Mateo 2
2
Jesure Do'i Daise'e
1Judea yejana Jesús co̱asiquë paji'i, a'ri daripë Belén huë'e daripëna. Ja̱ mu'seña Herodes paji'i, Pa̱i Ëjaë, ja̱ yeja cua̱ñequë. Ja̱ mu'seña Jerusalénpi daë'ë, ë̱së mëi te̱'tepi, yequë ë̱mëohua'i Magos hue'ecohua'ipi. Ja̱ohua'i cato pairiohua'i paë'ë, ë̱së mëi te̱'te quë'ro acohua'i. Ma'ñoco yo'oye ye'yecohua'ipi cui'ne de'hue ta̱'ñe cacohua'i paë'ë, i̱ti yo'oyere ñajë. 2Ja̱ohua'ipi dani se̱i'ë: “¿Jerore pa'iquë'ni, judío pa̱i Ëjaë yure co̱asiquë? Jeto ë̱së mëi te̱'tepi ñahuë, i̱ ma'ñocore. Ja̱je ñani daë'ë, i̱te do're ja'rujë se̱ñu'u cajë i̱ñona.”
3Cajëna, pa̱i ëjaë Herodes asani ai cuasapi, ¿me yo'ose'ere caye'ni? caquë, cui'ne si'a Jerusalén pa'icohua'i ai cuasahuë, i̱tire asani. 4Ja̱ maca pa̱i ëjaë si'aohua'ire soipi, Maija'quë huë'e ñacaicohua'i ëjaohua'ire cui'ne cua̱ñese'e pa̱ire ye'yacohua'ire. Soini se̱ni asapi, ja̱ohua'ire, ¿jerona Cristore co̱a ja̱'ñe ca nëose'e pa'iquë'ni? caquë. 5Caquëna, ja̱ohua'ipi cahuë, i̱te: Belén Judea yejana co̱aja'quë api, caquë. Maija'quë jëjo daoquë tsoe aquë toyapi, ñeje:
6Belén maca, Judá yeja pa'ico.
Më'ëre cua̱ñecohua'i jerepa a'rico maca pa'ima'o pa'iyë, më'ë.
Ja̱je pa'ina, më'ëpi etaja̱'quë api, Ëjaërepa, Israel pa̱ire ñacaija̱'quë.
7Cajëna, asani ja̱ maca Herodes Magos hua'ire yahuerepa soini i̱ohua'ise'ere se̱ji'i, ¿je yëhua ma'ñoco ñaina, ñare'ni? caquë. 8Se̱ni asani ja̱ maca Belénna ja̱ohua'ire jëjo saoquë capi: “Saijë̱'ë. Ja̱rona sani asajë̱'ë, de'oyerepa tsihua'ë pa'iyere pa'ire pama'quë. Ja̱je i̱ni ti̱'asicohua'i pani yë'ëre dani quëajë̱'ë. Yë'ëje̱ sani do're ja'ruquë se̱jasi'i, i̱te.”
9Ja̱je pa̱i ëjaë caëna, Magos maña saë'ë. Saijëna, ma'ñoco i̱ohua'i ë̱së mëi te̱'te ñasiquëpi du'ru sai sapi. Ja̱je saiquëpi tsihua'ë pa'i hue̱'ñana nëajani huesëpi, sa tëjini. 10Ja̱ maca Magos maña ma'ñocopi ja̱je yo'ouna, ñani ai sihuahuë. 11Sihuajë huë'ena sa cacajë ñahuë, tsi̱tu'ure pëca ja'co María ja̱'re u̱ina. Ñani do're ja'runi tsihua'ëre de'oquë macani cajë sihuahuë. Ja̱ jeteyo'je i̱ohua'i mahuëa mañare hui'yoni oro, huëo së̱ñe cui'ne mirra i̱te i̱sihuë, jai do'ire. 12Ja̱ jeteyo'je Maija'quëpi huëo hue̱'ñaja'a quëapi, Herodes quë'ro co'ima'pë pa'ijë̱'ë, caquë. Ja̱je quëaëna, yequë ma'aja'a co'ihuë, i̱ohua'i yejana.
Egíptona Catise'e
13Ja̱ohua'i Magos saisi jeteyo'je Ëjaë hui̱ñaëpi huëo hue̱'ñaja'a ñani Josére capi: “Huëni tsihua'ëre cui'ne pëca ja'core sai sajë̱'ë, Egípto yejana. Ja̱rona sani pëajë̱'ë, yë'ëpi yeque yo'oye pa'ito caëna, yo'oja̱'quë. Yure cato Herodespi tsihua'ëre huani je̱osi'i caquë co'eja̱'quë api. Ja̱ do'ire saijë̱'ë.”
14Ja̱je caëna, José huëni tsihua'ëre cui'ne i̱ pëca ja'core sëtoni ñami sai sapi, Egíptona. 15Ja̱rote paë'ë, Herodes ju̱'i macaja̱'a. Tsoe aquë Maija'quëre quëacaiquëpi Ëjaëpi caquëna, toyapi: “Egíptopi yë'ë mamaquëre soihuë” ja̱ toyase'epi ti̱'aëna, ja̱je yo'ohuë.
Tsi̱re Huaise'e
16Ja̱ maca Herodes, Magos hua'i yë'ëre co'aquë api cajë yo'ore caquë ai pë̱i tsi̱re caya o̱metëca pacohua'ire cui'ne ai tsi̱tu̱'ñare huani je̱ajë'ë, cua̱ñepi. Belén pa'icohua'ire, cui'ne i̱ti yërëhue pa'icohua'ireje̱ caquë, caya o̱metëca ma'ñoco pa'i huëose'e pa'iji, Israel pa̱i ta̱'ñe pa'iohua'i case'ere cuasaquë ja̱je yo'opi. 17Ja̱je yo'oquëna, ti̱'api, Maija'quëre quëacaiquë Jeremias ñeje toyaquë pa'ise'e.
18Rama quë'ropi, cuiye cui'ne jaiye oi yë'o jutaquëna asahuë.
Ja̱o cato Raquelpi mamajëni oco'ë.
Yëhuotoje̱ asaye coeo,
Mamajëpi tsoe ju̱jusicohua'i pa'ijëna.
19Herodes ju̱'isi jeteyo'je, Ëjaë hui̱ñaëpi Josére huëo hue̱'ñaja'a ñaini capi, Egíptore pa'ina:
20“Huëni tsihua'ëre më'ëpi co̱ani, cui'ne pëca ja'core huëoni co'ijë̱'ë, Israel yejana. Tsoe tsihua'ëre huajo yëjë pa'isicohua'i ju̱ju sahuë.”
21Ja̱ maca José huëni tsihuaëre cui'ne pëca ja'core sai sapi, Israel yejana. 22Ja̱je saiquëta'a José asapi, Herodes mamaquë Arquelaopi pëca ja'quë yo'ora'ase'ere yo'oji cajëna. Ja̱je asani ja̱ro saiye ca'raquëna, huëo hue̱'ñaja'a Maija'quëpi quëaëna, Galilea yeja quë'rona saji'i. 23Ja̱rona ti̱'ani Nazaret huë'e daripëna pëapi. Ja̱je yo'oquëna, Maija'quëre quëacaicohua'i ca nëojë pa'ise'e ti̱'api, “Jesús Nazareno pa'ija̱'quë api” case'e.
Айни замон обунашуда:
Mateo 2: sey
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.