اِنجیل مَتّی 5
5
کوه سَری موعظۀ
1وختی عیسی اَ جَماعتی ویندِشه، پِشَه ایلَه کوه سَری کا و اوآ کا نِشتَه. اَ موقع چَیی شاگِردِن اومینَه چَیی وَر. 2عیسی دَمنده اَوون تعلیم دوعِه و واتِشه:
3«خَسَه بِبو کسونی که بَزنین که روح کا فَقیری نَه،
چوم آسِمونی پاُتشایی
چَوون شِنَه.
4خَسَه بِبو کسونی که ماتم دارِن،
چوم اَوِن تَسلی بَگتین.
5خَسه بِبو کسونی که فروتنی نَه،
چوم اَوِن زمینی
بِه اِرث بَبَردین.
6خَسَه بِبو کسونی که
صالِح بییِه را وِشی و تِشی اینَه،
چوم اَوِن سیر آبون.
7خَسَه بِبو کسونی که رَحیمی نَه،
چوم اَوون رَحم بَبی.
8خَسَه بِبو کسونی که دیل پاکی نَه،
چوم اَوِن خِدا بَویندین.
9خَسَه بِبو کسونی که صلح برقرار بَکَردین،
چوم اَوون نَه خِدا خِردَنون
بَواتین.
10خَسَه بِبو کسونی که صالح بییِه واسی اَذییت آزار بَبین،
چوم آسِمونی پاُتشایی چَوون شِنَه.
11«خَسَه شِمَه بِبو، وختی چِمِن واسی مردم، شِمَه فَش بِدَن و اَذیت آزار بِکَرن و هَر جورَه بَدَه گفی شِمَه ضِد دوروع نَه بوآجِن. 12خوش بِبییَه و شادی بِکَرَه، چوم شِمَه پاداش آسِمونی کا یالَ. چوم پیغمبرونی که پیش اَز شِمَه بینَه نی هِنتَه اَذیت آزار کَردِشونَه.
نور و نِمِک
13«شِمَه دنیا نِمِکی رونَه. امّا اَگم نِمِک اِشتَن مَزه از دَس بِدَه چِنتَه بَبی هَنی اَیی سور آکَردِه؟ دِ مَصرفی نیشَه، غِیر از اِم که اَیی فِر آدَن و مردمی پا بِنون کا بومونَه.
14«شِمَه دنیا نوری رونَه. ایلَه شهری که ایلَه کوه سَری کا بینا بییَه، نییَب نِین آکَردِه. 15هیچکس نی چِرا روشون آنِکَرِه که چَیی سَری کا سَرپوش پِنَه، بَلكَم اَیی چِرا پوعَه سَری کا بَنای تا چَیی نور گِردِ کسونی را دَتاوِه که کَ دیلَه کا اینَه. 16اِنتَه نی بِدارَه شِمَه نور مردمی چِمی پیشی کا شَفق بِژَنَه تا شِمَه چاکَ كارون بِوینن و شِمَه آسِمونی یَه دَده، سِتایش بِکَرِن.
شریعت
17«فیکر مَکَرَه اَز اومَیمَه که تورات و پیغمبرون نیویشتَه اون باطل آکَرِم؛ اومَه نیمَه که اَوون باطل آکَرِم، بَلکَم اومَیمَه تا اَوون تمام کمال اَنجام بِدَم. 18چوم که حقیقتن شِمَه نَه بَواتیم، تا وختی که آسِمون و زمین از بِین مَشون، ایلَه نقطه یا ایلَه همزه ای توراتی کا از بِین نِشو، تا گِردِ اَوِن اِتِفاق دَلَکِن. 19بَس هَر کسی که شریعتی ایلَه روکَه گِله اَحکامی، کم اَهمیت بِزونَه و خَلکی نی باموجِه که هِم کاری بِکَرِن، آسِمونی پاُتشایی کا، روکه گِلَه بِه حساب بومَی. امّا هَر کسی شریعتی اَحکامی اَنجام بِدَه و اَوون خَلکی باموجِه، اَ آسِمونی پاُتشایی کا یال حساب بومَی. 20چوم شِمَه نَه بَواتیم، تا شِمَه صالِح بییِه کا، توراتی معلمون و فریسیون فِرقه عُلما کا پیش مَدَلکَه، هرگز آسِمونی پاُتشایی دیلَه نِدَشه.
خشم
21«دَرَسَرونَه که قدیمی یَه مردمی نَه واتَشونَه: ”قتل مَکَه و هَر کسی که قتل بِکَرِه، قتلی جُرمی واسی محاکمه بَبی.“ 22امّا از شِمَه نَه بَواتیم، هَر کسی اِشتَن بِرا را عصبانی آبو، محاکمه بَبی؛ و هَر کسی اِشتَن بِرا اِهانت بِکَرِه، شورا وَری کا محاکمه بَبی و هَر کس اِشتَن بِرا نَه اَحمق بوآجِه، چَیی جَزا جَهندمی آتشَه. 23بَس اَگم وختی که اِشتِه هدیه قِربونگاه کا تقدیم خِدا بَکَردیش، اوآکا ویر بواَری که اِشتِه بِرا تِه کا دیلخورَه، 24اِشتِه هدیه قِربونگاه ناری کا وِل آکَه، اوّل بِش اِشتِه بِرانَه اَ مسئله حَل بِکَه، دومله بِری اِشتِه هِدیه تقدیم بِکَه. 25اَگم کسی بَه تِه کا شِکایت بَکَردی و تِه بَبَردی بِه محکمه، تا حَلا محکمه راه کاایش، اَلبَحَل اَیینَه صُلح بِکَه، نبادا اِشتِه شاکی تِه آدَه قاضی دَس و قاضی تِه آدَه نِگَهبانی دَس و زندانی کا دَلَکی. 26حقیقتن بَه تِنَه بَواتیم، تا آخِرین قِرونی آمَدَی، زِندانی کا بِرون نای.
