YA-SFADOCI JRNE 12
12
1Jesise waciganvhi nakutwvh-fuku isi wihsi-bur ini pam-frsiwawigi Pafana si biawv, tv hvpici Lasulase, nili napalici waci unsgrnrci Jesise. 2Waciganvhi nihki ntvsi u ustvwrwrli svpv : macimi Mrfa mesvmrga; wakv Lasulase nakuti nihki la-mvtv-picki tvh wihfanigi weci nili. 3Male waciganvhi u mvma nakuti pvum ufapiv nrdewi lumgowa, gisuwa-lamaqvtwi ulrmi, chena u luminvmvwrli nili u fitvli Jesise, macimi welahfv ut vwanv u kvfhvmvwrli u ficiwilici : macimi ini wegiwv uqihfanwi ini ya-simyrkugi ini lumgowa. 4Pvyaqv Jotvs’ Isgalade, nakuti u kvgahgimrfhi, wvhi masdruhrtv nili, 5Gociwa mvtv yomv lumgo-wa nfana-tabawa salani si myagipi, macimi melaqi inv gitamrfv? isiwa. 6Huwa yomv iwv inv, mvtv xvga u mvkufalamrli nili gitamrfvli; wakv inv gr-gimotakv, macimi u pvhnema ini bedrkv u mvma ini ya-bonodaki wiahi. 7Waciganvhi Jesise, Welrni inv iqawv ini si gjetunvga ini ni lakunofowa si grsagigi. 8Xvga inv gitamrfv mosvtvwi ki bonrwv weci gelvwv; wakv nelv mvtv mosvtvwi ki bonipwv, isiwa.
9Nihki Josvki uci nahcipahi lanvwaki waciganvhi wrkuta-feki yasi inv ntvsi vpici : macmi nihki biaki, mvtv Jesiseli pa’ huci, wakv wvhsi manvwvhi nahfrpi nawrwrci Lasulaseli, mviahci inv nili na-palici uci unsgrnrci. 10Pvyaqv nihki ugimrwi mkvtau-kulvyaki u mvmanrwv tapuwawa wvhsi manvwvhi nahfrpi Lasulaseli iqinvmowanagi si bonrwrci; 11xvga nileni uci maci nihki Josvki wapfaki, macimi dapwahsaki Jesiseli.
12Hini wryrpvgi msalwv mahsalakv mviahci birtv ini wihfancigawa-nagi, iah nodrgawrci nihki yasi Jesiseli wesv Culo-salame si birlici, 13u mvmanrwv nili pvwefvlvni-mesa uci nili pvhgaivkuki, chena wapfaki u mvwi nvxkvwrwrli nili, macimi, Hosanv : Gisrdala-makufi inv ba-birtv ini u wefowa-nagi inv Dabalamiwatv, datapilvhi nili Ugimrmvli Iswelv, lvhotvmoki. 14Chena Jesise, nvkvia u mahci mkvwrli mvyrni jagefvli, usgici nili lamvtvpiwv; yasi ini mahtvwigagi, 15Tagi kupanalu, u drnahfvli Srivn’ : wrpvmi, gi Ugimrmv bami birci, bami usgici lamvtvpici jagefv u mvhgotalafamvli. 16Yolumv wiahi mvtv nanuhsahi u kvgahgimrfhi ini wasgi : pvyaqv ina Jesise wvhfrci-makufihofu, hina uwa u mkvwaladrnrwv nihki yasi nili si mahtvwigagi yolumv wiahi, macimi yasi nihki yolumv wiahi mahci lutvmuwrci nili si. 17Hinv mahsalakv waciganvhi ba-pvh wedfamrtv nili ina Lasula-seli ini nabowrlvqi u tah wihkumrli inv, macimi nili na-palici uci unsgrnrli nili, u pvhginv dabwawa. 18Xvga yomv ini waci nahfr-pi wapfawrci nihki mahsalagiki macimi nvxkvwrwrci nili, xvga yasi nodrgawrci nihki yasi inv mahci yomv silvweci giginolowa. 19Nihki Palaseki waciganv’ hideki alagenv welvwv, Wrpvtvmuku yasi gelvwv kulapkvmaqa mvtv-wiahi; scih, ini yalakuqvh-kvmigi-gi u nakvlaku inv.
20Huwa ntvsi nr-nakuti Qegewi-lanvwaki vbeki alagenv iuhumv ini tvh wihfancigagi yasi kuqicsinalici wvhsi usvsilvwr-lici : 21uhgoni waciganvhi u bialutvwrwrli Filvbeli, Pafsaida uci inv Galale uci drmqa, macimi u nvtuhtvwrwrli, Yalaniwivni, nih nawrpa Jesise, isiwaki. 22Filvbe biawv macimi u wetvmvwrli Andloli : Andlo biawv, chena Filvbe, macimi nihki u wetvmvwr-wrli Jesiseli. 23Chena ud rpvftvwvhi Jesise, Hini yrtafvgi biaiv wi hinv u Qihfvli ilani wvhfrci-makufihofuci. 24Tapilo, tapilo, gi talapwv nelv, Waciwaphi nakuti paqa kvwvsqi ini vsisgegi si panfaga macmi naboyrga, ini nrnsihkv pahi vbeiv; wakv qahqi ini naboiv, maci mvwifowa ini uci neginwi. 25Hinv ivhqalatvkv u ta lanvwawewa u wvntu ini; macimi inv sa-segalatvkv u ta lanv-wawewa yomv yalakuqvh-kvmigigi tvsi wah nvhekv iqi gjetunv goqa-lrqvsi lanvwawewa-nagi. 26Qahqi wiyafv ilani mesvmvwita, welrni inv nakvsita; macimi nelv tv hvpiv, nahfrpi ntvsi wa hvpi-wv ni mesvmrgamv : qahqi wiyafv ilani mesvmvwita, nileni inv Ufimv wa hutvgalamrli. 27Huwa ni mvyrwi neiv patfvkvtwi; macimi nahiwa na hiu? Ufimv, yomv uci yrtafvgi wrpvnashilu. Pvyaqv yomv iu xvga waci yomv yrtafvgi si biriv. 28Ufimv, wvhfrci-maqidolu gi wefowa, iwv. Nitvsi waciganvhi manqvtugi uci biaiv kvlvwawih-simowa, Ni mahci nayeswalanv wvhfrci-maqitu, macimi nah wvhfrci-maqitu ini nuhgi, iyoiv. 29Nihki mahsalagiki waciganvhi, na-nepvwicki mrlrqvhi, macimi u nodr-nrwv ini, yasi mahci nanamgiwvgi ini, iwvki : kutvkvki, Ancvleli u mahci kvlolagoli inv, iwvki. 30Jesise rpvfsa macimi, Yomv kvlvwawihsimowa mvtv nelv si gitaminrqi uci biaiv, gelvwv wakv. 31Huwa ini vhdawi u ta Ivhkuwrfowa yrmv yalakuqvh-kvmigigi : huwa inv yomv yalakuqvh-kvmigigi uci ugimv odo-srkv wah luhfa-pvgilofu. 32Chena nelv, qahqi ini vsisgidrmqa uci kuqi-taniga, neyrgi nah si biatanrki jrivhki ilaneki, iwv. 33Pvyaqv yomv iwv inv, giginodrcimu wv higi ut iqinvmowa wvh napagi. 34Hinv mahsalakv waciganvhi ud rpvftvwrli nili, Ni mahci ini kutaladewa uci nodrpa wvhsi inv Klvisde vpici goqa-lrqvsi : macimi nahiwa gi tasi iu gelv, Inv u Qihfvli ilani qelvhi wa kuqi-tanofu? nafvwa yrmv u Qihfvli ilani? 35Waciganvhi Jesise, Gawvgi frbemahi vhdawi ini wvivhfayrgi alagenv gelvwv, u talvhi nihi. Brmfaki iahaiahi gelvwv bonv-maqa ini wvivhfayrgi, wvhsi mvtv ini ba-pagijrgi mvtvlaku-yaqa : chena inv ba-brmfatv ini lr papagicv mvtv u wrkutv yahrci. 36Iahaiahi gelvwv bonv-maqa ini wvivhfayrgi, dapwahsaku ini wvivhfayrgi, wvhsi manv-wvhi gelvwv u qihfinaku-yaqa wvivhfayrgi.
