Chan 10
10
Chisʋs ak osh okhissa, mikmʋt yʋmmak osh chukfʋlhpoba apesʋchi achukma yatuk osh chukfʋlhpoba ya̱ ʋlhtobʋt illi, 1, 19 Okla hʋt Chisʋs a̱ nan isht ai im anukfila kʋt ilaiyuka, 24 Chisʋs ʋt Chihowa hak o̱ a minti tuk a̱ ilap nana ai isht ahanta kak inli hosh otʋninchi ka im anoli; 39 Chu okla hʋt ʋbi bʋnna kia im a hlakofit kocha. 40 Chisʋs ʋt ia mʋt Chatan misha tʋnnʋp o̱ ona ma, okla laua hosh i̱ yimmi.
1A̱hlishke, a̱hli mak o̱ hʋchim achi lishke, Kʋna hosh chukfʋlhpoba i̱ holihta okhissa yak o̱ ik a chukowo hosh, amba naksika kanima yo̱ pit oiyʋt o̱ walʋbli hokʋto, yʋmmʋt hu̱kopa, mikmʋt na wehpuli mak oke.
2Amba okhissa yak o̱ pit a chukowa hokʋto, yʋmmak osh chukfʋlhpoba ya̱ apesʋchi mak oke.
3Yʋmmak o̱ okhissa apesʋchi atuk ʋt in tiwikma, itih ola ka, chukfʋlhpoba yʋt ithana; yohmi hatuk oka in chukfʋlhpoba atuk ash hohchifo aiyuka hochifot pehlichit kohcha chatuk.
4Atuk osh in chukfʋlhpoba yash kocha welit tahlikmʋt, tikba im iakma, itih ola ka, ithana hatuk okʋt, chukfʋlhpoba yash ot apehʋt ia chatuk.
5Yohmi kia inla itih ola hokʋno ik ithano hatuk osh, api̱hʋt ia he keyu hosh, amba i̱ filʋmmit yihlepa chatuk oke, im achi tok.
6Nan‐isht‐ʋlhpisa ilʋppak o̱ Chisʋs ʋt okla ha̱ isht im anumpuli tok: yohmi kia nana ho̱ yʋmmʋt isht ai im anumpuli hatuk a̱, okla ik akostinincho ki tok.
7Yohmi hatuk o̱ Chisʋs ash ot atuklanchit, A̱hlishke, a̱hli mak o̱ hʋchim achi lishke, Ʋno ak osh chukfʋlhpoba im okhissa sia hoke.
8A sa ti̱kba a̱ya tok puta kʋto hu̱kopa, mikmʋt nawehpuli bano ha tok: yohmi hatuk o̱ chukfʋlhpoba yʋt yʋmmak okʋno ik i̱ haponaklo ki tok.
9Ʋno ak osh okhissa sia hoke: hatak nana hosh ʋno ak o̱ si a chukowa hokʋto, okcha̱ya he: micha pit chukoho̱wʋt, anonti kohonchʋt, ai‐impa ya̱ ahayuhoncha hi oke.
10Na‐hu̱kopa yʋt hu̱kopa, micha ʋbi, nan okpʋni aiena he ak bieka hosh a̱ya chatuk; amba ai okcha̱ya ya̱ okla ahayuchikmʋt, anonti laua kʋt i̱ shahli fehna ho̱ pisa he mak o̱, ʋno ʋto a̱ya li ha tok.
11Ʋno ak osh chukfʋlhpoba apesʋchi achukma sia mak oke; chukfʋlhpoba apesʋchi achukma yʋt chukfʋlhpoba ya̱ ilap im ilhfiopak a̱ a kaiyanchi hoke.
12Amba peh ilhtohno, chukfʋlhpoba apesʋchi keyu hatuk, micha chukfʋlhpoba yʋt immi atuk keyuk mʋto, nashoba ʋt minti na pisakmʋt, chukfʋlhpoba ya̱ issʋt chʋfa hoke; yohmi ma nashoba yʋt yʋmmak ash ant hoklit, chukfʋlhpoba yash it ai yuhli hoke.
13Ilhtono hʋt peh ilhtohno atuk okʋt, chukfʋlhpoba ya̱ nan isht ik ahno hatuk mak osh chʋfa hoke.
14Ʋno ak osh chukfʋlhpoba apesʋchi achukma sia hoke; an chukfʋlhpoba ya̱ ithaiyana li hoke; mikma anonti ʋmmi hʋt ʋno a̱ sʋthana hoke.
15A̱ki ʋt sʋthana ka, ʋno mʋt A̱ki a̱ ithana li akinli koke; yohmi hosh chukfʋlhpoba ya̱ isht ʋlhtoba ho̱ ʋm ilhfiopak a̱ aka bohyuli lishke.
16Yohmi kʋt chukfʋlhpoba inla mʋt ilʋppa a̱shaka ai achʋfa keyu kʋt ʋm a̱sha hoke: yʋmmakma pehlichit ʋla likma, ʋm anumpa ha̱ hakla hi oke: yohmikma aiasha ʋt achʋfakma, anonti chukfʋlhpoba apesʋchi ʋt achʋfa hi oke.
17Ʋm ilhfiopak a̱ falaminchit ishi la hinla hosh aka bohyuli li; yohmi hoka A̱ki ʋt sa holitobli hoke.
18Hatak nana hosh ʋm ishi ho̱ keyu: amba ʋno akinli ahni li hosh aka bohyuli li hoke. Aka bohyuli la hi ʋt isht ʋm ai ʋlhpesakmʋt, anonti falaminchit ishi la hi ʋt isht ʋm ai ʋlhpesa hoke. Nan‐ʋlhpisa ilʋppak o̱ A̱ki a̱ im a habena li tok, im achi tok.
19Yohmi hatuk o̱ anonti Chu ʋhleha hash ot anumpa ilʋppa isht ai it a kashapʋt ma̱ya tok.
20Yohmi mʋt, Nan‐isht‐ahullo okpulo il ai i̱shi hatuk osh tasimbo hokʋto, nanta katiohmi ho̱ hʋsh i̱ haponaklo hosh? achi kʋt laua ma,
21Inlaka yokʋto, Ilʋppak okʋt nan‐isht‐ahullo okpulo il ai i̱shi ho̱ im anumpa keyushke. Nan‐isht‐ahullo okpulo ʋt lʋpa nishkin a̱ fatumma hinla ho̱? achi tok.
22Hʋshtula yo̱ tempel a̱ himonʋchit Chitokaka pit im issa impa hosh Chelusalem a̱ a̱sha ho̱, yohmi tok.
23Mihma Chisʋs ʋt tempel anu̱kaka Solomon im apishia nutaka ya̱ hikiki̱a tok.
24Mihma Chu ʋhleha hash ot ʋlʋt yʋmmak ash o̱ ant a folubli cha, Ik ai ithano chohmit il aiasha na katiohmi foka chi̱ ho̱ ish pim ahni cho? Chishno ak osh Klaist chia hokmʋt, achukmalit ish pim anolashke, im achi tok.
25Mihma Chisʋs ash ot afalaminchi mʋt, Hʋchim anoli li ka, ik hʋchi yimmo hoke: nana ka A̱ki hohchifo ho̱ isht a yʋmihinchi li kak o̱, yʋmmak osh ai ʋlhtokowa ka si anohonlishke.
26Yohmi kia ik hʋchi yimmoshke; yʋmmak o̱ hʋchim achi li hatuk oka, an chukfʋlhpoba keyu hʋchia hatuk okʋt.
27An chukfʋlhpoba ʋto ʋm anumpa ha̱ haklokma, anonti ʋno ʋt ilap ma ithana li ho̱, a si apeha chatuk.
28Mikma ai‐okcha̱yʋt bilia ya̱ yʋmma im issa li; yohmi ka nitak nana ilbʋshʋt illa he keyukma, anonti kʋna kia yʋmmak ash sʋbbak a̱ a kohchit isha hi ʋt iksho hoke.
29A̱ki yʋmma ʋma tok ʋt moma i̱ shahli; yohmi ka kʋna kia yʋmmak ash A̱ki ibbak a̱ a kohchit isha hi ʋt iksho hoke.
30Ʋno, A̱ki itatuklo li kʋt il it ibai achʋfa hoke, achi tok.
31Mihma anonti Chu okla hash ot tʋli ishit bola chi̱ kʋt tʋli a̱ okla aiowa tok.
32Chisʋs ʋt afalaminchi mʋt, Isht il apelʋchi ʋt A̱ki a minti pulla na na hochukma la̱wa ka isht a yʋmihinchi li̱ hʋsh pisa tuk a̱, na‐fehna yʋmma puta tuk ash katima kak o̱ tʋli a̱ isht hʋs sa bola chi̱ mak oh cho? im achi tok.
33Mihma Chu okla hash ot afalaminchi mʋt, Na fehna achukma yʋmmak atuk ak o̱ tʋli a̱ ishit e chi bola chi̱ mak o̱ keyu; amba ik ahobalot anumpulit, anonti hatak chia hokak osh, Chihowa ish il apesa aiena kak oke, im achi tok.
34Chisʋs ʋt afalaminchi mʋt, Chitokaka ʋhleha hʋchia hoke, achi li tok, achi kʋt hʋchi̱ nan‐ʋlhpisa holisso ha̱ a holihi̱so keyu cho?
35Chihowa im anumpa hʋt a̱yʋt ai im ahanta yo̱ yʋmmak o̱ Chitokaka ʋhleha hohchifo tok okma, anonti Holisso Holitopa yʋt kobafa hi o̱ keyushke:
36I̱ki ʋt na‐holitopa ka isht a im atokoli cha, yakni a̱ auet kanchi tok o̱, Chihowa Ushi sia hoke, achi li tuk ak o̱, Nan ik ahobalot ish anumpuli, hʋsh achi hoh cho?
37A̱ki ʋt nana a kaniohmi ak o̱ ak yʋmihcho hok mak o̱, hʋchik sa̱ yimmo kashke.
38Amba yʋmihchi li hokmʋno, ʋno ak okʋno hʋch ik sa̱ yimmo hoh kia, nana kʋt a kaniohmi yʋmmak o̱ hʋchi yimmi cha, A̱ki ʋt auet a si acha̱fakma, anonti ʋno ʋt ilap a pit ai acha̱fa li ka, akostininchit hʋchi yimmashke, im achi tok
39Yohmi hatuk o̱ anonti okla ishi bʋnna tok: yohmi kia ibbak a̱ im a hlakofi tok.
40Mihmʋt anonti iʋt, Chatan misha Chan ʋt a baptismochi ʋmmona tok yʋmmak o̱ ona cha, ahanta tok.
41Mihma okla la̱wʋt im ai itahoba mʋt, Chan ʋto na‐fehna nana kia yʋmihchi tok keyu; yohmi kia Chan ʋt hatak ilʋppa isht anumpohonli tok a̱, momʋt aia̱hli ha tok, achi tok.
42Yohmi ma yʋmma a̱shʋt ai i̱ yimmi kʋt laua tok.
Айни замон обунашуда:
Chan 10: CHH
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913