Matthieu 10
10
Aneengie amasevou na Jésus
(Bono na Marc 3:13–19, Luc 6:12–26)
1Jésus amasevoa nzima amôgôô n’amôgôô abaé gôéba aneengie edi. Ameetsa ahngô ényanga gôékuséda édidi ébévani gôndé oma na gôédôngéda mabeea metso na dipôpéa yetso. 2Ane amasevoukuni na amatômuku na Jésus nzima n’oma abaé mina maô, ône amapanga te Simon amatetuku mbe Pierre, na muaneyedi André. Môvo te Jacques na muaneyedi Jean angô abaé te ana aZébédée. 3Avo te Philippe na Barthélemy na Thomas na Matthieu môbongi adepu. Avo dôta te Jacques muanee aAlphée na Thaddée. 4Môvo te Simon amabaka gétômbiatômbia gô mabégô matômi atsenge. Na môvo dôta te Judas Iscariote to ône amavanga gôékaba Jésus gô mogo madudeo.
Jésus amakeda ane amasevouni nzima n’abaé
(Bono na Marc 6:7–13, Luc 9:1–6)
5Jésus amatôma aneengi edi nzima n’abaé na gô mbôkaye. Amadékéda ahngô mbe: Nônakea na gô tunguye didigaa ane asaba Ajuif. Nônabuéa na gô misenge miaSamarie. 6Buedi gôékea na gôndé oma aIsraël andé ga mandombo mamadimbanani. 7Gôkeanye ikédani na nigôani mbe, ôkumu aNzambé ôweseyi na gôndé wa n’anyô. 8Dôgédani ane abeeani, na kunduani ane awani, na dôngédani asi ébeea éagega na patsani édidi ébévani. Anye nômadiia ôbiia gévané, tambô itsani akanyô te ôbiia gévanéô. 9Na Jésus amadékéda aneengie mbe: Nônatsua ta na ôkiti gô ébémbé éangoyi yanyô. 10Nônakea na gébémbé samitôô na ngoyi dibaé. Nônakea na pondu, na péndé gôésipéda anye. Endé te nane. Môyanzi eetsô môyakô edi te itsôgô.
11Na Jésus amoomba éongô ahngô mbe: Vangatsiga anye gô mbôka na gô môsenge, nôbono te ane anganôtubéda gédigaa. Digaani gô ebee ône ngu na vanganôtôganye gô mbôka nene. 12Vangeengéa anye na gô eba amôma vovoni mbe: Mbe gétabé saNzambé gébaké n’anye. 13Okô kumu eba asinyôngéô énôkenea, nôtôani kômbône éanyô éagétabé gôndé angô. 14Okô kumu yambôka asinôsingéa gôéengéa na asanyôngéô éôkô meekédu manyô, nôtôgani vandé angô. Dumédani makôdôme ébisie. Te géevédéô saô mbe: Nôwema. 15Nanôbeenda na gô pie mbe gô nyaa amôtsundu asi mbôka nene angasisédu. Na gésisédéôge saô géngootéa géne sasi Sodome na asi Gomorrhe.
Gékuanô géngaba gô mbene
(Bono na Marc 13:9–13, Luc 21:12–17)
16Jésus angô mbe: Oôkôni buedi. Me nanôkeda mônongovo ga mandombo mandé va gatse anzego. Tambô banaki n’ekena ga nyogo. Bakani dôta ga ménga gébé na mangônzô. 17Bakani n’ekena gôébégo oma anganôkeda na gô yeba yamisoso. Anganôbita na mibitô gô yeba yewanyéô. 18Nôngabuédu va mbene ane atômani na ve mbene amôtômi atsenge te gô inami. Vandé anye mbangi yami nônganigôa ahngô tsangô éami. Buéyé na ane asaba Ajuif angookô. 19Vangakedu anye gôétsundédu gô eba amisoso nônakebangana môtangôe ôngaba n’anye na mônongoe ônganigôa anye. Vangaba anye va mbene aatsundédi, nigôani te éne éngabeendu anye na Nzambé. 20Esangavovo anye, éngavovo te gédidi SaTétanyô Nzambé géndé n’anyô.
