Yowani 17
17
Yesu áchěmera era mwa Ongo
1Mango Yesu ábaa era amálaa kuteta ei myasi, era kutumbikisa kwa nguba na áteta mbu: «Tata, echihangi chaíkire mira. Rero, úraa wányeresa etunda nyi Mwana wao*, nanyi nyikwêrese'li. 2Bushi wányeresise mira ebuashi kwa bandu boshi, chasiya ba wányeresise nanyi nyibêrese ekalamo ke'suku ne'mango. 3Na'ku kalamo ku kakano: ebandu bàkumenye kwa weine una Ongo we'kanangana, banányimenye nyono Yesu Kirisito, nyi wátumaa. 4Emulimo wányitumaa mbu nyiyáa kuira muno butala, nàumalire. Bushi no'ku, nàkwêresise etunda. 5Rero Tata, lye'tunda nábaa nyitúsa era muhondo sao, mango ebutala bwábaa bùtasa kubumbwa, unyêresaa'li kanji.»
Yesu émera ebanafunzi bai
6Yesu era kuteta mbu: «Ongo Tata, Woyo, uwànyêresaa ebandu ba weine wálondolaa mwa butala. Nanyi nera kunálinda nábalosa woyo únde. Abu bandu babáa bao, si weine wera kunyeresa'bo. Nabo bera kunátunda echinwa chao. 7Rero, bera bèshi kwa byoshi bya wámbaa, era ùli yi'binátengire. 8Bushi emyasi era wanyítumaa i'nanábabwirire, nabo banáyemerere mwa michima yabo. Bushi no'ku, bérire bámenya kanangana kwa era ulí yi'nàtengaa. Kanji banêmerere kwa uwánanyitumaa.
9«Abu wànyêresise, bu nénjire némera, bushi beke bu batúla bao. Si ndénjire némera ebandu bo'mwa butala. 10Ebandu ba nyitúsa boshi banátula bao, na ba utúsa boshi nabo banátula banyi. Rero, kurengera abu bandu ku nénjire nêresibwa etunda.
11«Nyono, ndáchibe muno butala bushi nyingáhuba era ùli. Si beke mubo mu banáchiri. Bushi no'ku, Ongo Tata u'Mubuya-buya, nabo úndaa wábalanga kwa buashi bwe'sina lyao lya wàmbaa. Echera chi chingátuma nabo bénde bába mwa buuma, ngo'kwa netu tu babiri tutúla mwa buuma.
12«Mango nabáa nyìri nabo, mwa buashi bwe'ri sina lyao wàmbaa mu nanábalangaa. Bushi no'ku, kutáli chiro na muuma mubo ola wàerire, kureka ola wálawaa ekuera, chasiya bya byǎnjikirwe mwa Maanjiko Mabuya-buya biberere.
13«Rero, nyono ono nera náhuba era ùli. Si kuno nyichíri muno butala, nyichíri náteta ei myasi, chasiya elumoo lwanyi lunene lwa nyéte, nabo lúbe mwa michima yabo. 14Nàbakangirise emyasi yao mira, ne'bandu bo'mwa butala babáhombire, bushi beke bàtatula bobuno butala, ngo'kwa nanyi ndanátula wámwo. 15Rero, ndàkwěmire mbu ubákulaa muno butala, si nákwěma undáa wábalanga ku Wamusimu*. 16Bàtatula bobuno butala, ngo'kwa nanyi ndanátula wa'mwo. 17Ùbairaa kuba baanda bao kanangana. Ne'chinwa chao chi chinátula che'kanangana. 18Kwa wányitumaa muno butala, ku nanyi nanábatumire'mo. 19Nàchiirire kuba muanda wao bushi nabo, chasiya nabo bábe baanda bao kanangana.»
Yesu émera ebemeresi boshi
20Yesu era kuendekera éma mbu: «Ongo Tata, atá bano bandu beine bu nánemera oshâo. Si némera ne'banji ba bachíri bangányemerera mwa michima yabo kurengera emyasi era banola bangénde báteta era luulu sanyi. 21Bushi no'ku, Tata nákwěma abu boshi béndee bába mwa buuma ngo'kwa nyono nao tutúla mwa buuma. Kanji nákwěma bábe mwa buuma netu, chasiya ebandu bo'mwa butala běmerere kwa woyo uwánanyitumaa.
22«Etunda lya wányeresaa, nanyi nàbêresise'li chasiya bábe mwa buuma ngo'kwa netu tutúla mubo. 23Kukuteta mbu nyíbe mwa buuma nabo, nao úbe mwa buuma nanyi. Mwo'lu, bábe mwo'bu buuma kanangana. Ne'chi chi chingátuma ebandu bo'mwa butala bálinda bámenya kanangana kwa uwányitumaa. Kanji baménye no'kwa ùsimire abu bandu bao ngo'kwa utúla unyísimire.
24«Ongo Tata, abu bandu wànyeresise náhonda bábe ala'uma nanyi mwa chisiki cha nyingába'mo, chasiya balóle kwa bulangare bwanyi. Obu bulangare, woyo uwámbaa'bo, bushi wányisimaa mango wábaa ùtasa kubumba ebutala. 25Tata, woyo uwénde wáira emyasi era ìtungenene. Ebandu bo'mwa butala bàtatula bàkwîshi, si nyeke nyikwîshi. Na bano wànyêresise, nabo banátula bèshi kwa uwánanyitumaa. 26Nàbalosise woyo únde. Kanji nyingánaendekera kubalosa woyo, chasiya ei nzii ùnyitusa'ko, nabo anáendekeraa kuba mwa ndanda sabo. Nanyi nyeine, nyináéndekere kuba mwa buuma nabo.»
Айни замон обунашуда:
Yowani 17: tbt
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2017 Wycliffe Bible Translators, Inc.