Yolumv wiahi kvlvwi Jesise, chena inv srwa macimi u gigido weiv nihi uci. 37Pvyaqv waghi ulrmi maci giginolowanv mahci silvwi yalvhfvmelici nihi, gawvgi nihki mvtv dapwahsaki nili : 38wvhsi ini u kvlvwewa Visviv inv mrmosigesqatv manvwvhi uqru-fagi, ini inv ya-iuci, Dabalamiwatv, nafvwa u mahci dapwahtv ni ta Ircimowana-nv?
Macimi nafvwa mahci pvhginvmrqi ini u nahgi inv Dabalam-iwatv?
39Xvga yomv uci rlwi dapwahsaki nihki, xvga yasi Visviv nuhgi iuci,
40U mahci gipwileqanvhi inv, macimi u sepanvmvwvhi u tahi-wilici;
Belapa u sgesakuwv nihki wi huci nagaki, macimi u tahiwv uci mositahaki,
Chena wih kutaqeki, Macimi nih gegahrki nihki.
41Yolumv wia’ hiwv Visviv, xvga u nama inv u wvhfrci-maku-fewa-nilici; macimi inv ud rcimrli nili. 42Melowi nihki weginrqi dabalacigacki uci maci u dapwahtvwrwrli nili; pvyaqv xvga nihki Palaseki uci bur nihki tabrcimoki ini, belapa nihki ini msi-kvmiqi wi huci luhfalgof oki : 43xvga nihki vlikv u nrswaladrnrwv ini wvhfrci-makufewa ilaneki waciwigi notv ini wvhfrci-makufewa Mvnatu waciwigi.
44Chena ntvsimu Jesise macimi, Inv da-dapwahsatv nelv, mvtv dapwahsa nelv, wakv nili wa-wrwenaskvwilici. 45Chena inv ya-lrpvmitv nelv u talrpvmrli nili wa-wrwenaskvwilici. 46Ni bir wvivhfayrgi ini yalakuqvh-kvmigigi, wvhsi goqa-nafv-grci dapwahsa nelv manvwvhi mvtv vpici ini Ir papagijrgi. 47Chena qahqi wiyafv ilani u nodrnv ni tayowanv, macimi mvtv u gjetunr-nv nili, mvtv ni tapuwrlv inv : xvga ni bir mvtv wvhsi tapuwrtvmv ini valakuwvh-kvmigigi, wakv wvhsi ini yalakuqvh-kvmigigi wrpvnasdoiv. 48Inv ya-rlvwinitv, macimi mvtv utvhpanrnv ni tayowanv, u bonrli nakuti wvh tapuwrlakuci : hini kvlvwewa ga-kvlvwiv, ini ivskv wah tapuwrlaku inv ina jaiahqi grsagigi. 49Xvga mvtv neiv ni uci kvlvwi; wakv inv Ufimv wa-wrwenaskv-witv, hinv ni mahci melaqv tapigamowa, wv hiuiv, macimi wv hrtutvmv. 50Macimi ni wrkutv yasi u tapigamowa lanvwawewa-nigi, nili wiahi waciganvhi ga-kvlvwiv, datapilvhi yasi inv Ufimv mahci-mici, yone ni kvlvwi.
Айни замон обунашуда:
YA-SFADOCI JRNE 12: SJW
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Published for Thomas Wildcat Alford in 1929