Ad’u Tinda 12
12
ABRAHAM
(12.1—25.18)
Alona mi yi Abram
1Ma didina mi de mi Abram#12.1 Abram: Ki vun Hebre-na nala, Abu d’a Subura. ala: Ang nde woi kur andaga manga, ang nde woi aduk simiyêngû, ang nde woi kur azina habungâ, ang i kur andaga d’a an mba ni tagangzid’a. 2An mba ni zulung andjavang ngola, an mba ni b’e vunan kangû, simiyêng mba mi yï ngola; ang mba arî sedeî b’e vuna. 3An mba ni b’e vunan yam suma yam andagad’ina pet ni kang angû; suma a mba b’e vunazi kangâ, an mba ni b’e vunan kaziya; suma a mba gang vunina, an mba ni gazi vuna mi.
Abram i yam andaga d’a Kanan-nda
4Abram mi i d’igi Ma didina mi dum na; Lot mi i ki sed’em mi. Ata yima Abram mi ar ambas sa Haran-ndina, bizamî dok kid’iziya yam vahl. 5Abram mi vamamba Sarai ki wiyema goroma Lot ki bege mazid’a pet ki magumei suma azi guzuzi avo Haran-na. Azi i yam andaga d’a Kanan-nda.
Kid’a azi mbaza yam ambas sa Kanan-ndid’a, 6Abram azi kal gak a i yam andaga d’a Sikem-mba gak ad’u agu ma More ma a nga ngal ahle suma ngat buzuna ad’uma. Ata yi máma suma Kanan-na a nga kaka yam ambas ndata.
7Ma didina mi nde tam mbei ir Abram, mi dum ala: An mba ni handaga ndata mi grong ngolona. Kayam ndata, Abram mi min yima ngal ahle suma ngat buzuna mi Ma didin ma nde tam mbei irama. 8Bugola, mi tcholï kolâ, mi mba yam ahuniyô suma Betel-lâ abo ma yorogona, mi ve zlub’u mamba ata yi máma aduk Betel ki Aï, Betel abo ma fladegena, Aï abo ma yorogona mi, mi min yima ngal ahle suma ngat buzuna mi Ma didina, mi tchen ki simiyêm mi. 9Bugola, Abram mi mber mi i iram abo ma Negef-fâ#12.9 Negef: Nala, abo ma sutna hi Israel-lâ..
Abram i yam andaga d’a Ezipte-d’a
10Baktarad’a nde yam andaga d’a Kanan ndata. Abram mi i mbeid’a yam ambas sa Ezipte-d’a á kak sä kua ndjö, kayam baktarad’a nga kur andaga ndata ngola heî. 11Ata yima azi mbaza go á kal avo Ezipte-na, Abram mi de mamamba Sarai ala: An we nda’î atcha d’a djifâ; 12fata Ezipte-na a mba waka, a mba dala nda’î amanda, azi mba tchanu, a mba arak ndagu. 13An nga ni dagu, ndak dazi ala nda’î wiyenda, kayam azi lan djivid’a kagu. Hina wani, azi mba aran bei tchid’a kagu.
14Kid’a Abram mbaza avo Ezipte-d’a, Ezipte-na a wamamba ti djif heî. 15Suma nglo suma sunda hamulâ Faron-na a wad’u, a yorot zlat avoromu, a vat it avo hatamu. 16Ni kat ba mi le Abram djivid’a, mi hum aho’â kamuzleina, azungeîna ki yuguneina, koro ma andjofâ ki korod’a aropma ki djambala mi. 17Wani Ma didina mi tum Faron ki suma avo hatama kandjaf tugud’eid’a teteng, kayam mi ve Sarai atchad’a hi Abram-mba.
18Wani Faron mi yi Abram, mi dum ala: Ang lan ni me na ge? Ni kayam me ba, ang dan ala namanga d’uo ge? 19Ni kayam me ba, ang dan ala ni wiyenga ge? Ni kayam ndata ba, an vad’u; ki tchetchemba amanga wana, ang vad’u, ang iya.
20Faron mi he vuna mi sum mama ala a dik Abram kamamba kahle mama pet woi kur ambas sa Ezipte-d’a.
Айни замон обунашуда:
Ad’u Tinda 12: BA
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.