Juan 7
7
Ti Jesus sakay u Wáwwadi na hide
1Nadid, káttapos ay linebut ni Jesus i Galilea. Umád na a umangay ti Judea dipo gusto siya a bunuwán nu puno nu Judio hide. 2Nikuna a adene dán u essa tu eldew hide nu Kasayaan nu Judio hide ti Jerusalem a dáddulawan labe a Kasayaan ni Tolda, 3kinagi nu wáwwadi hide ni Jesus nikuna, “Bakin a awan ka pa he lumakad sakay umangay ti Judea, tánni ketan nu disepulus mo hide u gággimitán mo hide? 4Dipo awan ti tolay a mángtagu tu gimet na ni gusto na a metanyag. Ni maggimet ka ti makataka-taka, ipeta mo tu atanan.” 5Kinagi iye nu wáwwadi ni Jesus dipo maski hide ay awan maniwala nikuna. 6Kanya kinagi ni Jesus nide, “Para nikam ay maare moy a gimitán u gusto moy maski ni ánya a odas, pero para nikán ay awan ku palla odas. 7Awan kam kaiyamutan nu tolay hide ti munduway, pero hikán ay kaiyamutan de, dipo inpeta ko nide a madukás u gimet de. 8Hikam dálla u umangay tu Kasayaan nu Judio hide. Awanák umangay ta bakán palla iye u odas ko.” 9Tu pákkakagi na ti iye ay nagwahak siya ti Galilea.
Immangay ti Jesus tu Kasayaan
10Tu kállakad nu wáwwadi hide ni Jesus a paangay tu kasayaan ay immangay labe ti Jesus pero patagu la. 11Ti kasayaanay a itod ay inehyok siya nu Puno nu Judio hide. “Hádya wád siya?” Kagi de. 12Sakay u tolay hod hide ay garabi u pángbábbaheta de ni Jesus. U agum ay magkagi, “Mabait siya a tolay.” Kagi be nu agum ay, “Awan, lállokuwán nala u tolay hide.” 13Pero awan ti nagupos tungkul nikuna ti bulgaran, dipo tu ánteng de tu puno nu Judio hide.
14Nikuna bállog dán nu kasayaan ay immangay ti Jesus tu templo sakay nangaral. 15Nagtaka nikuna u pinuno nu Judio hide, sakay kinagi de, “Kodya na a matukuyan i bagayan iye hide, awan bi siya nakapagiskuwela?” 16Kanya kinagi ni Jesus nide, “U itáttoldu ko ay bakán a gábwat nikán, nan gábwat tu nángpaangay he nikán. 17Ni deyaman u masoh a sumunud tu kagustuwan nu Diyos ay matukuyan na u itáttoldu ko, ni gábwat tu Diyos oni gábwat la tu sadile ku a kagustuwan. 18U magtoldu a ayun la tu sadile na a kagustuwan ay u gusto nala ay puriyán siya ni tolay. Pero u magtoldu a inutusan nu Diyos ay u gusto na ay mapure u Diyos. Sakay u págtoldu na ay tama, bakán a kakabuliyan. 19Awan beman inyatád nikam ni Moises u Kautusan? Pero maski essa nikam ay awan ti nakasunud tu Kautusan. Dipo ni sinunud moy u Kautusan, bakin a gustuwák moy a bunuwan?” 20Timmábbeg u tolay hide, “Sináddáp ka dán ni madukás a ispirito! Ti deya beman u masoh a mangbuno niko?” 21Kinagi nide ni Jesus, “Essa palla a makatakataka u ginimet ko ay nagtaka kamon dipo tehhodák a pinagpiyya a essa tu Aldew nu Káimang. 22Awan beman inyatád nikam ni Moises u utus tungkul tu págture. (Bakán iye a gábwat ni Moises nan tu ninuno moy hide.) Sakay dipo ti iye ay turiyán moy u anak maski Aldew ni Káimang. 23Nadid, ni u essa a anak ay maare a turiyán tu Aldew nu Káimang para awan malabag u utus ni Moises, bakin a magingál kam nikán dipo pinagpiyya ko u essa a tolay tu Aldew nu Káimang? 24Diyan kam maghusga a ayun la tu ketan moy, nan adalán moy ti mapiyya bagu kam a maghusga, para matukuyan moy u tama.”
Tinanung nu Tolay hide ni ti Jesus dán u Cristo
25Nadid ay kinagi nu sangan a taga-Jerusalem, “Awan beman sa iye u tolay a gusto a bunuwán nu puno tam hide? 26Pero ilingán moy lantad siya a mangaral sakay awan ti makagi u puno hide tungkul nikuna. Makay kilalaán di dán siya a Tagapagligtas. 27Pero tukoy tam ni hádya siya a gábwat, pero u Tagapagligtas a dumemát ay awan ti makatukoy ni hádya siya gábwat.”
