GENESA 5
5
Rixaka ra Seta ku fika ka Nowa.
1Buku ya vatukulu va Adamu hi yoleyi: Siku Xikwembu xi vumbaka munhu, xi n'wi endla la fanaka ni Xikwembu. 2Xi va vumba wanuna ni wansati, kutani xi va katekisa, xi va thya vito ra vanhu, hi siku va vumbiweke ha rona. 3Adamu a hanya malembe ya 130, kutani a kuma n'wana la fanaka na yena, a ri ni nghohe ya yena, a n'wi thya vito va Seta. 4Kuteloko Adamu a kumile Seta, a hanya malembe ya 800, kutani a tswala vana va vavanuna ni va vavasati. 5Masiku hinkwawo lawa Adamu a hanyeke ha wona a ma ri malembe ya 930, kutani a fa.
6Seta, kuteloko a ri munhu wa malembe ya 105, a kuma Enosi; 7kuteloko a kumile Enosi, a hanya malembe ya 807; kutani a tswala vana va vavanuna ni va vavasati. 8Masiku hinkwawo ya Seta a ma ri malembe ya 912; kutani a fa.
9Enosi a hanya malembe ya 90 kutani a kuma Kenani; 10kuteloko a kume Kenani, a hanya malembe ya 815, kutani a tswala vana va vavanuna ni va vavasati. 11Masiku hinkwawo ya Enosi a ma ri malembe ya 905; kutani a fa.
12Kenani a hanya malembe ya 70, kutani a kuma Mahalalele; 13kuteloko a kume Mahalalele, a hanya malembe ya 840, kutani a tswala vana va vavanuna ni va vavasati. 14Masiku hinkwawo ya Kenani a ma ri malembe ya 910; kutani a fa.
15Mahalalele a hanya malembe ya 65, kutani a kuma Yarede; 16kuteloko a kume Yarede, a hanya malembe ya 830, kutani a tswala vana va vavanuna ni va vavasati. 17Masiku hinkwawo ya Mahalalele a ma ri malembe ya 895, kutani a fa.
18Yarede, loko a ri munhu wa malembe ya 162, a kuma Enoko: 19kuteloko a kume Enoko, a hanya malembe ya 800, kutani a tswala vana va vavanuna ni va vavasati. 20Masiku hinkwawo ya Yarede a ma ri malembe ya 962, kutani a fa.
21Enoko, loko a ri munhu wa malembe ya 65, a kuma Metuxela: 22kuteloko a kume Metuxela, a famba na Xikwembu hi malembe ya madzana manharhu, a tswala vana va vavanuna ni va vavasati. 23Masiku hinkwawo ya Enoko a ma ri malembe ya 365. 24Enoko a tshama a famba ni Xikwembu, kutani a nga ha vanga kona, hikuva Xikwembu xi n'wi tekile.
25Metuxela, loko a ri munhu wa malembe ya 187, a kuma Lameke; 26kuteloko a kume Lameke, a hanya malembe ya 782, kutani a tswala vana va vavanuna ni va vavasati. 27Masiku hinkwawo ya Metuxela a ma ri malembe ya 969; kutani a fa. 28Lameke, loko a ri munhu wa malembe ya 182, a kuma n'wana wa wanuna, 29kutani a n'wi thya vito ra Nowa (ku wisa), a ku: “Yeloyi u ta hi wisisa emikarhalweni ya hina, ni le ntirhweni lowo tika wa mavoko ya hina, lowu pfuxiweke hikwalaho ka ku rhuketeriwa ka misava hi Yehovha.” 30Kuteloko Lameke a kume Nowa, a hanya malembe ya 595, kutani a tswala vana va vavanuna ni va vavasati. 31Masiku hinkwawo ya Lameke a ma ri malembe ya 777; kutani a fa. 32Nowa, loko a ri munhu wa malembe ya ntlhanu wa madzana, a kuma Xeme na Hamu na Yafeta.
Айни замон обунашуда:
GENESA 5: TSO29
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.