लूको 18
18
अधर्मी जज ए रंणीऊ कथा
1यीशु ज़ि एनोह चेला तिंङ दिऊ पाहठी इच्च़ा कथारिंङ कुंहई कि, रोज प्रार्थना लोहवा लांही दंङ निराश थाह शुई; 2“इच्च़ा इलाकारिंङ इच्च़ा न्यायी तोहई अरी माह परमेश्वरारंङ साते बेवाते माह अरीआ मीहतु परवाह लाहते। 3दुहए इलाकारिंङ इच्च़ा रंणी मेच़िमी लाह तोहई, अच़ि दुह न्यायी ओ कछंङ घड़ी-घड़ी अंज़े कुट्राते, गिऊ न्याय लेह गिह्बी बेरीतु दोरच़ी बचाएतु। 4दोई महसे ध्याड़ा तचेक ताह माह मनेक्ती पर थल मुखंङ सोचेके कुहतो, हालांकि गेह माह परमेश्वरारंङ साते बेवातग, माह अरीआ मीहू परवाह लाहतग; 5तांला दिह रंणी मेच़िमी गेह तंग लाह दिऊ थल्जी गेह दिऊ न्याय लोहग, झांह शुबी मेस कि दिह घड़ी-घड़ी अंज़े थल मुखंङ गिऊ टटूरिंङ हंजे तोहतो।” 6प्रभु ज़ि कुंहई, “दिह अधर्मी न्यायी दोरच़ी। 7परमेश्वरे एनोह शता लहसी मीहतु थल्जी अच़ि रात दिन दोऊ तुईज़ी क्रपातोर ज़रुर न्याय लोहतो, दंङ दोतु मदत लहज़िमी थल्जी झाड़ा माह लोहतो।” 8“गेह केतंङ साते कुट्रातग दुह दोथरे दोतु थल्जी न्याय लोहतो, पर गेह मीहू योह अपेहल वापिस अपोग, ता गिह्बी धरती रिंङ अंयों मीहरेर खमोग कि अच़ि गिऊ टोहकठे विशवास लोहातोर?”
फरिसी ए चुंगी लेह्पच़ाड़ो कथा
9यीशु ज़ि दुह मीहतु हखा अच़ि एनाबि धर्मी ए ऊईतिंङ क्वाच़ी चेहच़ातेर, दिह कथा कुंहई; 10“झुह्ट मीहरे यहुदी मंदिरंङ प्रार्थना लहज़ी इलदोर; दोतु बिचंङ इच्च़ा फरीसी तोहई इच्च़ा चुंगी लेहपच़ा।” 11फरीसी मीह खड़े शुहचे एनोह सेहमरिंङ दिह प्रार्थना लहज़ी लेहती, हे परमेश्वर, गेह कांह धन्यवाद लहज़ातग कि गेह ऊई मीहतु ठ्रोह लालची, अन्यायी ए कुकम लहज़ा माह तोग, दंङ माह दिह चुंगी लेहप्च़ातु ठ्रोह तोतोग। 12गेह हप्तारिंङ झुह्ट फेरा ब्रत लहज़ातग, दंङ गेह घेंङौ भत्ते कमाईऊ दशवांश ला कनिंङ रंड्रातग। 13“पर चुंगी लेहपच़ा रे ऊई तार खड़े शुहचे, स्वर्गो हखा माह खांई, पर दुखारंङ एनोह काह कुटेके कुहतो, हे परमेश्वर, गेह इच्च़ा पापी शुगाह। गिऊ टोईच़ी दया लोहू।
14गेह केतंङ कुट्रातग कि, दुह ऊई माह शुह; पर दिह ए चुंगी लेहपच़ा मीह धर्मी शुई दंङ एनोह चुंखा इलि; छना कुचे अच़ि एनाबि महान बणाएक्पोतो, दुह कवचि शोतो; दंङ अच़ि एनाबि क्वाच़ी लोहतो, दुह महान शोतो।”
कटुतिंङ अर्शिबाद
(मत्ती 19:13-15; मरकु 10:13-16)
15दंङ मीहरेर एनातु कटुरे लाह यीशु कछंङ हपि लेहतिरे कि दोई दोतु टोईच़ी गुह्ट्र केहओतो; पर चेलाज़ि दिह खंड्रीरंङ दोरे रैहच़ीर। 16पर यीशुज़ि कटुरे कछंङ बुलाके कुहतो, “कटु बि गिऊ कछंङ अपि रंऊँ दोतिंङ मना थालोहू, छना कुचे ता परमेश्वरो राज्य दी कटुतु ठ्रोह भरोसेमंद मीहतु शुह। 17गेह केतंङ हेले कुट्रातग कि अच़िला परमेश्वरो राज्य कटुतु ठ्रोह ग्रहण मलोह्तो, दुह दोहर अपेहल लाह अपि मरपोतो।”
साहुकार मीह ए अनंत जीवन
