Ad’u Tinda 16
16
Agar ti vut Ismael
1Sarai atchad’a hi Abram-mba ti vud’um nga gor ri, wani ndat nga ki magom mba Ezipte d’a a yat ala Agar-ra. 2Sarai ti de mi ndjuvut Abram ala: Ang gola, Ma didina mi d’elen bei vuta; ang ve magom manda, dam an mba ni fe gor atat kla. Abram mi hum vun Sarai.
3Ata yi máma Sarai ti ve magom mata Agar, ti hat mi ndjuvut Abram atchad’a. Ni d’igi Abram mi le wa bizad’a dogo yam ambas sa Kanan-nda da’. 4Abram mi zlap ki Agar, ndat ti ve wirâ. Kid’a ndat ti wala ti ve wa wirâ dad’a, ti gol salata is.
5Sarai ti de mi Abram ala: Ang ngulun ihî ni angû; ni an ba ni hang magom manda ini ni anu. Kid’a ndat ti wala ndat ti ve we wirâ dad’a, ti nde golon is. Ar Ma didina mi kei sariya meid’a ni mamu.
6Abram mi de mi Sarai ala: Gol magom maka abok wana; ndak lat vama huruk minima. Sarai ti le Agar ndaka ngola, gak ti ring abot abageya.
7Malaikana hi Ma didina mi fat avun mbiyo ma laud’a kur lovot ta i yam ambas sa Sur-rid’a. 8Mi djobot ala: Agar, magomba hi Sarai-d’a, ndak tcholï ni lara ge? Ndak i ni lara ge?
Ti hulong dum ala: An ringî abo salanda Sarai.
9Malaikana hi Ma didinina mi hulong dat ala: Ndak hulong gen salaka, ndak ge yak kä ad’ud’u. 10An mba ni zuluk andjavak ablaud’a; sama ndak á ndumuma nga d’i. 11Gola! Nda’î wirâ, ndak mba d’i vut gorâ, ndak mba d’i yum ala Ismael, kayam Ma didina mi hum tchi mak ma hohoud’a. 12Goro’â mba mi mbut ni d’igi koro ma abageina na; mba mi dur ayîna ki suma pet, suma pet a mba dur ayîna ki sed’em mi; mam mba mi ka’î vam tu woi dei ki b’oziyoma pet.
13Agar ri djop tat ala: Gagazi, na ni an we ni Mam ma nga mi wana zu? Ti yi simiyê Ma didin ma dat zlad’ina ala Angî El-Royi, Alo ma nga mi wana. 14Kayam ndata, a nga yi golong nga nga aduk Kades ki Beret-ta ala Golonga hi Lahai-Royi-d’a#16.14 Golonga hi Lahai-Royi-d’a: Nala, Golonga hi Ma ari ma wanid’a..
15Agar ti vut gorâ, abum Abram mi yum ala Ismael. 16Abram bizamî dok klavandi yam karagaya tua ba, Agar ti vud’um Ismael.
Айни замон обунашуда:
Ad’u Tinda 16: BA
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.