Phŭn Blŭng 11
11
Plơi Ƀaƀĕl
1Pah anŭn bih-tih mơnuih dŏ mơ̆ng lŏn kơnah hmâo klơi pơhiăp ha tô̆ đơč, nŭn hiăp ha tô̆ nŭn mơ̆n. 2Tơl gơñu bat nao ping gah ngŏ, gơñu ƀôh čol ha boh mơ̆ng ƀon Sinơ, gơñu dŏ hĕ pơ anŭn. 3Jr̂ŏng nŭn gơñu pơhiăp nao r̂ai gŏp gơñu: «Nah ta ngă ĕt, jr̂ŏng nŭn čuh br̂ơi ñu djăng.» Gơñu yua ĕt tang br̂ơi bohtâo, wŏt yua ia ƀlit#11:3 Ia ƀlit nŭn hla ti kơtăk mơ̆n, ñu bĭ r̂ai mơ̆ng kơyâo ôh, ñu bluh đĭ mơ̆ng kơnah đơč. tang br̂ơi lŏn. 4Jr̂ŏng nŭn gơñu laĭ: «Nah ta ngă plơi pr̂ŏng čr̂oh ta pô, dăp ngă sang ha boh glong đĭ tơl ngŏ adai, čiăng r̂ăng i ƀŏ ta, huĭ a pơklah lôi gŏp ta, yô dŏ bŏ mơ̆ng lŏn kơnah.» 5Plai dŏng, Yêhôwa tr̂ŭn r̂ai ep lăng plơi pr̂ŏng dăp sang glong môt nă mơnuih ngă. 6Jr̂ŏng nŭn Yêhôwa laĭ: «Nêne, gơñu sô̆n-sat ha tô̆, bih gơñu hiăp klơi pơhiăp ha tô̆ mơ̆n. Jơ̆ laĭ gơñu ngă jr̂ŏng buă ne, nŭn bih nŏ yĕt gơñu khư̆t ti ngă, anăm soh-sel. 7Nah ta tr̂ŭn nao lŭk bơwĕč-bơwŏl lôi klơi pơhiăp gơñu, bĭ br̂ơi gơñu thâo hông nao r̂ai klơi pơhiăp duă gŏp gơñu ôh.» 8Nŭn yơh, Yêhôwa ngă br̂ơi gơñu pơklah gŏp gơñu, biă đuĕ mơ̆ng anŭn yô dŏ bŏ mơ̆ng lŏn kơnah, jr̂ŏng nŭn gơñu bĭ ngă plơi pr̂ŏng nŭn dŏng tah. 9Yua nĭng nŭn yơh, r̂ăng mơ̆ng iâo plơi nŭn “Ƀaƀĕl,”#11:9 Plơi Ƀaƀĕl ha tô̆ «Plơi Ƀaƀilôn» nŭn boih. Ƀŏ Ƀaƀĕl keng-keng boh hiăp Hêbrơ laĭ lŭk bơwĕč-bơwŏl. yua pơ anŭn Yêhôwa lŭk bơwĕč-bơwŏl lôi klơi pơhiăp bih-tih mơnuih dŏ mơ̆ng lŏn kơnah. Yêhôwa ngă br̂ơi gơñu pơklah gŏp gơñu, biă đuĕ mơ̆ng anŭn yô dŏ bŏ mơ̆ng lŏn kơnah.
Nă čo Sĕm
(1R̂oi 1:24-27)
10Ne yơh klơi a čih čr̂oh ƀŏ nă čo Sĕm.
Dua thŭn dơdơi mơ̆ng ia lip, Sĕm hmâo nă đahkơi a iâo ƀŏ ñu Ơpasat, pah anŭn Sĕm hmâo ayŭ 100 thŭn. 11Dơdơi mơ̆ng a pơpôn Ơpasat, nŭn Sĕm dŏ dĭp hmâo 500 thŭn dŏng, wŏt ñu hmâo nă đahkơi nă đahmơi pơkŏn dŏng he mơ̆n.
12Tơl Ơpasat hmâo ayŭ 35 thŭn, nŭn ñu hmâo nă đahkơi a iâo ƀŏ ñu Sêla. 13Dơdơi mơ̆ng a pơpôn Sêla, nŭn Ơpasat dŏ dĭp hmâo 403 thŭn dŏng, wŏt ñu hmâo nă đahkơi nă đahmơi pơkŏn dŏng he mơ̆n.