زِنا
27«دَرَسَرونَه كه توراتی کا نیویشتَه بییَه: ”زِنا مَکَه“ 28امّا از شِمَه نَه بَواتیم، هَر کسی شهوتی نَه ایلَه ژِنی دَیِسه، هَ لحظه اِشتَن دیلی کا اَیی نَه زِنا کَردَشه. 29بَس اَگم اِشتِه راستَ چِم باعیث بَبی تِه گناه بِکَری، اَیی بَروَه و فِرآدَه، چوم چاکتَره اِشتِه بَدنی ایی تیکه از دَس بِدَی تا اِم که گِرد اِشتِه بَدَن جَهندَمی کا دَرَفَنده بِبو. 30و اَگم اِشتِه راستَ دَس باعیث بَبی تِه گناه بِکَری، اَیی قطع آکَه و فِرآدَه؛ چوم چاکتَرَه اِشتِه بَدَنی ایی تیکه از دَس بِدی تا اِم که گِرد اِشتِه بَدَن جَهندَمی کا دَرَفَنده بِبو.
طلاق
31«هِنتَه نی واتَه بییَه ”هَر مِردی اِشتَن ژِنی طلاق بِدَه، بَسی ایلَه طلاقنامه ای آدَه اَیی.“ 32امّا اَز شِمَه نَه بَواتیم، هَر کسی اِشتَن ژِنی، زِنا غِیراز، چیی واسی طلاق بِدَه، چَیی زِناکاری باعیث بَبی و هَر کسی طلاق ویگِتَه ژِنی بِبَره، زِنا بَکَردی.
قَسَّم هَردِه
33«هِنتَه نی دَرَسَرونَه که قدیمی یَه مردمی نَه واتَشونَه، ”دورعَه قَسَّم مَه و وختی خِداوندی نومی نَه قَسَّمی هَردِرَه، اَ کاری اَنجام بِدَه.“ 34امّا از شمَه نَه بَواتیم، هرگز قَسَّم مَرَه، نِه بِه آسِمون، چوم خِدا پاُتشایی یَه تختَه، 35نِه بِه زمین چوم خِدا پا نوعَه جِگایَه، و نِه بِه اورشلیم، چوم اَ یالَ پاُتشا، شهر اِستَه. 36و اِشتِه سَری نی قَسَّم مَه، چوم حتی نیمَشای ایلَه مو، اَیی کا سیاه یا ایسبی آکَری. 37بَس بِدارَه شِمَه ’ها‘ هَ ’ها‘ بِبو و شِمَه ’نِه‘ هَ ’نِه‘ بِبو، هَر گَفی اِمی کا وِرتَر، شریری کا یَه.
اِنتقام
38«دَرَسَرونَه كه توراتی کا نیویشته بییَه، ”چِم چِمی عَوض و دَندون دَندونی عَوض.“ 39امّا از شِمَه نَه بَواتیم، شَرورَه آدَمی پیشی کا، مقاومت مَکَرَه. و اَگم کسی اِشتِه راستَ دیمی سیله ژَنه، اِشتِه دیمی اَ وَری نی آگاردِن چَیی طرف تا بِژَنه. 40اَگم کسی پیستِشَه تِه بِبرَه محکمه را، تا اِشتِه خَلا ویگِرِه، اِشتِه اَبا نی آدَه اَیی. 41اَگم ایلَه رومی یَه سرباز تِه مجبور بِکَرِه که ایی فَرسَخ اَیی را بار بِبَری، تِه اَیی را دِ فَرسَخ بار بِبَه. 42اَگم کسی تِه مِنَّت بِکَرِه که ایی چیی بَیی آدَی، بَیی آدَه و کسی که تِه کا قرض پیستِشَه اَیی تِیه دَس آمَگاردِن.
دِشمَنون را محبت کَردِه
43«دَرَسَرونَه که توراتی کا نیویشته بییَه، ”اِشتِه خَمسوعَه نَه خِش بِبَش و اِشتِه دِشمَنی کا بیزار بِبَش.“ 44امّا از شِمَه نَه بَواتیم، شِمَه دِشمَنون نَه محبت بِکَرَه و کسونی را که شِمَه اَذیت آزار بَکَردین، خِیرَه دعا بِکَرَه. 45تا شِمَه آسِمونی یَه دَده خِردَنون بِبییَه. چوم اَ اِشتَن آفتاوی بَدَه آدَمون و چاکَ آدَمون سَری کا دَتاوونِه و اِشتَن وارِشی عادل آدَمون و ظالم آدَمون سَری کا بَوارِستی. 46چوم اَگم فقط کسونی محبت بِکَرَه كه شِمَه محبت بَکَردین، شِمَه را چِه پاداشی هِستِشَه؟ مَگم حتی باجگیرِن نی هِم کاری نِکَرِن؟ 47و اَگم فقط شِمَه بِرااون را سلام بِکَرَه، چِه کاری کَردَرونَه که خَلکی کاری کا چاکتَرَه؟ مَگم حتی بُت پرستِن نی هِم کاری نِکَرِن؟ 48بَس شِمَه بَسی كامِل بِبییَه هَتَه كه شِمَه آسِمونی یَه دَده كاملَه.
Айни замон обунашуда:
اِنجیل مَتّی 5: ITB
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
@ 2024 Korpu Company