Pin'ilʋg 24
24
Isaak nɛ Rebɛka yɛla
1Abraham yʋ'ʋn da kʋdig nɛ hali, ka Zugsɔb la niŋ o zug albareka si'el wʋsa ni. 2Ka o yɛl o sankpan'as kpɛɛm onɛ gɔsid o yir la'ad wʋsa la ye, “Nɔkimi fʋ nu'ugʋ si'isi m gbɛr, 3ka m kɛ ka fʋ pɔ Zugsɔb onɛ an arezana nɛ dunia Wina'am la yʋ'ʋr zug, ye fʋ kʋ li'a Keenan dim banɛ ka man nɛ ban la'am bɛ la pu'asadire tisim biig la. 4Amaa fʋ na keŋi m mɛŋ teŋin nɛ m mɛŋ du'adibin bɔ pu'a na tisim biig Isaak.” 5Ka sankpan'as la bu'os o ye, “Ka m ya'a keŋ ka pu'a la pʋ siak ye o dɔllim ka ti lɛb kpɛla na, mam mɔri fʋ biig la lɛb fʋn yi teŋ si'a kena laa?” 6Ka Abraham yɛl ye, “Mid ka fʋ mɔri m biig la lɛb anina!” 7Ka ye, “Zugsɔb Wina'am onɛ an arezana Wina'am, ka mɔrimi yii m saam yin nɛ m du'adib teŋin kɛn kpɛla na ka pɔɔ zi'eli m ye, o na nɔk teŋ kaŋa tisim yaas la; Wina'am kan na kɛ ka o maliak dɔlli fʋ keŋ ka fʋ bɔ pu'a anina na tisim biig la. 8Pu'a la ya'a zan'as ka pʋ dɔlli fʋ kenaa, fʋn yisi fʋ mɛŋ nɔpɔɔr kanɛ ka fʋ pɔɔ zi'el la pʋʋgin. Amaa mid ka fʋ dɔlli m biig la keŋ!” 9Ka sankpan'as la duoe gban'e Abraham gbɛr, ka pɔ nɔɔrɛ zi'el yɛl kaŋa zug.
10Ka sankpan'as la nɔk o zugdaan la yʋgʋma piiga, ka nɔk la'asʋma o zugdaan la san'an mɔri keŋ. O da yii keŋ Aram Naharam gaadi keŋ paae tempʋkanɛ ka Nahor da zin' la. 11Ka o kɛ ka yʋgʋma la igini kpi'en nɛ bulig, teŋ la yiŋ. Li da anɛ zaam, saŋkanɛ ka pu'ab ken kɔlʋgin wikid ku'om la. 12Ani ka o sɔs Wina'am ye, “Wina'am onɛ aan m zugdaan Abraham Wina'am, kɛl ka si'el wʋsa niŋ sʋ'ʋŋa zina tisim, ka li na an bareka tisim zugdaan la. 13Gɔsima, m zi'enɛ buligin nwa', ka teŋ la pu'asada na yina wik ku'om. 14Kɛl ka m ya'a yɛl bipuŋ sɔ' ye, ‘M bɛlimnɛ, tisim ku'om nɛ nwam ka m nu, ka o na yɛl ye, “Di'em nu, ka kɛ ka m tisi fʋ yʋgʋma la ka ba nu mɛn.” Kɛl ka bipuŋ kan na an onɛ ka fʋ gaŋ ye fʋ tisi fʋ tʋmtʋm Isaak. Nɛ' ka m na baŋ ye fʋ pa'ali fʋ nɔŋilim nɛ m zugdaan la.’”
15On sɔs Wina'am naae la, ka Rebɛka mɛ mɔr yʋʋri yii kenna. O da anɛ Betuel pu'ayua ka o yaanam an Abraham ba'abiig Nahor nɛ o pu'a Milika. 16Bipuŋ la da vɛnl nɛ hali, ka nan zi' dau. Ka o kena sigi wik ku'om pɛ'ɛli o yʋʋr la ka dʋ na ya'as. 17Ka sankpan'as la tʋ'ʋs o tɔ'ɔtɔ ka yɛl o ye, “M bɛlimnɛ, tisim ku'om bi'ela.” 18Ka o tʋk yʋʋr la tɔ'ɔtɔ n zanl o nu'usin ka yɛl ye, “Di'em nu, m zugdaana;” ka tis o ku'om la. 19On tis o ku'om la, ka yɛl ye, “Kɛl ka m wik ku'om tisi fʋ yʋgʋma la, ka ba wʋsa nu.” 20Ka o kpa'ae ku'om la tɔ'ɔtɔ niŋ linɛ ka ba maal ka bʋnkɔnbid nuudi li pʋʋgin la, ka zɔɔ lɛb buligin la wik ku'om na. O da wiknɛ ala hali ka li ti siak yʋgʋma la wʋsa.