14Tơl Sêla hmâo ayŭ 30 thŭn, nŭn ñu hmâo nă đahkơi a iâo ƀŏ ñu Hêƀơ. 15Dơdơi mơ̆ng a pơpôn Hêƀơ, nŭn Sêla dŏ dĭp hmâo 403 thŭn dŏng, wŏt ñu hmâo nă đahkơi nă đahmơi pơkŏn dŏng he mơ̆n.
16Tơl Hêƀơ hmâo ayŭ 34 thŭn, nŭn ñu hmâo nă đahkơi a iâo ƀŏ ñu Phalêk. 17Dơdơi mơ̆ng a pơpôn Phalêk, nŭn Hêƀơ dŏ dĭp hmâo 430 thŭn dŏng, wŏt ñu hmâo nă đahkơi nă đahmơi pơkŏn dŏng he mơ̆n.
18Tơl Phalêk hmâo ayŭ 30 thŭn, nŭn ñu hmâo nă đahkơi a iâo ƀŏ ñu Rêhu. 19Dơdơi mơ̆ng a pơpôn Rêhu, nŭn Phalêk dŏ dĭp hmâo 209 thŭn dŏng, wŏt ñu hmâo nă đahkơi nă đahmơi pơkŏn dŏng he mơ̆n.
20Tơl Rêhu hmâo ayŭ 32 thŭn, nŭn ñu hmâo nă đahkơi a iâo ƀŏ ñu Sêruk. 21Dơdơi mơ̆ng a pơpôn Sêruk, nŭn Rêhu dŏ dĭp hmâo 207 thŭn dŏng, wŏt ñu hmâo nă đahkơi nă đahmơi pơkŏn dŏng he mơ̆n.
22Tơl Sêruk hmâo ayŭ 30 thŭn, nŭn ñu hmâo nă đahkơi a iâo ƀŏ ñu Nakhô. 23Dơdơi mơ̆ng a pơpôn Nakhô, nŭn Sêruk dŏ dĭp hmâo 200 thŭn dŏng, wŏt ñu hmâo nă đahkơi nă đahmơi pơkŏn dŏng he mơ̆n.
24Tơl Nakhô hmâo ayŭ 29 thŭn, nŭn ñu hmâo nă đahkơi a iâo ƀŏ ñu Thêra. 25Dơdơi mơ̆ng a pơpôn Thêra, nŭn Nakhô dŏ dĭp hmâo 119 thŭn dŏng, wŏt ñu hmâo nă đahkơi nă đahmơi pơkŏn dŏng he mơ̆n.
26Tơl Thêra hmâo ayŭ 70 thŭn, nŭn ñu hmâo nă đahkơi klâo r̂ăng, a iâo ƀŏ gơñu Abram, Nakhô, dăp Haran.
Nă čo Thêra
27Ne yơh klơi a čih čr̂oh ƀŏ nă čo Thêra.
Thêra hmâo nă đahkơi klâo r̂ăng: Abram, Nakhô, dăp Haran. Haran hmâo nă đahkơi a iâo ƀŏ ñu Lot. 28Haran djai ti năp Thêra ma ñu, mơ̆ng plơi a pơpôn ñu, plơi Ơ, plơi môt sô̆n-sat Khălđê. 29Abram dăp Nakhô, gơñu dŏ bơnai, gah bơnai Abram a iâo ƀŏ ñu Sarai, gah bơnai Nakhô dŏng, a iâo ƀŏ ñu Milka. Milka nă đahmơi Haran, Haran nŭn yơh ma Milka dua ñu Yihka. 30Sarai ñu đahmơi pơlao, ñu bĭ hmâo nă ôh.
31Thêra djă ba Abram nă ñu, dăp Lot nă Haran (Lot nŭn čo Thêra), wŏt Sarai nă pơtâo ñu (Sarai nŭn bơnai Abram nă ñu), gơñu biă mơ̆ng plơi Ơ, plơi môt sô̆n-sat Khălđê, čiăng nao pơ lŏn-ia Kanan. Gơñu ka tr̂uh pơ Kanan ôh, gơñu tơl gơi plơi Kharan đơč, nŭn gơñu dŏ hĕ pơ anŭn. 32Bih-tih thŭn Thêra dŏ dĭp hmâo 205 thŭn, jr̂ŏng nŭn ñu djai lôi hĕ tăm plơi Kharan.
Айни замон обунашуда:
Phŭn Blŭng 11: JKB
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2024, Wycliffe Bible Translators, Inc.