18दंङ यहूदीतु इच्च़ा मुख्या ए यीशु रुहक्ती, “हे मोह्ड़े गुरु परमेश्वरारंङ साते अनंत जीवन खोकसिमी थल्जी गेह छि कम लोहग?” 19यीशुज़ि दोबि जुबाब रें, छि बजह तोह कि केई गिह्बी मोह्ड़े कुट्रातन भत्ते बे मोह्ड़े इच्च़ा तोह अंऊ सच्चा परमेश्वर शुह। 20केई परमेश्वरो हुकुम ता ञेंच़ातन, “हत्या थलाहू, मांजी कम थलाहू, चोरी थलाहू, हप्सी थाकुड़ु, केनोह याह बाहों आदर लोहु।” 21दोई कुहतो “दिह भत्ते ताह गेह बड़ेक्तर बेहच़ी मनेक्च़ातेग।” 22दिह रेड्रीरंङ यीशुज़ि कुहतो, “कांह अंद्रेग अयता ला इच्च़ा गप्पो, कमी तोह केनोह भत्ते धिर लंङहे च़रतु दंङ अंऊ टंगा-ढबाह तातन दुह गरीबातिंङ रें च़रतु। दंङ दोऊ थल अंज़े का गिऊ चेला बणेकतु। दंङ कनिंङ स्वर्गंङ असली धन खोकसोतो।” 23दिह रेड्रीरंङ दुह मिह सेहका उदास शुई, छना कुचे दुह महस ढबाहो घ्राक तोहई। 24यीशुज़ि दोबि खांई कुहतो “ढबाह घ्राहकातु परमेश्वरो राज्य रिंङ इबी अंयों खरे तोह। 25छना ऊंठो चेबतु मिक्सो बिचंङज़ि हुंज़ी खरे तोह ध्वांए ए दुह बे ला खरे तोह साहुकारो परमेश्वरो राज्यरिंङ इबी।”
26दिरंङ रेड्रा दोच़ी कुहतोर, “दंङ अतु उद्धार शुहबी तरपोतो?” 27यीशु ज़ि कुहतो, “अंऊ मीहतु दोरच़ी माह शोतो, दुह परमेश्वरो दोरच़ी शुबी तरपोतो।” 28पतरसे कुहतो, “ञेंहरे ता घरबार केट्रा कनु थले शुहचे इलजी तोतोंई।” 29यीशु ज़ि दोतंङ साते कुहतो, “गेह केतंङ हेले कुट्रातग झांह ठ्रोह अरीला माह अच़ि परमेश्वरो राज्यो थल्जी घरबार, मेच़ा, न्वारे, याह बाह, छिता कटु ब्याड़ा लाहसी शोतो; 30दंङ हेंतेग अंयों शुहदा महस ए माह खोकसोतो दंङ तुंखा अनंत जीवन माह खोकसोतो।”
एनोह सिमी पाहठी रिंङ यीशु यह्च़ा भविष्यबाणी
31दंङ यीशुज़ि सनी चेलारे शता शिल्ज़े दोतंङ कुहतो, “खांई हेनारे यरूशलेम शहरो हखा य्वातंई, दंङ अंयों लाह गप्पारे भविष्यवक्ताज़ि गेह मीहू योहऊ थल्जी कुहषी ततोर दोरे भत्ते पूरे शोर। 32छना कुचे गेह ऊई जातितु गुहड़िंङ रें च़रपोर कि दोच़ी गिऊ मज़ाक लोहर; गिऊ बेज़ती लोहर गिऊ टोईच़ी थू लोहर, 33कोड़ा रंङ साते गिह्बी घाह केओर, दोच़ी गेह सच़ी च़रपोर। दंङ गेह षुमु ध्याड़ो थल यह्च़ा षिङे योग।” 34पर चेला तिंङ दिह गप्पातु बिचंङज़ि छिल्ला गप्पा समझ माह अति; दंङ दिह गप्पा दोतिंङ प्याक्सा बंङज़िरी, दंङ छि कुहते दोतिंङ शुहंङसिए माह अति।
काणे भिखारी बि टिरा रंड्री
(मत्ती 20:29-34; मरकु 10:46-52)
35अपेहल यीशु यरीहो इलाकंङ पिचाते, दंङ इच्च़ा काणे मीह सड़को मुखंङ बंङज़ा भीख पेट्री लेहकी तोहई। 36दंङ दुह मीहतु जोईमी चाला थहशे रुहक्च़ी लेहती, “दिह छि शुहबी लेहकी तोह?” 37दोच़ी दोबि कुहतोर, “नासरत ओ यीशु इबि लेहकी तोह।” 38दंङ दोई हाऊषेके कुहतो, “हे यीशु, रज्ज़ा दाऊदो खानदानो योह गिऊ टोईच़ी दया लोहऊ।” 39“अरी तुहई, तुहई इबि लेहकी तोईरे, दोरे दोबि रैहच़ी लेहतिरे कि चुपे तोह; पर दुह ऊहई लाह हाऊषेक्पी लेहती, रज्ज़ा दाऊदो खानदानो योह, गिऊ टोहकठे दया लोहु।” 40दंङ यीशुज़ि खड़े शुहचे कुड़ी दोबि गिऊ कछंङ हतांई दंङ अपेहल दुह दोऊ कछंङ अंजा दंङ यीशुज़ि दुह रुहक्तो, 41“केई छि पेट्रातंई कि गेह कांह थल्जी लोहग?” दोई कुहतो, “हे प्रभु, दीह कि गेह खंड्री जुंज़ातग।” 42यीशु ज़ि दोबि कुतोह, “खंणु; गेह कनिंङ अईन लहज़ातग छना कुचे केई गिऊ टोहकठे विशवास लहज़ातन।” 43दंङ दुह दोथरे खंड्री लेहती दंङ परमेश्वरो तारीफ लहज़ा दोऊ थले शुहचे इलि; दंङ भत्ते मीहच़ी दिह खांऐ परमेश्वरो स्तुति लहरिर।
Айни замон обунашуда:
लूको 18: LBFNT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.