21Ka dau la gɔsid o kii ka pʋ yɛl si'ela bɔzugɔ, o bɔɔd ye o baŋ ye Zugsɔb la maal o ken la sʋm bɛɛ? 22Yʋgʋma la nuu naae la, ka o yis sanlim baŋ kanɛ ga'an nyɔnya ni nɛ sanlim baans ayi' banɛ pid nu'usin tis o, 23ka bu'os o ye, “Fʋ aan anɔ'ɔn pu'ayua? M bɛlimnɛ, dɔɔg bɛɛ fʋ saam yin la ka m na gbɛɛn?” 24Ka o lɛbis ye, “M anɛ Betuel pu'ayua, ka Nahor nɛ Milika aan m yaanam.” 25Ka lɛn yɛl ye, “Ti mɔr yaama bɛdegʋ linɛ ka yʋgʋma la na ɔnb, dɔɔg mɛ bɛ ka fʋ na gbɛn.” 26Ka dau la igin teŋin zun'e Zugsɔb la, 27n yɛt ye, “Na'asi bɛ nɛ Zugsɔb onɛ aan m zugdaan Abraham Wina'am la, o nan kpɛn dɔlli m zugdaan la nɛ pʋpielim nɛ sida. O mɔrimi keŋi paae m zugdaan la du'adibin!” 28Ka pu'asadir la zɔɔ kuli yɛl o ma yidim linɛ niŋ la wʋsa.
29-30Rebɛka da mɔr taʋn ka o yʋ'ʋr buon Laban, ka on da nyɛ sanlim baŋ linɛ bɛ Rebɛka nyɔɔrin nɛ baŋ banɛ pid o nu'ugin la, ka wʋm dau la yɛl o si'em la, o yii keŋ dau la san'an nyɛɛ o, ka o nan zi'e kpi'e nɛ yʋgʋma la bulig la baba. 31On paae la, ka yɛl dau la ye, “Kem na ka fʋ anɛ onɛ ka Zugsɔb tisif bareka! Bɔ ka fʋ zi'e yiŋ kpɛla? M maal dɔkanɛ ka fʋ na gbɛn nɛ zin'ikanɛ ka yʋgʋma la na digin.” 32Ka dau la dɔl Laban keŋ yin la ka ba yidigi ba la'ad la, ka tis yʋgʋma la yaama ka mɛ gbin'e ku'om na tis dau la nɛ o nidib ka ba pie ba nɔba. 33Ba daa mɔr diib na tisi ba ka o ye, “M ya'a pʋ yɛli ya man kɛn si'el yɛla la na, m kʋ di si'ela.” Ka Laban lɛbis ye, “Ka yɛlimi ti!”
34Ka o yɛli ba ye, “M anɛ Abraham sankpan'as. 35Zugsɔb la niŋi m zugdaan la bareka ka o mɔr kpan'am hali. Zugsɔb la tis o pɛ'ɛs nɛ niigi nɛ anzurifa nɛ sanlima. O mɔr sankpan'as dap nɛ sankpan'as pu'ab nɛ yʋgʋma nɛ bʋmis. 36M zugdaan la pu'a Sara da du'a biribiŋi tis o saŋkanɛ ka o da kʋdig, ka o zaŋ on mɔr si'el wʋsa tis biig la. 37M zugdaan la kɛnɛ ka m pɔ nɔɔr ye m kʋ bɔ pu'a Keenan dim pu'asada la nii tis o biribiŋ la. 38O yɛlim ye m kemi o saam yidimin, nɛ banɛ aan o dɔɔg nidibin la bɔ pu'a na tis o biig la.” 39Ka m bu'osim zugdaan la ye, “Ka m ya'a keŋ ka pu'a la pʋ siak ye o dɔllimi lɛb na?” 40Ka o lɛbis ye, “Zugsɔb kanɛ ka m dɔl la na tʋm o maliak ka o dɔlli fʋ keŋ ka kɛ ka fʋ ken la niŋ sʋ'ʋŋa tisif, ka fʋ na nyɛ pu'a m mɛŋ dɔɔg nɛ m saam yidimin tisim biig la. 41Amaa fʋ ya'a keŋi m dɔɔg dimin la ka ba zan'as ka pʋ kɛ ka pu'a la dɔlli fɔ, fʋ yisi fʋ mɛŋ nɔɔr kanɛ ka fʋ pɔɔ zi'el la pʋʋgin.”
