Génesis 8
8
Parapa usyaramusqanmanta
1Diosmi qawarirqa Noeyta chaynallataq paywan kuska arcapi kaq llapallan animalkunatapas, hinaspam kay pachata sinchi wayrawan pukuchimurqa, chaymi yakukuna asllayayta qallaykurqa. 2Lamar qochamanta lloqsimuq yakukunapas takyaramurqam, allpa ukumanta toqyamuq yakukunapas wichqakururqam, cielomanta paqchamuq yakukunapas taniramurqam. 3Chaymi kay pachapi yakukuna allimanta asllayarqa, pachak pichqa chunka punchawpi chakinankama, 4Hinaptinmi arca takyarurqa Ararat orqopi, qanchis kaq killapa chunka qanchisniyuq punchawninpi. 5Yakukunapa chakisqanman hinam, chunka kaq killapa qallariyninpi orqokunapa puntankunapas rikukuyta qallaykurqa.
6Tawa chunka punchawmantam arcapa ventananta Noé kicharurqa. 7Hinaspanmi ullachkuta kacharirqa, chay ullachkum kayman chayman pawaykacharqa kay pachapi yaku chakinankama. 8Chaymantam palomatañataq kacharirqa kay pachapi yakukuna asllayasqanta yachananpaq. 9Chay palomam tiyaykunanpaq mana maypi chaki allpata tarispa arcaman kutiramurqa, hinaptinmi Noeyqa makinta haywariykuspa arcaman kutiykachirqa.
10Qanchis punchawtawanraq suyaykuspanmi kaqllamanta chay palomata kacharirqa. 11Hinaptinmi chay paloma yaqa tardeykuqtaña kutiramurqa aceitunas sachapa rapinta piconpi apakusqa. Chaywanmi Noé yacharurqa kay pachapi yakukuna chakirusqantaña. 12Qanchis punchawtawanraq suyaykuspanmi kaqllamanta chay palomata kacharirqa, hinaptinmi chay palomaqa manaña kutimurqañachu.
13Soqta pachak hukniyuq watanpi Noé kachkaptinmi, punta kaq killapa qallariynin punchawpi yakukuna chakirurqa. Chay punchawmi arcapa qatanta Noé kichaykuspa qawaykacharikurqa hinaptinmi allpaqa chakiña kachkasqa. 14Iskay kaq killapa iskay chunka qanchisniyuq punchawninpim kay pachaqa pasaypaqtaña chakirurqa. 15Chaymi Noeyta Dios nirqa:
16Arcamanta lloqsiy, lloqsichuntaq warmikipas, churikikunapas chaynataq llumchuynikikunapas. 17Hurqoytaq qanwan kuska kaq alton pawaq animalkunatapas, uywa animalkunatapas, purun animalkunatapas chaynataq qasqonpa puriq animalkunatapas; chaynapi sinchita miraspa kay pachaman huntachunku, nispa.
18Chaymi Noé lloqsirqa warmintin chaynataq churinkunapas warmintinkama. 19Llapallan animalkunapas, qasqonpa puriq animalkuna, alton pawaq animalkuna, uywa animalkuna hinaspa purun animalkunapas castanman hinam lloqsirqaku. 20Chaymantam huk altarta Tayta Diospaq Noé ruwapurqa, hinaspam sacrificanapaq kaq llapallan animalmanta, pawaq animalkunamanta chaynataq pampan puriqkunamantapas wañuchispa lliw kañana ofrendata Diosman chay altarpi ofrecerqa. 21Chaymi Tayta Dios sacrificiopa miskillaña asnariyninta chaskiykuspan sonqonpi nirqa:
Kunanmantaqa manañam runakunapa huchanmanta kay pachata ñakasaqñachu. Runaqa warma kasqanmantapas mana allinkunalla ruway munaqmi. Kayna puchukachisqayta hinaqa manañam huktawanqa lliw unanchasqaykunataqa puchukachisaqñachu.
22Kay pacha kanankamaqa kanqam
tarpuypas cosechapas, chiripas rupaypas, poqoypas chirawpas, punchawpas tutapas, nispa.
Айни замон обунашуда:
Génesis 8: RCHQ2
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012