21Oma angakaba anayaô gôéahyôhéda. Tétee ahngakaba anaô te mônongovo. Anee angakoga aka avingi atétee yaô na iyee yaô na ahngahyôhéda. 22Oma muetso ahngavinga anye gôébégô nôndéké omami. One angasipa gô gékuanô ngu na v’ekôdéô, angoobou. 23Vangakuanô anye gô mbôkane édigaanye, tôtani na gô nyene mbôka. Me nanôpandôéda mabégô mema mapie. Nôsangoongôa ékôdéda mbôkaye yetso yagô tsenge éaIsraël mbe me Muana Amôma tsavigaka.
24Jésus angô mbe: Môneengi asoongôa éôtéa môékédi edi. Na môyanzi asoongôa éôtéa môtômine wedi. 25Ene éamôsôba te mbe môneengine abaké ga môékédine wedi, na môyanzine abaké ga môtômine wedi. Okô pene éambumune nyetso étetu mbe Béelzébul, tambô na muetso asi mbumu nene angatetu te mônongovo.
One ookanô gomo
(Bono na Luc 12:2–7)
26Nônookô môma gomo. Eetso émasuéguni éngaba ématsutsuuni na éetso éav’esooe éngaba v’ekanga. 27Ene ébeenda me anye gô tsina evitsi, nigôani éangô g’ômanda. Ene éôkô anye v’esooe, pandôédani éangô v’ekanga. 28Nônookô oma gomo, ane andé na ngudi yeyôha ôtôe woo. Ivô ôôkôni Nzambé gomo. Te ône andé na ngudi yeyôha ôtôe na gédidige setso gô mungu asoto. 29Tônyoyi tôbaé tôsômbédu dodepo. Buéyé vane, ôkô vivo viaagi na gô tsina, amuene Nzambé asabômu mbe viaagi. 30Tambô n’anye oma, buéyé n’otangôe atsôgé yanyô Nzambé asambômu angô. 31T’ebandô neendi mbe, nônookô gomo. Na môma, na nyoyi diyekani, te môma ootéa na tsoongo va mbene aNzambé.
Ane amema Jésus na ane atôna Jésus
(Bono na Luc 12:8–9)
32Jésus angô mbe: Muetso ane amema va mbene oma mbe: Me te môma aChrist, me dôta nangamômema va mbene aTéta andé g’ôba mbe: Odôô te wami. 33Ivô ône atôna me va mbene oma, me dôta nangamôtôna g’ôba va mbene aTéta.
Yenga étatôa oma
(Bono na Luc 12:51–53, 14:26–27)
34Menyani mbe me tsiviga gôéétsa oma atsengene gétabé. Me Jésus tsiviga gôévambéda oma, navigi na yenga éaaganéda oma. 35Me navigi gôéaaganéda muana na tétedi na muana na yeedi, na tômbô n’ogoyedi ogeto. 36Adudeo amôma te asi mbumu edi.
37One anyôngéô me, na angô ootéa ényôngéô yeedi na tétedi asaba kuanakue gôétetu mbe mômami. One anyôngéô me, na angô ootéa ényôngéô muanedi amômôgôô na muanedi amôgeto, angô kaka mômami. 38One asatsua gésumuge sedi sowa na akea nzéepo n’ami, angô asangatetu mbe, mômami. 39One anyôngéô ékenea monyoe wedi amuene, angaôdimbanéda. Ivô ône adimbanéda monyo edi gô inami angaôdenga.
Misendamie
(Bono na Marc 9:41)
40One asinga anye, asinga dôta na me. One asinga me asinga dôta na ône amatôma me. 41One asinga môpandôédi amatasa maNzambé gôndé angô môpandôédi, angadiia misenda ngu na mine mingadiia amuene môpandôédi. Na ône asinga môgobedi aNzambé gôndé angô môgobedi aNzambé, angadiia misenda mivo na mine miamômane aNzambé. 42Nanôbeenda ébégô édué éapie mbe, ône eetsa gébungu sameba masodi na gôndé môvo va gatse aneengie ami, gôndé angô mômami, môétsine angadiia misenda.
Айни замон обунашуда:
Matthieu 10: TSV
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Alliance Biblique du Gabon (Bible Society in Gabon) 1983