Luk 24
24
Chisʋs ʋt falamʋt tani tuk a̱ enchil tuklo hosh ohoyo hash sepʋlka ak o̱ ai im anoli, 1, 13 Chisʋs nan im ai ithʋna ʋhleha tuk ʋt tuklot Emmaʋs a̱ itiachi hosh a̱yʋt okla; 38 il otʋnichi, nan im ai ithʋna ʋhleha hatuk ʋt chi̱ya moma na Chisʋs ʋt itintakla ant hikia: 47 yohmi cha Chelusalem ak o̱ ʋmmona ka ai isht ia hosh ʋbanumpa ya̱ okla isht anumpula chi̱ ka, im apesa. 51 Chisʋs ʋt ʋba a holitopa ya̱ ia.
1Atuk osh wek nitak ʋmmona onnʋt okhlilinchi fehna ho̱ na‐balama atahli tuk ʋt i̱shit, inla ka ai itapi̱hʋt, sepʋlka yash okla ai ona tok.
2Mihma tʋli ʋt sepʋlka ya̱ kanima pit tonoli tuk o̱ okla pisa tok.
3Mihmʋt okla pit chukowa tuk osh, Chitokaka Chisʋs haknip ash ik peso ki tok.
4Atuk o̱ yakohmi tok; okla nana a kaniohmi ik ai ithano fehnʋt ma̱ya ma, yakeh! hatak tuklo kʋt i̱ na‐fohka shohmalali hosh itumasi a hinli tok.
5Mihma okla nukshopʋt, aka pit yochonoli ma, yʋmmak ash ot, Nanta katiohmi ho̱ okcha̱ya illi aiasha ak o̱ hʋsh hoyo cho?
6Ilʋppa ikshoshke; amba tani tuk oke; Kalili a̱ anta moma mʋt hʋchim anoli kʋt;
7Hatak Ushi ʋt hatak nan ashʋchi ʋhleha ibbak a̱ a fohka cha, iti‐taiyukhʋna ai ahonʋhla tuk osh, nitak ont atuchinakma falamʋt tana hi oke, achi tuk a̱ hʋsh ithaiyanashke, im achi tok.
8Mihma im anumpa ha tok ash okla ithaiyana tok.
9Micha sepʋlka yash a̱sht falamʋt ilhkoli mʋt, auah‐achʋfa kash, micha inla moma aiena ka na yakohmi puta tuk ash mominchit ont im anoli tok.
10Meli Maktalene, micha Choanna, mikmʋt Meli, Chemis ishki, micha ohoyo inla ka yʋmma apehʋt a̱ya tuk aiena kak osh ʋbanumpeshi ʋhleha ha̱ na‐yakohmi puta tuk a̱ ont im anoli tok.
11Mihma yʋmma im anumpa hʋt annoa ik a̱hlo yak o̱ ai im itilaui cha, okla ik yimmo ki tok.
12Mihma Pita yʋt wakaya cha, malelit sepʋlka ya̱ onʋt, pit aka chonoli mʋt, linen nan‐tʋnna ak bano hosh a̱sha na pisa cha, ia mʋt, nana kʋt ai yʋmohmi tuk ash, okokko! ahni tok.
13Atuk o̱ tuklo kʋt nitak mih‐makinli ka tʋmahushi Emmaʋs hohchifo hosh, yʋmmʋt Chelusalem a̱ auet i̱ kowi untuchina foka hatuk o̱ itiachi tok.
14Mihmʋt nana kʋt ai yʋmohmi tuk ilʋppa puta kash isht it im anumpohonli tok.
15Atuk o̱ yakohmi tok; it im anumpulit nan it im asilhhahanchi kash ot moma ho̱, Chisʋs akinli kʋt sakki cha, ta̱kla a̱ya tok.
16Yohmi kia ik ithano ket okla chi̱ ka, nishkin ʋt mocholi ho̱ chiyuhmi tok.
17Mihma yʋmmak ash ot, Ilʋppak osh anumpa katiohmi mak o̱ isht it im anumpohonlit hʋsh a̱ya cha, hʋsh ilapissa cho? im achi tok.
18Mihma achʋfʋt Kleopas hohchifo hosh afalaminchit; Hatak kanima minti chishno ak hosh Chelusalem a̱ ish anta kʋt himak nitak chohmi yʋmma nana kʋt a kaniohmi ka chik akostinincho ke tuk oh cho? im achi tok.
19Mihma yʋmmak ash ot, Nana nanta ho̱? achi ma, Chisʋs Nasalet hatak nan im a kaniohmi tuk a̱, yʋmmak okʋt hopaii yosh Chihowa, mikmʋt okla puta aiena itikba ya̱ nana a kaniohmi, micha anumpuli aiena kʋt a chinto fehna tuk;
20Yʋmohmi tuk o̱ na‐holitompa isht a̱sha pehlichi ʋhleha, micha pi̱ hochito̱ka ʋhleha aiena kʋt, yʋmmʋt illa chi̱ hosh im ʋlhpisa chi̱ ka, kaniohmichit ishit inla ibbak a̱ fohki na iti‐taiyukhʋna ahonʋhlichi tuk.
21Yohmi kia yʋmmak osh Islael okla ha̱ hlakoficha he tuk mak atuk a̱ pi yihi̱mmi tuk; yʋmohmi tuk kia keyushke; micha yʋmmak bano keyu, nana kʋt a yakohmi tuk a̱ himak nitak ʋt nitak ont isht atuchinʋshke.
22Micha anonti ohoyo il ai itapeha tuk a̱ a kanimi kʋt onnahinli fehna sepʋlka ya̱ ont ma̱ya tuk ʋt,
23Yʋmma haknip a̱ ik peso hosh ai ʋla mʋt, anonti enchil mʋt i̱ haiaka na pisa ma, Yʋmmak ash ot okcha̱ya hoke, achi tuk achi cha, okla pi nukhlakʋshli tuk oke.
24Yohmi ma il ai itapeha tuk a̱ a kanimi kʋt sepʋlka ya̱ ona, yohmi mʋt ohoyo nana a miha tuk a̱ ʋlhpesa ho̱ ont pisa tuk; yohmi kia yʋmmak amo okla ik peso ke tuk oke, im achi tok.
25Mihma yʋmmak ash ot, Im anukfila iksho, hopaii ʋhleha hʋt anumpuli tok moma ka chu̱kʋsh isht yimma he sʋlaha hʋchia ma!
26Klaist ʋt na yakohmi puta ka pisa ha yosh a holitopaka ya̱ chukowa he ʋlhpesa ha tok keyu cho?
27Mihmʋt Moses, micha hopaii puta aiena tok ai ʋhli kak o̱ isht ia hosh, Holisso Holitopa ya̱ a mominchit ilap a̱ isht ai annoa ka achukmalit im anohonli tok.
28Mihma tʋmahushi itiachi yʋmmak atuk ash ot itonacha̱ hosi tok; yohmi ma yʋmmak ash ot ont ia hinla ka, ile chohmichi tok.
29Yohmi kia im a chilita fehnʋt oklʋt, Nitak ʋt shohbit ont opiʋt ma̱ha̱ya hoka, pi̱ ta̱kla ish antashke, achit okla tok. Mihma ta̱kla anta chi̱ hosh ont chukowa tok.
30Atuk o̱ yakohmi tok; yʋmmak ash ot ta̱kla impʋt binili mʋt, pʋska ya̱ ishi cha, ʋba isht aiokpʋchi mʋt, tushtolit, yʋmmak ash o̱ ipeta tok.
31Mihma nishkin ʋt i̱ fatumʋt okla cha, yʋmmak ash ithanʋt okla tok; yohmi ma yʋmmak ash ot i̱ holhponayo ha̱ ai i̱ kʋninihya tok.
32Mihma, Ilʋppʋt takla ya̱ a pim anumpuli, micha Holisso Holitopa aiena ka achukmalit a pim otʋninchi ma, pi̱ chu̱kʋsh ʋt libisha tuk keyu̱? it im achi tok.
33Mihmʋt hʋshi kanʋlli ʋlhpisa mih‐makinli ho̱ wakaya cha, falamʋt Chelusalem a̱ it ʋlachi mʋt, auah‐achʋfa kash ot, micha ai itapeha tuk aiena kʋt, itʋnaha mʋt,
34Chitokaka yʋt falamʋt tani pulla mʋhli tuk osh, Saimon a̱ i̱ haiaka kʋno, achit ma̱ya ho̱ ant pisʋt okla tok.
35Mihmʋt yʋmmak ash osh hina takla ya̱ nana kʋt a kaniohmi tuk, micha yʋmmʋt pʋska tushalichit a̱shʋt kaniohmit im otaiyani tuk aiena kash anolit okla tok.
36Mihma yakohmichit anumpohonli moma ho̱, Chisʋs ʋt ilap fehna hosh ai iklʋnna ont hikia cha, Nanaiya kʋt hʋchimmi hashke; im achi tok.
37Yohmi kia yʋmmak ash ot komuntʋt nukshopa fehna mʋt, Shilup o̱ pisa ka, im ahoba tok.
38Yohmi ma, Na katihmi ho̱ hʋchi komunta cho? micha, Na katihmi ho̱ hʋchi chu̱kʋsh anu̱ka̱ka ya̱ na hʋchim anukfila anuktuklo kʋt takali cho?
39Sʋbbak, saiyi aiena ka ho pesá; ʋno sia hash inli hoke; sa pʋsholit ho pesá: shilup ʋto nipi, micha foni puta aiena a̱sha, ʋno ʋt si yʋmohmi na hʋs sa pisa ka, chohmi keyu hoka, im achi tok.
40Micha ilʋppa yakohmichit anumpuli mʋt, ibbak, micha iyi aiena kash i̱ haiakʋchi tok.
41Mihma okla na yukpa kak osh yimmi keyu ki̱sha, micha okokko! aiahni aienʋt ma̱ya ta̱kla ma, yʋmmak ash ot, Ilʋppa nan‐ilhpak nana kia hʋchim a̱sha cho? im achi tok.
42Mihma nʋni ʋlhpusha tushafa, micha foi‐bila aiena ho̱ okla ipeta tok.
43Mihma ishi cha, okla itikba ya̱ ai ʋpa tok.
44Mihmʋt, Nan oklu̱ha kʋt isht a si annoʋt Moses, micha hopaii ʋhleha aiena i̱ holisso, mikmʋt ataloa holitopa aiena ka ai o̱ holisso tok ʋt ont aia̱hli pulla chi̱ mak o̱, hʋchi takla anta li moma kʋt anumpa ilʋppa puta ka isht hʋchim anumpuli li tok oke, im achi tok.
45Mihmʋt Holisso Holitopa ya̱ ithaiyana chi̱ ka, im anukfila nan‐isht akostininchi a̱ in tiwi tok.
46Mihmʋt, Klaist ʋt yakohmi hosh i̱ palʋmmit, illi tuk osh, anonti nitak ont atuchinakma illi tuk ʋt tana hi a̱, isht ai ʋlhpiesa tok.
47Micha ile kostinincha he, mikmʋt ai ashʋchika puta isht a kashofa he aiena kʋt yʋmma hohchifo ho̱ isht anumpa kʋt, ʋmmona ka Chelusalem ak o̱ ai isht ia hosh, oklushi moma isht im anumpa hi oke, achi hosh yakohmit holihi̱so hoke.
48Yohmi ho̱ hʋchishno ak osh na yakohmi puta ka aiatokowʋt anoli hʋchia mak oke.
49Yohmi ka yakeh! A̱ki ʋt nana ka hʋch ima hi ʋt miha tok mak o̱, hʋchishno a̱ hʋchi o̱ kaiyanchi lishke: yohmi kia Chelusalem tʋmaha hak o̱ hʋsh aiashʋt, nana aia̱hli ʋba minti kʋt ont hʋchi anukfoyuka kak mak ashke, im achi tok.
50Yʋmohmi tuk osh yʋmmak ash pehlichit kohchʋt iʋt Betani yokʋno isht ona tok: mihmʋt ilap ibbak ash ʋba pit wieli cha, yʋmmak ash holitoblit aiokpʋchi tok.
51Atuk o̱ yakohmi tok: yʋmmak ash holitoblit aiokpʋchi ai itin ta̱kla mʋt, ai i̱ filʋmmit ʋba pilla pit a kʋnia tok.
52Mihma yʋmmak ash okla pit holitoblichit aiokpʋchi cha, na‐yukpa fehna hosh falamʋt Chelusalem a̱ ai ʋla tok.
53Yohmi mʋt Chihowa ya̱ in taloʋt holitoblichit pit aiokpahanchit tempel anu̱kaka ya̱ aiasha beka tok. Amen.
Айни замон обунашуда:
Luk 24: CHH
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913