लूको 16
16
चुस्त भंडारी
1दंङ यीशुज़ि चेला तु हखा ला दिह कथा कुंहई, “अरीआ साहुकारो इच्च़ा खज़ान्च़ी तोहई, मीहज़ी दोऊ तुईज़ी दोऊ टोईच़ी इलज़ाम केहतोर कि दोई भत्ते ढबाह योह्च़े लेहकी तोह। 2दंङ साहुकारे खज़ान्च़ी बि बुलाके कुहतो, कांह पाहठी गेह दिह छि थापि लेहकी तोतोग? केई गिऊ ढबाह रंङ साते छि लहतन केई दिऊ लेखा रौं? छना कुचे कांह दिऊ थल खज़ान्च़ी माहकेषोन।” 3दंङ दुह खज़ान्च़ी सोचेकच़ी लेहती, दा गेह छि लोहग? छना कुचे गिऊ मालिक दा गिऊ दोरच़ी खज़ान्च़ी ओ कम दोरच़ी गिह्बी हुंच़े च़रपोतो। मज़दूरी ता गिऊ दोरच़ी शिल्ज़ी मरपोतो; दंङ भीख पेट्री गिह्बी षेहद अपा। 4दा गेह ञेंए केहतग कि गेह छि लोहऊगा; कि अपेहल गेह खज़ान्च़ी ओ कमो दोरच़ी हुंच़े च़रपोर ता मीहरेर गिऊ मदत लोहर।
5दंङ दोई एनोह मालिको कर्ज़दारा तु बिचंङ इच्च़ा इच्च़ाबि बुलाकतो दंङ तुहई मुखो दोबि रूह्कातो, कांह टोईच़ी गिऊ मालिको अंयों कर्ज़ा तोह? 6कर्ज़दारे कुहतो, राह मण (इच्च़ा मण, अतु अंद्रेग 37 लीटर तेल अपि) जेतूनो तेल, दंङ खज़ान्च़ी दोबि कुहतो, केनोह बही-खाता लेहप्तु निंज़ो सा मण च़ेऐ च़रतु। 7दंङ खज़ान्च़ी अईदीबी रूहकातो, कांह टोईच़ी अंयों कर्ज़ा तोह? कर्ज़दारे कुहतो, राह मण छ्वा, दंङ खज़ान्च़ी दोहरंङ कुहतो, केनोह बही-खाता लेहप्तु दंङ पिनिज़ा च़ेऐ च़रतु।
8“दंङ साहुकारे दुह चलाक खज़ान्च़ी ओ तारीफ लहतो, कि केई अंयों चलाकी रंङ साते कम लहतन; छना कुचे ध्यांए ठ्रोह दिह संसारो मीहरेर एनातु साथीतंङ साते मुक्को रीति रिवाज़ ए चाल चलनारिंङ धर्मी मीहबे ला महस चलाक तोतोर।” 9दंङ गेह केतंङ कुट्रातग कि संसारो ढबोह दोरच़ी केन्दु थल्जी झांह ठ्रोह साथीरे बणाके च़रतुंई; कि अपेहल दुह ढबाह योह्सा योतो ता दुह साथी केहरे अनंतकालो चुंङ रेंज़ा शोतो।
10अरी क्वाच़ी-क्वाच़ी गप्पातु थल्जी ईमानदार तोह दुह मोह्ड़े गप्पातु थल्जी ला ईमानदार तोह: दंङ अरी महसे क्वाच़ी-क्वाच़ी गप्पातु थल्जी बेईमान तोह, दुह मोह्ड़े गप्पातु थल्जी ला बेईमान शोतो। 11दिऊ थल्जी अगर केहरे संसारो ढबाहरिंङ सच्चे माह केहषी ता स्वर्गीय ढबाह केतिंङ अच़ि रमोतो? 12दंङ अगर केहरे पराया ढबाहाओ थल्जी सच्चे माह केहषी ता, दंङ अच़ि केतिंङ दुह रमतो अंऊ केहतु ए तोह? 13“अच़िला परगरे इच्च़ा टेमारिंङ झुह्ट मालिको सेवा लेह मरच़ि; छना कुचे दोई इच्च़ारंङ साते बैर अईदिरंङ दाह तोहतो; छिता इदिरंङ मिलेकी बंङज़ोतो अईदीबी क्वाच़ी चेहपोतो: केहच़ी परमेश्वर ए ढबाह झुल्लो सेवा लेह मरच़ि।”
यीशु फोहा उपदेश
14फरीसी मीहरे अरी लालची तोईरे, दिह भत्ते गप्पारे रेड्रीरंङ साते यीशु मज़ाक लहज़ी लेहतिरे। 15यीशुज़ि दोतंङ साते कुहतो, केहच़ी ताह मीहतु तंङषी केनाहतिंङ धर्मी कंड्रातंई, पर परमेश्वरे केहतु सेहम ञेंहच़ा, छना कुचे छि चीज़ मीहतु थल्जी खास तोह, दुह परमेश्वर तुईज़ी अशुद्ध तोह।
16“अपेहल तचेक यूहन्ना बपतिस्मा रंड्रा अंजा, दोपहल तचेक मूसा ओ कानून ए भविष्यवक्तातु खबर केहतु थल्जी रुठे अम कंड्रा तोईरे। दंङ परमेश्वरो राज्यो पाहठी रूठे खबरो प्रचार शुबी लेहकी तोहई, दंङ हर इच्च़ा मीह परमेश्वरो राज्य रिंङ शक्ति रंङ साते अपि लेहकी तोह। 17सर्ग ए धरती योह्सा इबि तरच़ी। पर परमेश्वरो बणाएषी कानूनो इच्च़ा ला बिंदु माह योसतो।” 18“उदाहरणो थल्जी अगर अच़िला मीह एनोह मेच़ा केह्चे ऊई तंङ साते ब्याह लोहतो ता दोई मांजी कम लाह, दंङ अच़ि झांह ठ्रोह केह्षा मेच़मीरंङ ब्याह लोहतो ता दोई ला मांजी कम लहज़ा।”
साउकार मीह ए गरीब लाज़र
19यीशु ज़ि अई इच्च़ा कथा कुंई, “इच्च़ा साहुकार मीह तोहई अच़ि मंहङे-मंहङे मखमलो खमज़ेर लेहच़ते दंङ हर इच्च़ा ध्याड़ा रुठे-रुठे बगत ज़ोवाते।” 20दंङ लाज़र मिन्दु इच्च़ा गरीब मीह तोहई, अतु भत्ते फुकारिंङ फोलरे, मीहरे रोज दोबि कुरच़ा दुह साहुकारो पेतंङो डेऊढी कछंङ केहच़ी चरच़ातेर। 21छना कुचे दोई चेहच़ाते कि दुह साहुकारो सेह केहषी ए दह्चे बगतारंङ साते घेंङौ खोकटुंङ पिंङे च़रपोग; दोर तिंङ खुह्ई अंज़े दोऊ यहच़ातेर। 22दंङ झांह शुई कि इच्च़ा ध्याड़ा दुह गरीब मीह सीए इलि, दंङ परमेश्वरो स्वर्गदूता ज़ि दुह कुर्ज़े ञेंहतु बाह-मेमे अब्राहम रंङ साते इज्ज़तदार ठाहरीरिंङ तहरि। दंङ दुह साहुकार मीह लाह सीए इलि दंङ मीहज़ी दुह ला पथेके च़रति।
23दंङ दुह अधलोकङ इलि दोर तिंङ दुह महसे दुखारिंङ तंड़पेक्पी लेहकी तोहई अपेहल दोई खेका खांई, दंङ दोई ओईतार च़ि दुह लाज़राबि अब्राहम रंङ साते खंदो। 24दंङ दोई हाऊष रें कुहतो, हे बाह, अब्राहम गिऊ टोईच़ी दया लोह दिह लाज़राबि गिऊ कछंङ च़रतु, ताकि दिह एनोह ब्रेमज़ो मुख तीरिंङ केह गिऊ लेह सोहई लोहतो, छना कुचे गेह देर्तिंङ महस टेहषी रंङ साते तंड़पेक्पी लेहकी तोतोग।
25पर अब्राहमे कुहतो, हे योह, हिद लोहऊ कि केई केनोह ज़िन्दगीरिंङ रूठे चीज़ा रंङ साते आराम लहतन। दंङ दिह लाज़रे ला महसे दुख उठाके चरच़तो, दा हेंतेग दिह देर्तिंङ सुख शांतिरंङ साते तोह दंङ कांह टेहषीरिंङ तंड़पेक्पी लेहकी तोतन। 26दंङ दिह भत्ते गप्पारे केह ञेंहतु ए केहतु विचंङ इच्च़ा मोह्ड़े गड्डा केहषी तोह कि अरी देरच़ी दोहर केहतु कछंङ अपि जुंज़ा, दुह इबि मेस; दंङ माह दोरच़ी अरीया देहर ञेंहतु कछंङ अपि तरपोतो। 27दुह साहुकारे कुहतो, दंङ हे बाह, अब्राहम गेह करंङ साते बिनती लहज़ातग कि केई लाज़र बि गिऊ बाहऊ चुंङ च़रतु, 28छना कुचे गिऊ ङा न्वारे तोतोर; गेह जुंज़ातग कि दुह इलजे गिऊ न्वातिंङ खबरदार लोहतो, झांह शुहबी मेस कि दोहरेला दिह दुख खांची अपोर। 29अब्राहमे दोबि कुहतो, दोतु कछंङ खबरदार लहच़िमी थल्जी मूसा ओ कानून ए भविष्यवक्तातु च़ेहसी कताबरे तोह। दोतिंङ दुह रेड्री ए दोतु भाषे लेह जूंस।
30दोई कुहतो, “हे बाह अब्राहमा; अगर अच़िया दोतिंङ खबरदार लोहर, ता दोरे एनोह पापो दोरच़ी सेहम किर्ज़ोर। 31दोई दोबि कुहतो, अपेहल दोच़ी मूसा ए भविष्यवक्तातु हुकुम माहमनेक्च़ातोर, दंङ सीए दोतु बिचंङज़ि अरिया श्रींङी इलि ताह तांला दोरे बिशवास माह लोहर।”
Айни замон обунашуда:
लूको 16: LBFNT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.