San Mateo 4
4
Lëë xaatox chuñ Jesús preb
(Mr. 1:12‑13; Lc. 4:1‑13)
1Loxsye kwchobnis Jesús, lëë Kyalbini Ntson kuni xaa tañ pidzy par kuñ xaatox xaa preb.
2Ni tu pe tawdy Jesús lo choow kpidz ni choow kyool nii kwyo xaa tañ pidzy ko. Por ngo, tsiñee lëë xaa kwlaañ, 3lëë xaatox kwey lo xaa chëb:
—Deelñee nli Xiñ Dios nakoo, kwnabey nii kyak kyo nii nche ske kyaxtily.
4Per lëë Jesús chëb:
—Leñ kitsy nii kë xtiits Dios xñee: “Lëdy nonsy kyaxtily kaw meñ parñee kpañ meñ, sink no nii kuuñtsyey meñ kchë nii xñabey Dios.”
5Loxsye ngo lëë xaatox kuni xaa leñ kyedzy Jerusalén, aan lëë xaatox blëëp xaa kik lidzy Dios laañee mastre klaa, 6ni lëë xaatox chëb lo xaa:
—Deel nli Xiñ Dios nakoo, kwyas nu aan byab lyu, por leñ xkitsy Dios xñee:
Lëë Dios kxaal xangly kakni lii.
Lëë angly kñaasy lii con ña xaa,
parñee lasty kyo niyoo.
7Tsigo lëë Jesús chëb:
—Leñ xkitsyak Dios xñee: “Kuñdyoo Dios nii xñabey lii preb.”
8Lëë lultime lëë xaatox kuni Jesús tu kik kiy nii per nli busy klaa, aan lëë xaatox bluuy kchësy kyedzy nii nche lo kislyu ni kchësy cos non nii no low, 9aan lëë xaatox chëb lo Jesús:
—Snetsyaa kchësyo lool deelñee soxiboo lon.
10Lëë Jesús chëb:
—Bichee nu, xaatox, por leñ kitsy nii kë xtiits Dios xñee: “Psoxib lo Dios nii xñabey lii ni xtiits sye xaa psoob.”
11Tsigo lëë xaatox psaan Jesús aan lëë xangly Dios kuni nii taw xaa.
Lëë Jesús xluuy xtiits Dios Galilea
(Mr. 1:14‑15; Lc. 4:14‑15)
12Tsiñee biñ Jesús nii lëë Juan no skiib, lëë xaa kwseñ nëz, lëë xaa si nëz Galilea. 13Per byodre xaa leñ kyedzy Nazaret, sink lëë xaa kwtedyso tu kyedzy nii lë Capernaum nii nche chu nistoo Galilea. Kexka siko nak xtañ meñ Zabulón ni xtañ meñ Neftalí. 14Kchësy nrii kok parñee kak cumplir nii kwnee profet Isaías tsiñee chëb xaa:
15Xtañ meñ Zabulón ni xtañ meñ Neftalí,
kyedzy nii nche stublad chu kiigwpee Jordán,
kexka chu nistoo Galilea, laañee no meñ sit.
16Lo nguey mbañ meñ go,
per lëë meñ go kon tu bini ngol.
Lëë nguialkuty xñabey lo meñ go,
per lëë bini go psaani lo meñ go.
17Destye wor go lëë Jesús bislo xñee lo meñ:
—Kol ktikche styoo do lo Dios, por lëë wor kutsiñ nii lëë xaa kñabey.
Lëë Jesús xkwetsy tap ngoosy mël
(Mr. 1:16‑20; Lc. 5:1‑11)
18Tu tse lëë Jesús sitedy chu nistoo Galilea, tsiñee lëë xaa kon chop ngoosy mël nii nche kchon xkyex lo nis. Chop betsy nak xaa. Tu xaa lë Simoñ Pedre, lëë stu xaa lë Ndresy. 19Aan lëë Jesús chëb lo xaa:
—Kol tënal naa parñee jkoostre to mël, sink lëën kluy lo do xa kluuy do xtitsaa lo meñ.
20Wor go kazh nche gak xkyex xaa, lëë xaa sinal Jesús.
21Sijtyak kwsë Jesús, lëë xaa kon schop ngoosy mël. Tu xaa lë Jacob, lëë stu xaa lë Juan. Xiñ Zebedeo nak xaa chop xaa. Lëë xaa no jkëtë xkyex xaa leñ tu barkw ksa xaa pxosy xaa. Lëë Jesús kwtsyetsy xaa, 22aan wor go kazh lëë xaa psaan pxosy xaa leñ barkw. Lëë xaa sinal Jesús.
Lëë Jesús chuuñ kyak meñ
(Lc. 6:17‑19)
23Kunsë Jesús tyub xtañ meñ Galilea, aan kchë leñ ktoo nii kwey xaa bluuy xaa xa nak xkyalwnabey Dios lo meñ, ni beeñ kyak xaa meñ xsyaknë. 24Tyub nëz Siria biñ meñ nii chuuñtsyey Jesús. Por ngo nii kchëlo meñ xsyaknë kwey lo Jesús. Kwey meñ nii no kyalbini mal leñ styoo, ni meñ nii chak wety, ni meñ nii kutoo lady, aan kchësy meñ xsyaknë go beeñ kyak Jesús. 25Ndaly meñ Galilea, ni meñ Decápolis, ni ndaly meñ Jerusalén, ni meñ Judea, ni meñ nii ncheno stublad chu kiigwpee Jordán kunal Jesús.
Айни замон обунашуда:
San Mateo 4: ztq
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.