42“Ka man kpɛn paae buligin la zina na la, m sɔsi m zugdaan Abraham Zugsɔb Wina'am la ye, ‘Maalim yɛlkanɛ zug ka m kɛn zina nwa' na la tisim. 43Gɔsima, m zi'enɛ bulkaŋa nwa' nɔɔrin kpɛla, pu'asadir ya'a kena ka m yɛl o ye o tisim ku'om nwammin ka m nu 44ka o ya'a yɛlim ye, “Di'em nu, ka m mɛ wiki tisi fʋ yʋgʋma la,” kɛl ka on sɔb na an onɛ ka Zugsɔb la gaŋ ye o tisim zugdaan biig la.’ 45Man ti sɔs Wina'am m sʋʋnrin naae la, ka Rebɛka buk yʋʋri kenna. Ka o paae na sig buligin la wik ku'om na ka m yɛl o ye, ‘M bɛlimnɛ tisim ku'om ka m nu.’ 46Ka o tʋk yʋʋr la zanl o nu'ugin ka yɛl ye, ‘Di'em nu, m zugdaana, ka m wiki tis yʋgʋma la.’ Ka gbin'e ku'om la tisim ka m nu, ka o wiki tis yʋgʋma la ka ba nu mɛn. 47Ka m bu'os o ye, ‘Fʋ aan anɔ'ɔn pu'ayua?’ Ka o lɛbis ye, ‘M anɛ Betuel pu'ayua ka m yaanam an Nahor nɛ Milika.’ Ka m nɔk nyɔnya ni baŋi ga'al o nyɔnya ka pid o nu'us baans. 48Ka m igin teŋin zun'e Zugsɔb onɛ aan m zugdaan Abraham Wina'am onɛ dɔlisim sʋ'ʋŋa ka m nyɛɛm zugdaan ba'abiig yaaŋi tis o biig la. 49Alazug, ya ya'a na niŋi m zugdaan la lin nar si'em nɛ linɛ an pʋpielim, yanam yɛlimim; ya'a lɛn ka' ala yanam mɛ yɛlim, ka m baŋ mam na niŋ si'em.”
50Ka Laban nɛ Betuel lɛbis ye, “Nɛ' yinɛ Zugsɔb la san'an na, ti kʋ nyaŋi yɛlif si'ela. 51Rebɛka nwa', mɔr o kuli tisi fʋ zugdaan biig la ka o lieb o pu'a wʋʋ Zugsɔb la zi'el si'em la.” 52Abraham sankpan'as la wʋm ban yɛl si'em la, ka igin teŋin Zugsɔb la tuon. 53Ka yis sanlima nɛ anzurifa la'ad, nɛ fuudi tis Rebɛka, ka mɛ nɔk la'ad ka li ligidi zu'oe tis Rebɛka taʋn la nɛ o ma. 54Ka on nɛ nimbanɛ dɔl o kena la yʋ'ʋn di ka nu, ka gbɛɛn ani.
Bɛogʋ nie la ka o yɛl ye, “M na sɔs suori lɛbi m zugdaan la san'an.” 55Amaa ka Rebɛka taʋn nɛ o ma lɛbis ye, “Kɛl ka bipuŋ la nan kpɛlimmi ti san'an wʋʋ dabpiiga ka ya nyaan kul.” 56Amaa ka o yɛli ba ye, “Da vi'idini m suorɛ! Zugsɔb la sadigim maali m ken la ka li an sʋ'ʋŋa la, m na sɔs suor ka lɛbi yɛli m zugdaan.”
Ban mɔr Isaak pu'a na tis o si'em
57Ka ba lɛbis ye, “Kɛl ka ti buol bipuŋ la mɛŋi bu'os o gɔs.” 58Ka ba buol Rebɛka bu'os o ye, “Fʋ na dɔl dau kaŋa keŋɛ?” Ka o lɛbis ye, “Ɛɛn!” 59Ala ka ba zi'el Rebɛka suor nɛ o biyuol nɛ Abraham sankpan'as la nɛ banɛ dɔl o keŋ la. 60Ka ba kaanb, kaanb sʋŋʋ tis Rebɛka ye,
“Ti taʋn, fʋ na wiak tusa-tusa!
Fʋ yaas na nyaŋi ba dataasi
faaɛn ba tɛɛns.”
61Ani ka Rebɛka nɛ o pu'asadtaaba la ban' ba yʋgʋma dɔl dau la ka ba kul.
62Ka Isaak onɛ yiri da bɛ Negef teŋgbauŋʋn la, da yi Berlahairoi baba kena. 63Daar yinne, o da yi zaamnɔɔre gɔɔnd paalʋ, ka ʋk o zugʋ gɔsi nyɛ yʋgʋma ka ba li'en na. 64Ka Rebɛka mɛ gɔsi nyɛ Isaak, ka naam yʋgʋm la zugʋ sig na, 65ka bu'os sankpan'as la ye, “Dau kanɛ yi sian'arin kenna tʋ'ʋsidi ti la aan anɔ'ɔnɛ?” Ka sankpan'as la lɛbis ye, “O anɛ m zugdaan.” Ka Rebɛka nɔk fubili lus o mɛŋ.
66Ani ka Sankpan'as la yɛl Isaak on maal si'el wʋsa.
67Isaak da mɔr Rebɛka kpɛn'ɛs o ma Sara fuug sʋgʋrin, ka dii o ka o lieb o pu'a ka o da nɔŋ o. Ka li kɛ ka o sʋʋnr bʋk ka o pʋ lɛn tɛn'ɛsidi o ma Sara kum la yɛla nɛ sʋnsa'aŋɔ.
Айни замон обунашуда:
Pin'ilʋg 24: kus_gh
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation