YA-SFADOCI JRNE 15
15
1Neiv ini mvyrwi tatapvhtaqi, macimi n’ Uhfv inv gitigawi-lani. 2Jrgi pah-gaivkugi neyrgi waci bur negigi mvwifowa, hinv u mvma ini vlikv u ta siwatu : chena jrgi pah-gaivkugi waci negigi mvwifowa inv u fvfvyrgilutv ini, wvhsi manvwv’ hini uci vlikv si negigi mvwifowa. 3Naiahkv gelvwv ki fvfvyrgifipwv xvga ini kvlvwewa uci mviahci nelv kvlolalvku. 4Hvpiku neyrgi, macimi nelv geyrwrgi. Yasi ini pah-gaivkugi ini pasiqi uci rlwi kvtvwi negigi mvwifowa, waciwap’ hini si tvqi lanvwaweyrga ini tata-pvhtaqigi; yone uci mvtv kvtvwi nuhgi gelvwv, waciwaphi gelvwv neyrgi vpiyaqa. 5Neiv ini tatapvhtaqi, geyrwv nili pah-gaivkuki : Hinv yapitv neyrgi, macimi nelv weyrgi, hinv inv u mrli negitu mvwifowa : xvga neiv uci tabrna ki kvtvwi silvwepwv mvtv-wiahi. 6Qahqi ilani vpita mvtv neyrgi, inv vlikv ipvgilofu brsi pah-gaiv-kugi, macimi svhfu; chena nihki u mrwvtunrnrwv nili, chena ini skudagi ut ipvgidrnrwv nili, macimi nili fvgita. 7Qahqi gelvwv neyrgi vpiyaqa, macimi ni kvlvwewanv vhdaga geyrwrgi, nvtuh-saku goqa-nahi-grci yasi tahayaqa, macimi ini ga ipanvlagopwv gelvwv. 8Yone-tvsi wvhfrci-makufihofu n’ Uhfv, wvhsi gelvwv mrli negidoyaqa mvwifowa; macimi yone gah si kvgahgimrfe-malapwv. 9Datapilvhi yasi inv Ufimv naiahkv vhqalamici, nahfrpi nelv gi tasi vhqalamalapwv : hvpiku nit vhqaladewa-nagi. 10Qahqi gjetunvmaqa ni tapigamowanv, ga hvpipwv nit vhqa-ladewa-nagi gelvwv; datapilvhi yasi naiahkv gjetunvmv u tapi-gamowanv n’ Uhfv, macimi vpiv ut vhqaladewa-nagi. 11Yolumv wiahi gi mahci kvlolalapwv, wvhsi n’ uwasilabwrwa manvwvhi geyrwrgi vhdagi macimi wvhsi gelvwv k’ uwasilabwrwa-nwv manvwvhi uqrwi sdodagi. 12Hvlv-yomv ni tapigamowa, wvhsi gelvwv vhqalatiyaqa, datapilvhi yasi nelv naiahkv vhqalamalvku. 13Mvtv ilani u bonv vlikv yagi vhqaladewa yomv, yasi ilani sag-fatvwrci u ta lanvwawewa wihgrnhi. 14Nih-grnvki gelvwv, nili wiahi silvweyaqa da-tapimalvku. 15Mvtv gidani vlolrgrfvki gi talapwv; xvga inv vlolrgrfv mvtv u wrkutv ya-silvwelici daba-lamakuci : wakv naiahkv nelv wihgrnimrki gi ta sinalapwv; xvga jrivhki wiahi n’ Uhfv waci notvmv gi mahci wrkutas-dolapwv. 16Mvtv gelvwv ki mvmipwv, wakv nelv gi mvmalapwv, macimi gi mvyrusi-malapwv, wvhsi gelvwv hryaqa macimi negidoyaqa mvwifowa, chena wvhsi ki mvwifowa-nwv vhdagi : wvhsi goqa-nahi-grci gelvwv gah nvtutvmvwrwv inv Ufimv ni wefowa-nagi, manvwv’ hinv melalwrqa ini. 17Yolumv wiahi gi tapimalapwv, wvhsi manvwvhi gelvwv vhqalatiyaqa. 18Qahqi inv yalakuqvh-kvmigigi segalamalwrqa, ki wrkudrnrwv yasi inv naiahkv segalamici nelv ivihsi-bur inv segalamalwrqa gelvwv. 19Qahqi inv yalakuqvh-kvmigigi uciwiyaqa, inv yalakuqvh-kvmigigi wi hvhqalamrli u nhvlwrfewanvli : wakv xvga gelvwv mvtv inv yala-kuqvh-kvmigigi k’ uciwipwv, pvyaqv inv yalakuqvh-kvmigigi g’ uci maginalapwv, waciganv’ hinv yalakuqvh-kvmigigi gi sega-lamakuwv. 20Gcitvwalatvmuku ini kvlvwewa ya-lalvku, Vlolr-grfv mvtv vlikv ilafi dabalamakuci. Qahqi nihki nrnuhgrchiwrta, nahfrpi nihki gah nrnuhgrchakuwrki gelvwv; qahqi nihki gjet-unvmuwrta ni kvlvwewa, nahfrpi nihki ga gj etunvmrku wrki gel-vwv. 21Wakv jrivhki yolumv wiahi ga ipanvlakuwrki nihki xvga ni wefowa uci, xvga nihki mvtv u wrkumrwrli nili wa-wrwenas-kvwilici. 22Qahqi nih bur mahci bir macimi kvlolrki nihki, mvtv u tvh mah’ bonrnrwv mvjesilvwewa : wakv uwa mvtv u bonrnrwv u mvjesilvwewa-nwv uci udwanikv. 23Inv sa-segalamitv nahfrpi u segalamrli n’ Uhfvli. 24Qahqi nih bur naiahkv silvwi alagenv nihki nili pakvtafewanv buryr kutvkv wiyafv silvweci, mvtv nihki u tvh mah’ bonrnrwv mvjesilvwewa : wakv uwa nihki ni mahci nvugoki macimi segalamagoki nayeswi nelv chena n’ Uhfvli. 25Pvyaqv biamikvtwi yomv, wvhsi ini kvlvwewa manvwvhi uqru-fagi ya-lvwigagi u kutaladewa-nwrgi, Ni segalamagoki nihki na-luhci. 26Pvyaqv ina inv Manwitahadewanv birta, gelvwv wvh laskvwvkv inv Ufimv uci, datapilv’ hinv dabwawa si Ucvjrlvhqv, nili Ufimrli wa-udrmetv, inv nah pvh-nemrqv dabwawa : 27chena nahfrpi gelvwv ki pvh-nemanrwv dabwawa, xvga ki mahci pvh-wedfamalapwv ina ini wasgi uci.
Айни замон обунашуда:
YA-SFADOCI JRNE 15: SJW
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Published for Thomas Wildcat Alford in 1929