28Mentaras a magtoldu ti Jesus tu templo ay kinagi na ti mabegsák, “Tatahoden beman a matenggiyák moy sakay tukoy moy ni hádyaák a gábwat? U tatahoden ay awanák he immangay tu sadile kula a kagustuwan. U tunay a Diyos u nangpaangay he nikán, pero awan moy siya matengge. 29Pero matengge ko siya dipo gábwaták nikuna, sakay siya u nangpaangay he nikán.” 30Dipo ti kinagiyan itod hide ni Jesus ay gustu dán siya a dakáppán nu pinuno nu Judio hide, pero awan ti nangahas dipo awan na palla odas. 31Sakay makpal a tolay u naniwala nikuna. Kinagi de, “Siya dán u Tagapagligtas, dipo awan ti agum a makagimet tu makataka-taka hide a ginimet na.”
Inutusan u Guwardiya hide a Dakáppán ti Jesus
32Nikuna a nasaneg nu Pariseo hide u pamágguhunan nu tolay hide tungkul ni Jesus, u pinuno nu Saserdote#7:32 U gusto a kagiyán nu Saserdote ay pinakapuno nu padi hide hide ay nagutus ti guwardiya tu templo para dakáppán ti Jesus. 33Kinagi ni Jesus, “Awanák moy dán makaguman ti malay, sakay káttapos ay soliyák dán tu nangpaangay he nikán. 34Ehyukánnák moy, pero awanák moy ketan, dipo awan kam makaangay tu angayan ko.” 35Namágtanungan u pinuno nu Judio hide, “Hádya wád plano naay a angayan ta awan tam kanon siya ketan? Angay wád siya tu lugar nu Griego hide, ni hádya a nekalat u kákkapatkákka tam a Judio, para magtoldu tu Griego hide? 36Bakin na a kinagi, ‘Ehyukánnák moy pero awanák moy dán ketan, dipo awan kam makaangay tu angayan ko.’”
U Dinom a Mangatád ti Biyag
37Nadid, tu dimodyan a aldew a pinakamahalaga a kasayaan nu Judio hide, timmaknág ti Jesus sakay kinagi na ti mabegsák, “U deyaman a mauwaw ay umadene nikán sakay uminom. 38Sakay u atanan a sumampalataya nikán ay uminom. Dipo kinagi na tu Kasulatan, ‘Gábwat tu puso nu manalig hide nikán ay magtuhog u dinom a makapangatád ti biyag.’” 39U dinom a gustu he a kagiyán ni Jesus ay u Banal a Ispirito, a adene dán a matanggap nu maniwala hide nikuna. Awan palla ingkaluub u Banal a Ispirito ti panahunay a itod, dipo awan palla immangay ti Jesus ti langet.
U Pánniwala nu Tolay hide Tungkul ni Jesus
40Nikuna a masaneg di iye a kinagi ni Jesus ay makpal a tolay u nagkagi, “Siya dán u áohayán tam a prupeta!” 41Kinagi be nu agum, “Ay siya dán u Tagapagligtas!” Pero tehhod be a nagkagi, “Bakán a siya u Tagapagligtas, dipo awan maare a gumábwat ti Galilea u Tagapagligtas. 42Awan beman kinagi tu Kasulatan a u Cristo ay maggábwat tu lahe ni hare a David, sakay meenak ti Betlehem a banuwan ni David?” 43Kanya iba-iba u pánniwala nu tolay hide tungkul ni Jesus. 44U sangan nide ay gusto de siya a dakáppán, pero awan ti nagbegsák ti isip a gimitán iye.
Umád a Maniwala nu Pinuno nu Judio hide ni Jesus
45Nagsole u guwardiya hide tu templo, tu nagutus nide a pinuno a saserdote hide sakay tu Pariseo hide. Tinanung de u guwardiya hide, “Bakin a awan moy siya inyangay he?” 46Timmábbeg hide, “Nadid kami palla a nakasaneg ti konna nikuna a magupos.” 47Kinagi nu Pariseo hide, “Ni konna hod ay pati dán hikam ay naloko dán be ni tolayan itod? 48Tehhod kam dám beman a netan a pinuno nu Pariseo hide a maniwala nikuna? 49Awan! U tolay la hide a awan ti tukoy tu Kautusan ni Moises u maniwala nikuna. Siguradu a parusaan hide nu Diyos!” 50Essa tu Pariseo hide a katoy hod ay ti Nicodemo a immangay tu kán Jesus a nákpágguhon tu essa a gibi tu itod. Kinagi na tu kaguman na hide, 51“Awan beman labag tu Kautusan tam a hatulan u essa a tolay hanggan a awan tam masaneg sakay matukuyan ni ánya u ginimet na?” 52Tinábbeg de ti Nicodemo, “Taga-Galilea ka beman be? Adalán mo u Kasulatan, para ketan mo a awan ti propeta a maggábwat ti Galilea.” 53Káttapos ni itod ay nagsoliyan dán u atanan a tolay tu bila-bilay de.
Айни замон обунашуда:
Juan 7: MBJC
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Pahanan Agta New Testament © Philippine Bible Society and Wycliffe Bible Translators, Inc., 2017.