Moti 22
22
Boiraitta hánar meésal
(Luk 14:15-24)
1Isá ye ítara re aró ekbar meésal dí hoór de: 2“Asmani raijjo óilde undilla baáñccar ḍóilla, zibá ye nizor fuar boirat or hána goijjé. 3Zetará re boiraitta hánar dawot diya giyéh,#22:3 Yáni zetará meéman ókkol asé ítara re matai bolla yóggwa ye nizor goóur ókkol difeṛáiye, montor ítara aitó nó saá.
4 “Yóggwa ye abar ar hodún goóur ore endilla hoói difeṛáiye, ‘Zetará re dawot diya giyéh ítara re hoibá de, yala añr ttu hána nal goijjá óiye; añr doóñra goru edde boli goru zooráiyi, yala beggún nal. Tuáñra boirat or hánat aiyó.’
5 “Montor ítara éckara gorí nizor-nizor ham ot giiyégoi, kiyé nizor kétit ar kiyé nizor códorit, 6aar baki gúne yóggwar goóur gún ore dóri ítara re bodsólluk goijjé edde marifélaiye. 7Lekin híyan fúni baáñcca bicí rak óigiyoi, aar nizor fóous ókkol difeṛái hé kúni ókkol ore dónco gorífelaiye, edde ítarar cóor furat difélaiye.
8 “Baade yóggwa ye nizor goóur gún ore hoór de, ‘Boirat or hána toh nal óiye, montor zetará re dawot diya gyíl ítara aibár laayek no. 9Hétolla, cóor or rastar muáñ-muáñ zai zetó zon loot foo, ítara re boirat or hánar dawot dogói.’ 10Tói goóur gúne baáre rastat zai zaré-zaré loot faiyé, gom hóraf beggún ore dola goijjé; baade boiraitta-hána gán meémane furaigiyói.
11 “Montor baáñcca ye bútore meéman ókkol ore saitó aiccé de októt, héṛe boiraitta hoor afindá ezzon manúc deikké. 12Yóggwa ye ítar ttu fusár gorér de, ‘Dustó, tuñí boiraitta hoor sára eṛé bútore keéngori góillo?’ Manúc cwa ye honó zuwab di nó fare.
13 “Hétunot baáñcca ye háadem ókkol ore hoór de, ‘Itar át ṭéng bañdí, itaré baáre andár ot félai dogói; héṛe hañdahaṛi edde date dat kirkirani óibo.’
14 “Kiyólla-hoilé ḍaha toh boóut zon ore giyéh, montor hoozzon ore beh basílowa gíyeh.”
Romi baáñcca re házana diiya
(Mak 12:13-17; Luk 20:20-26)
15Hétunot Féroci ókkol zai, Isá re kii bote Íbar hotá lói hol ot félai faribó híyan sólla goijjégoi. 16Ítara nizor cárit tun ore Hérudiól or fúañti Íbar hañse difeṛái hoór de, “Ustat, añára zani de, Tuñí sóiyi hoó edde sóiyigori Allar rastar taalim doh. Tuñí maincé kii hoór forba no goró, kiyólla-hoilé Tuñí toh honókiyo re forók goró de nái. 17Añára re hoósai, Tuñí kii báfo? Romi baáñcca#22:17 Girík ot Káisar hoó de híyan nam no, híyan ekkán Rom raijjor baáñcca ókkol or lokób. Hétolla iñyót Romi baáñcca ísafe estemal gorá gíyeh deh. re házana doon zayes asé né náki nái?”
18Montor Isá ye tarár hóraf niyot ore zani hoór de, “Ó munafék ókkol, tuáñra Añré entán gorór kiyá? 19Házana dee de héndilla ekkán Añré foicá dahó.” Tói tará Íbar re ekkán dinár aní diiyé. 20Íba ye tará re hoór de, “Yián har sóbi edde har nam?”
21Tará Íba re hoór de, “Romi baáñccar.”
Tói Íba ye tará re hoór de, “Tóoile ziín baáñccar híin baáñcca re diiyo, aar ziín Allar híin Alla re diiyo.”
22Híyan fúni tará taajup óigiyoi, aar Íba re eri giiyégoi.
Háñcor or baabute súwal
(Mak 12:18-27; Luk 20:27-40)
23Hé din Sadukái ókkol Isár hañse aiccé, Sadukái ókkole háñcor nái hoó, ítara aái Íba re ekkán súwal goijjé, 24ki hoilé, “Ustat, Muúsa ye hoiyé de, ‘Zodi honó manúc fuain sára morizagói, tóoile ítar bái ottu ítar bou híba re biyá gorífelai nizor bái olla nosól foida gorá foribó.’ 25Dóro, añárar bútore háñt zon bái accíl. Foóila wa ye biyá gorí fuain sára morigiyói, hétolla íte nizor bou wóre bái olla rakígiyoi. 26Héndilla hálot dusára, tisára ebbe háñto bái foijjonto óiye. 27Ahérit, mayafua wa yó morigiyói. 28Hé ísafe, háñcor or hale híba ítara háñto zon ottu har bou óibo? Kiyólla-hoilé híba re toh ítara beggúne biyá goijjíl.”
29Isá ye ítara re zuwabe hoiyé de, “Tuáñra gollot ot asó, kiyólla-hoilé tuáñra toh no pak-kalam zano, aar no Allar kudurut zano. 30Kiyólla-hoilé háñcor or hále manúc ókkole no biyá goríbo aar no ítara re biyá díya zaybo, bólke ítara asman ot fíristar ḍóilla beh óibo. 31Mora ókkol zinda ówar baabute hoitó sailé, tuáñra kí Alla ye tuáñra re hoiyé de yián nó foró, 32‘Añí óilam de Ibrahím or Alla, Isahák or Alla edde Yakub or Alla’?#22:32 Hízorot 3:6 Alla toh mora ókkol or Alla no, bólke zinda ókkol or éna.”
33Manúc cúne híyan fúinne rár, Íbar hé taalime taajup óigiyoi.
Ebbe ḍoóñr hókum
(Mak 12:28-34; Luk 10:25-28)
34Zeñtté Féroci ókkole fúinne de, Isá ye Sadukái ókkol ore nizám márai raikké, ítara ekkán ot zoma óiye. 35Ítara ttu Córiyot or ézzon aleme entán gorí bolla Íba re súwal gorér de, 36“Ustat, Tourat Córif ot hókum hon nán ebbe ḍoóñr?”
37Isá ye yóggwa re hoór de, “ ‘Mabud tuáñrar Alla re nizor fura dile, fura zane, edde fura demake muhábbot goríba.’#22:37 Córiyot-nama 6:5 38Híyan óilde ebbe ḍoóñr edde ebbe zoruri hókum. 39Ebbe zoruri hókum dui nombór or gán óilde, ‘Nizor atehañsór maincóre nizor ḍóilla muhábbot goríba.’#22:39 Imami-ham 19:18 40Hé hókum duníyan ot fura Córiyot edde nobi ókkol or hotá loṭkaiya.”
Mosihr baabute súwal
(Mak 12:35-37; Luk 20:41-44)
41Féroci gún ekkán ot zoma asé de októt, Isá ye ítara re ekkán súwal gorér de, 42“Mosihr baabute tuáñrar buzá kii? Íba har Fua?”
Ítara Íba re hoór de, “Dawud or Fua.”
43Íba ye ítara re hoór de, “Tóoile Dawude keéngori Íba re Ruhr hédaiyote ‘Malik’ ḍaikké? Íba ye toh endilla hoiyé,
44 ‘Mabude añr Malik ore hoór de,
“Añr den ḍák ottu boiyó,
zetókkal foijjonto Añí Tuáñr duccon ókkol ore
Tuáñr foor tole gorí nó felai.” ’ # 22:44
Zobur 110:1
45 Tói Dawude Íba re ‘Malik’ ḍaikké de óile, Íba keéngori Dawud or fua dé?” 46Íba re honókiye ehoór óu zuwab di nó fare, aar hé din lóti Íba re ar súwal gorí bolla honókiye hímmot no goittó.
Айни замон обунашуда:
Moti 22: RST
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
The copyright is jointly and equally held by:
Copyright © 2024 The Word for the World International
Copyright © 2024 Rohingya East Asia Translation