Hawaareta Ooso 4
4
Phexroosinne Yohannisi Ayhuda Duulataso Shiiqo
1Phexroosinne Yohannisi asaas haasayan dishin qeeseta#4:1 Qeeseta: Qeeseta issi issi Geeshsha Maxaafati qeeseta halaqa geettes. Halaqatinne Xoossa Keeththaa naagizayta halaqay qasseka Saduqaaweti isttako yida. 2Histtidi Hawaareti asaa tamaarsizayssassinne Yesusa baggara beettida hayqqidayta denththaa gishshas sabbakizayssas keehi hanqettida. 3Phexroosanne Yohannisa gadey qammishin oykkidi wonttana gakkanaas qasho keeththan ayssida. 4Gido attiin qaalaa siyida asaappe dariza baggay ammanides; ammanida attuma asaa qooday gede ichchashu shii gakkanaas dhoqqu gides.
5Wonteththa gallas istta halaqatinne cimati qasseka Muse wogaa tamaarsizayti Yerusalaamen shiiqida. 6Istta qeeseta halaqa Haannaynne Qayafay, Yohannisi, Iskindiroosinne qeeseta halaqaso asay wuri heen beettida. 7Isttika Phexroosanne Yohannisa ba giddon aaththi essidi, «Hayssa intte ooththizay aaza wolqqanee? Woykko oona sunththanee?» giidi oychchida.
8He wode Phexroosi Xillo Ayanan kumidi, «Intteno dere halaqatoo! Dere cimatoo! 9Intte hach ha toho sila addezas oosettida lo7o oosoy waani izi paxidaakko intte nuna oychchizaa gidikko, 10intte kaqqiin Xoossi hayqoppe denththida Naazirete Yesus Kirstoosa sunththan izi paxidayssanne intte sinththan izi eqqidayssa intteka Isra7eele dere asay wuri hayssa erite. 11Izikka intte keeththa hiillati leqqi aggida shuchchay gimbe keeththas gula#4:11 Gula: Gula gizayssa issi issi bagga gamoththo qaalan magala woykko yochcha shuch geettes. bolla bollara woththiza shuch gidides.#Maza 118:22 12Atoteththi hara oonankka baa; saloppe garsa baggara nu asa nayti attana mala nuus imettiday hayssafe hara sunththi deenna» gides.
13Ayhudata duulata asaykka Phexroosinne Yohannisi hessaththo xali haasayzayssa be7idi istti tamaarontta as gididayssa eridi malalettidanne istti kase Yesusara dizayta gididayssa akeekida. 14He paxida addezi isttara eqqi dishin be7ida gishshas isttas hara ooththanaas gaasoykka dhaydes. 15Hessa gishshas istta duulataappe kessana mala azazida. Hessafe qasseka shiiqettidi ba giddon zorettida. 16Ba giddon, «Hayta asata wosttinoo? Yerusalaamen diza asay wuri istta kushen hanida gita malaataa erides. Hessa gishshas nu ha yo7oza asaa baleththanaas dandayokko. 17Gido attiin hayssi yo7ozi dere giddon keehi aakkontta malanne hayti asati nam7anththo hayssa ha sunththaan hara oonaska yootontta mala isttas lo7eththi yootana» gida.
18Istta xeygidinne mulekka Yesusa sunththan haasayontta malanne tamaarsontta mala azazida. 19Phexroosinne Yohannisi qasse zaaridi, «Nuni Xoossafe bollara inttes azazettanaas bessizaakko ane intte Xoossa sinththan pirdite. 20Nuni nu be7idayssanne nu siyidayssa haasayanaappe guye gookko» gida.
21Qasseka istta bolla mandidi yeddida; gaasoykka hankko derey wuri hanida yo7oza gaason wurikka Xoos galatiza gishshas istta qaxxayanaas dandaybeettenna. 22He gita malaataan paxida addezas layththay oyddu tammaafe bolla.
23Phexroosinne Yohannisi qashoppe birshettidi ba asataakko simmidi qeeseta Halaqatinne Dere cimati istta gidayssa ubbaaka yootida. 24Isttika hessa siyida mala ba qaala dhoqqu histtidi issife Xoossaako, «Wogga Godawu! Neni salonne sa7a, abbanne abba giddon dizayta wursa medhdhadasa.#Kessa 20:11; Nahi 9:6; Maza 146:6 25Ne ashkaraa nu aawaa Dawite doonara Xillo Ayanan,
« ‹Kawoteththay aazas
hanqetti dendidee?
Derey aazas mela maqettizee?
26Biitta kawoti issife gaaggidi
biitta haarizayti
issi bolla shiiqettidi
Godaa bollanne dooretti
tiyettidayssa bolla duulatida›
gi waassida.
27«Tumappe Herdoosinne Phanxoosa Philaxoosi Isra7eeletaranne hara dere asaara hanno katamayn ne doora tiyda geeshsha naaza Yesusa bolla yo7o qachchanaas shiiqettida.#Luqa 23:1,7-11; Mato 27:1-2; Mar 15:1; Yoha 18:28-29 28Hayssanka ne wolqqaninne ne shenen kase ne qoppidayssa istti polida. 29Godoo! Ha7ikka istta mandeza ne beya; nuni ne aylleti ne qaala babbontta kumeththa xalateththara yootana mala dandayssa. 30Paththanaas ne kushe micca. Ne naa geeshshaza sunththan gita malaata ooththa» gida.
31Istti woossidaappe guye istti dizasoy qaaxxides; wurikka Xillo Ayanan kumidi Xoossa qaala xalateththan yootida.
Ammanizayta Issifeteththa Duus
32Ammanizayti wurikka issi wozinaninne issi qofan gaaggi deettes. Isttas dizay wuri issi bolla dees attiin baas dizaaz, «Hayssi taas buzo miishsha» gizaadey deenna.#Hawa 2:44-45 33Hawaaretikka Godaa Yesusa denththaa gita wolqqan markkateth oykkida; ubbaa bolla gita Xoossa kiyateththi dees. 34Istta giddon metotanchchay issaadeyka deenna; gaasoykka gade gidiin, keeththe gidiin baas dizaa ubbaa bayzi bayzi shiishshida miish, 35Hawaareta kushen woththidi issaades issaades izas koshshiza mala gisheettes.
36Qophiroose geetettizason diza Yooseefe geetettizaadey issi Lewe bagga asi dees; izikka Hawaaretan, «Barnabaasa» geetetti summides. Hessas birsheththay, «Minththeththo naa» guussa. 37Izikka ba gade bayzida miishshaa ehidi Hawaareta kushen woththides.
Айни замон обунашуда:
Hawaareta Ooso 4: GM
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
The Word for the World International