma yam andagad’ina a mbut vama b’laka avoromu, arî asa’at ta led’a sasak, 12mi wazi a mbut vama b’laka, kayam azi pet a we nga lovot ta a tit kua yam andagad’id’a d’i.
13Alona mi de mi Noe ala: An min dap suma woyo; ni kayam asa’at mazid’a ba, andagad’a mbut vama b’laka, an nga ni b’lagazi woi zlapa kandagad’a. 14Ang min bato d’a ngola kagu goferâ, ang kat hurut teteng, ang gulud’ut hurut ki huyogot ki dubangâ. 15Ang lat fiyagat metred’a kis yam dok vahl, bubuwat metred’a dok mbà yam vahl, fiyagat ta akulod’a metred’a dogo yam vahl mi. 16Ang le fenetred’a kä ad’u azid’a yam batod’a adigazi ki d’a akulod’a go ki nus metred’a, ang ar vun ma kala huyok batod’a, ang minit akulo yam ndrata hurut hindi.
17Mi dum kua ala: An nga ni kus mbina yam andagad’a á b’lak ahle suma ari suma yam andagad’ina woi pet; ahle suma yam andagad’ina pet a mba bo woyo, 18wani an mba ni djin vunan ki sed’engû. Ang mba kal kur batod’a kamanga ki grongâ kamiyôzina. 19Ang yo ahle suma arina ad’u andjavazi kakapa tutu pet, mandjufâ katchad’a, kayam a kak karid’a zlapa ki sed’engû, 20aluweina kandjavaziya, d’uwarâ kandjavamu, ahle suma dram kä na kandjavaziya, andjaf ahle suma lara ge pet mbàmbà ang tchuguzi geveng kayam a sud’a. 21Wani ang yo ahle suma te suma lara ge pet ad’ungû, te mangâ ki te mazina mi.
22 Noe mi lahlena pet d’igi Alona mi hum vuna na.
Айни замон обунашуда:
Ad’u Tinda 6: BA
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.