Luk 18
18
Nan apesa ai a̱hlichi keyu, micha ohoyo i̱ hatak illi nan asilhha achunanchi aiena nan isht ʋlhpisa, 1; 9 Falisi, micha pʋblikan ita tuklo nan isht ʋlhpisa. 15 Chisʋs ʋt ʋlla chipunta ya̱ holitoblit ishit sholi. 18 Chisʋs ʋt hatak pehlichi himita nan in laua yo̱ Klaist okmá, nan laua im a̱sha kak okmá, nanta kak osh holitopa kʋt im i̱ shahli chishba? ahnit imomaka pisa. 31 Chisʋs ʋt ilapʋt ititaiyukhʋna ahonʋhlʋt illa he, atukmʋt nitak ont isht atuchinakma falamʋt tana he, anonti tikbanli anoli.
1Mihmʋt yʋmmak ash o̱, Hatak ʋt ʋba pit anumpohonli kʋt bilia cha, ik in takobo ka he tuk a̱, nan isht ʋlhpisa ho̱ isht anumpulit achi mʋt,
2Tʋmaha ho̱ nan apesa ʋt ahanta kʋt, Chihowa ya̱ nukshompa keyukmʋt, anonti hatak ma nan isht ik im aho bo ya tok.
3Yohmi ma tʋmaha yʋmma ohoyo i̱ hatak illi yosh anta tok; atuk osh yʋmmak ash o̱ im ai ʋla cha, Nan ʋlhpisa si onochi tuk a̱ nan a̱hli achukma ka isht is sʋm ai apesashke, achi tok.
4Yohmi ma yakosi takla kʋno yʋmihcha he ik ahno ke tuk osh, amba himmak o̱ nan il anukfilli kʋt, Chihowa ya̱ i̱ nukshompa li keyu mʋt, anonti hatak ma nan isht ʋm ahomba keyu hatuk nana kia,
5Ohoyo i̱ hatak illi ilʋppʋt si ataklaiyami hoka, nan a̱hli achukma ka isht ai im apesa lashke; yʋmmak keyukma, mihinti bekakmʋt, an takobicha hinlʋshke, achi tok.
6Mihma Chitokaka yash ot, Nan apesa ai ʋlhpesa keyu ʋt nana achi tuk a̱, ho haiyakló.
7Yohmi ka Chihowa hʋt ilap osh ai atokoli tok mak o̱ nitak, micha ninak aiena ka pit in tahpahanla ka, im ile sʋlaha tuk mak osh, nan ai a̱hli achukma ka ik im apeso ka hinla cho?
8Chekosi makinli ho̱ nan ai a̱hli achukma ka isht ai im apesa hi oka, hʋchim achi lishke. Yohmi kia amba Hatak Ushi ʋt a̱yakmʋto, yakni paknaka ya̱ na yimmi kʋt a̱sha na pisa hi oh cho? achi tok.
9Mihmʋt kanimi kʋt ile yimmit, ilap ak osh ai ʋlhpesa mak o̱ im ahobʋt, inla a̱sha kʋno ik ahobalo ʋhleha hatuk ash nan‐isht‐ʋlhpisa ilʋppa isht im anumpuli mʋt,
10Hatak tuklo kʋt ʋba pit anumpula chi̱ hosh tempel a̱ pit chukowʋt okla tok: achʋfa kak osh Falisi okma, achʋfa kʋto pʋblikan a tok.
11Falisi ash osh hikia cha, ʋba pit isht il anumpuli mʋt, Chihowa ma! hatak inla a̱sha na‐wehli; nan ik ai ʋlhpieso; haui puta; mikmʋt pʋblikan ilʋppak kia ak chohmo kʋt, yak oke! pit chim aiahni lishke.
12Nitak hullo achʋfakma hitukla na hullochi likmʋt, nan ʋm a̱sha puta kʋt ont isht pokoli kʋt a̱ kʋnihi̱yʋshke, achi tok.
13Yohmi ma pʋblikan ash ot auet mishema yak inli ho̱ hikiʋt, i̱ holhponayo ak kia ʋba chakalinchi keyu hosh, peh ikkishi ak o̱ isso mʋt, Nan ashʋchi sia hoka, Chihowa hʋt is sa̱ nukha̱klashke, im achi tok.
14Yohmi kʋt hatak ilʋppʋt nan im aia̱hli achukma kʋt achʋfa yash i̱ shahli hosh in chuka ona tok a̱ hʋchim anoli lishke: kʋna hosh ile fehnʋchikmʋt, aka ona he; mikma kʋna hosh ile akanlosichi hokmʋt, holitopa hi oka, achi tok.
15Yohmi ma ʋlosi puta kia, yʋmmak ash ot potola hinla ka okla ishit im ai ʋla tok: yohmi kia nan im ai ithʋna ʋhleha hash ot pisa mʋt, okla im alʋmmi tok.
16Yohmi kia Chisʋs ʋto yʋmmak ash o̱ pit hoyo cha, Ʋlla chipunta ʋt ʋm ai ʋla hi a̱ hʋsh ahni cha, hʋch ik im alammo kashke; ilʋppak o̱ chohmi hosh Chihowa apehlichika ya̱ aiasha hoke.
17A̱hli mak o̱ hʋchim achi lishke; Kʋna hosh ʋlla iskitini ak o̱ chohmit Chihowa apehlichika ya̱ aiokpʋchi ho̱ keyukmʋt, kaniohmi kak osh yʋmma chukowa he keyu hoke, achi tok.
18Mihma hatak pehlichi achʋfʋt i̱ ponaklot, Nan‐ithʋnanchi achukma ma! nantak o̱ katiohmi li kak osh ai okcha̱yʋt bilia yato ʋmmi ha hinla cho? achi tok.
19Mihma Chisʋs ʋt yʋmmak ash o̱, Na katihmi ho̱ ʋno a̱ achukma is si achi cho? achukma kʋt iksho ho̱, amba achʋfa kak illa, yʋmmʋt Chihowa ak oke.
20Nan ʋlhpisa, Haui ish toba ná: Kʋna kia ish bi ná: Na chik hu̱kopo kashke; Anumpa ik a̱hlo isht atokolit chik anto kashke; Chi̱ki, micha chishke aiena ka ish holitoblashke; achi puta ka ish ithanʋshke, im achi tok.
21Mihma yʋmmak ash ot, ʋlla sa tomba kash inli hosh ilʋppa puta ka holitoblit isht mihinti li tok a̱ ant a himak ʋshke, achi tok.
22Mihma Chisʋs ʋt ilʋppa puta ka haklo mʋt, Yohmi kia nana achʋfa ho̱ isht chik ai onoshke; nana chim a̱sha kʋt mominchit ish kampila cha, ilbʋsha ya̱ ishit it a kʋshkoachí, yohmik mak osh ʋba ya̱ chim ilayak ʋt a̱sha hi oke; micha ant is siakayashke, im achi tok.
23Mihma yʋmmak ash ot ilʋppa haklo mʋt, nan in laua fehna hatuk osh, nukha̱klo fehna tok.
24Yohmi ma nukha̱klo fehna ho̱ Chisʋs ʋt pisa mʋt, Nana in laua ʋhleha hokʋto palʋmmi fehna nana ho̱ Chihowa apehlichika ya̱ chukowa he;
25Kamel ʋt chofak ushi nishkin a hlopulli ka palʋmmi kʋt hatak nan in laua yosh Chihowa apehlichika chukowa hokʋno ik lauwoshke, im achi tok.
26Mihma yʋmma okla haklo mʋt, Yohmikma kʋta hak osh okcha̱ya hinla cho? achi tok.
27Mihma yʋmmak ash ot, Hatak okmʋno nana kʋt ai yʋmohma he keyu kia, Chihowa yak okmʋno ai yʋmohmi hoke, achi tok.
28Yohmi ma Pita yash ot, Yakeh! Pishno ʋto mominchit il issa cha, e chiakaiya kʋno, achi tok.
29Mihma yʋmmak ash ot okla hash, A̱hli mak o̱ hʋchim achi lishke; Hatak ʋt Chihowa apehlichika pulla hatuk mak o̱ in chuka, i̱ki, ishki, itibapishi ʋhleha, tekchi, im ʋlla puta aiena ka a kanima kia issʋt a̱ya hokʋto,
30Yakni ilʋppak inli ka nana laua kʋt yʋmmak atuk a̱ im i̱ shahli tuk mʋt, yakni inla mihintikma, ai okcha̱yʋt bilia ya̱ ik peso ka hi ʋt iksho hoke, im achi tok.
31Yohmi mʋt auah‐tuklo kash hoyo cha, Inta! Chelusalem ak o̱ iloh iʋshke; yohmi ka hopaii ʋhleha hʋt Hatak Ushi ak o̱ holisso ha̱ ishi ai ikbichi tok a puyuta kʋt ont ai a̱hla chi̱ hoke.
32Yʋmmak oka ishit Chentail okla ibbak fohki na ishit yopulʋt, itukhlakafʋt hofahyalichit, on tuftua chi̱:
33Micha okla fʋmmi cha, ʋba chi̱ hoke; atukma nitak ont a tuchinakma falamʋt tana hi oke, im achi tok.
34Yohmi ma ilʋppa puta ka achi kia okla ik akostinincho ki tok: mihma anumpa ilʋppʋt im a luma na nana kʋt anumpa tuk ash kia okla ik ithaiyano ki tok.
35Atuk o̱ yakohmi tok; yʋmmak ash ot Cheliko bili̱kasi ka ʋla ma, hatak lʋpa achʋfa kʋt hina lapalika yo̱ binilit nan asi̱lhha tok.
36Atuk osh okla laua ʋt ont ihi̱ya ka haklo mʋt, Katiohmi hosh yakohmi cho? achit a ponaklo tok.
37Mihma, Chisʋs Nasalet ai ʋtta ak osh a̱ya hatuk a̱, okla im anoli tok.
38Mihma yʋmmak ash ot tahpʋlʋt, Chisʋs, Lewi Ushi chia hʋt is sa̱ nukha̱klashke, achi tok.
39Mihma tikba a̱sht a̱ya tuk ash ot, nukchinta chi̱ ka i̱ miha tok: yohmi kia yʋmmak o̱ isht i̱ shahlichi fehnʋt tahpʋlʋt, Lewi Ushi chia hʋt is sa̱ nukha̱klashke, achi tok.
40Mihma Chisʋs ʋt hikia mʋt, yʋmmak ash o̱ isht im ʋla hinla ka miha tok: atuk osh yʋmmak ash ot i̱ bili̱kasi ʋla ma, i̱ ponaklot,
41Nanta hak o̱ a chi̱ katimichi la hi a̱, ish ahni cho? achi tok. Mihma yʋmmak ash ot Chitokaka ma! hoponayo la hi á, achi tok.
42Mihma Chisʋs ash ot, Ish hoponayashke, a chi yimmi yak osh chi okchalinchishke, im achi tok.
43Yohmi ma yʋmmak ash ot ashali̱ka hoponayo cha, yʋmmak ash o̱ iakaiya mʋt, Chihowa ya̱ holitoblichi tok: mihma okla hʋt pisa mʋt, Chihowa ya̱ pit aiokpahanchi tok.
Айни замон обунашуда:
Luk 18: CHH
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913