पेरीत 19
19
इफिसुस नगर मा पौलुस
1वोनो बेरा अपुल्लोस कुरिन्थुस नगर मा होतो। तबा पौलुस भीतरी परदेसगीन को लक यातरा खतम करके इफिसुस आइस। वहान वोला काही चेला गीन मिलीन। 2पौलुस न उनको लक पुछिस “का बिस्वास करत बेरा तुमी लोक गीन को पवीतर आतमा मिली से?” उनना जवाब देईन, “हमी न यो नही आयकीसेजन का पवीतर आतमा होवासे?”
3उ तबा उ कहीस “तो तुमिना कसो बप्तिस्मा लियो से?”
उनना कहीन “योहन को बप्तिस्मा।”
4मंग पौलुस न असो कहीस, योहन ना असो सांगत पस्तावा को बप्तिस्मा दियो होतो। का “जोन मोरो मंघा आवन वालो से वोको पर, मजे यीसु पर भरोसा करनो।”
5उनना असो आयके पिरभू यीसु को नाव पर बप्तिस्मा लेइन। 6जबा पौलुस न वोको पर हात राखीस, त पवीतर आतमा उनको पर उतर गयो। अना वय अलग-अलग बोली बोलन लगीन। अना भविस्यवानी सांगन लगीन। 7वय पूरो मिलायके करीब बारा मरद-माना होतीन।
8मग पौलुस तीन महिना तकन सभाघर जावत रहेयो उ “परमेस्वर को राज” को बिसय बेधड़क बोलत अना यहूदिगीन ला समझावत होतो। 9पर उनमा लक काही लोक जिद्दी होतीन। वय बिस्वास नही करीन। बल्कि पंचायत मा एना रस्ता की निन्दा भी करन लगीन। एकोलाय पौलुस न उनला छोडके, अपरा चेलागीन ला वहान लक हटाय लेईस। उ हरदिन तुरन्नुस सिक्सा घर मा चरचा बिचार करन लग्यो 10असो काम दूई बरस तकन चलतो रहयो, एको फर यो भयो का आसिया सब रव्हन वारा न चाहे वय यहूदी होय, या त यूनानी, सब न पिरभू को बचन आयक लेइन।
स्किवास को टूरागिन
11परमेस्वर को पौलुस कन लक अजब-गजब ताकत को काम, अना अचंभा करवात होतो। 12यहान तकन की वोको छुयो अगोछा अना रुमाल बिमार गिन को कठा लिजा के छिवात होतिन अना उ साजरा भयि जात होतो। अना भूत-पलित परात होतिन।
स्किवास का सात टूरा
13काही यहूदी गिन जोन भूत-पलित हेड़त अना इतानी उतानी हिंडत होतिन। असो करन लगीन की, जोनमा भुत-पलित होतिन। उन पर यीसु को नाव आन के फूक मारके असो कव्हन लगीन। “मी तुमला वोना यीसु को नाव मा जोनको परचार पौलुस करासे मी तुमला हुकूम देवासू।” 14स्किवास नाव को एक यहुदी मुखिया पुजारी को सात टूरा भी असोच करत होतीन।
15कोनी फिरयाद पर भूत-पलित न उनला जवाब देईन, “मी यीसु ला जानासेऊ, पौलुस कोन आय यो भी जानासेऊ, पर तुमी लोक कोन आव?”
16अना उ मानूस जोन मा भूत-पलीत होतीन उन को पर झपटयो अखीन उनला हिन्सा लक कब्जा मा करके उन को पर असो मजबूत ताकत दिसायो। का वय नंगा अना घायल होयके परान लगीन। 17इफिसुस का रव्हन वारा सबा यहूदी अना गैरयहुदी गिनला मालूम भय गयो। अना सबमा भेव भर गयो। अना पिरभू यीसु को नाव को बड़ाई भयी। 18उनमा लक लगत सा जोन ना बिस्वास करी होतिन। अपरो लक कियो खोटो काम ला सबको पुड़ा मान लेइन। अना उनला परगट कर देईन। 19लगत सा लोकगीन न जोन जादू-टोना करत होतीन। वय अपरी-अपरी जादू की किताब ला आनके जमा करीन। अना सब को पुड़ा जलाय देईन। जबा उनना वोका हिसाब लगाइन, ता करीब पन्नास हजार खुरो का मोहर को बरोबर हिटयो। 20ऐना पिरकार लक पिरभू को बचन मजबूत लक फैलत गयो।
इफिसुस मा उपदरा
21जबा या घटना घट चुकयो त पौलुस न मकीदुनिया अना अखया लक होतो हुया। येरुसलेम नगर जानो को मन मा ठानिस। अना कहीस वहान पहुचानो को बाद मोला रोम देस ला भी चोवनो जरुरी से। 22वोना आपरो दुई सायता करन वालो तीमुथियुस अना इरास्तुस ला मकीदुनिया धाड़ दियो। के वय खुदच काही बेरा तकन आसिया मा रहयो।
23अना वोना बेरा पिरभू को ऐना मारग को कारन लगत मोठी आफद इफिसुस मा भयी। 24देमेतिरयुस नाव को एक सोनार होतो। जोन अरतिमिस देवी खुरो को भान्डो बनावत होतो। जोन लक कारीगरगीन ला लगत फायदा भेटत होतो। 25वोना उनला अखीन दुसरो ऐना धंधा लक जुड़यो कारीगार गीनला जमा करके कहीस, “अरे भाऊ तुमी जानासेव का हमारो यो धंधा लक लगत आमदानी होवासेत।” 26अना तुमी चोईसेव अखीन आयकी सेव का न केवल इफिसुस मा नही पर पूरो आसिया मा एना पौलुस न लगत सा लोकगीन ला बहला फुसला दियो से। उ कव्हसेस का हात को बनायो देवता सच्चो नाहती। 27एको लक नही केवल योच भेव सेत का आमरो धन्धा बदनाम होहेत। बलकी मोठी देवी अरतिमिस को मंदिर को मान खोवन को भी भेव सेत। अना जेनो देवी की पूजा आसिया अना दुनिया को सबच लोक करासेत। वोको मान छिन्डन को भेव सेत।
28जबा उनना असो आयकीन त लोक गुस्सा लक भर गईन। अना चिल्लाय-चिल्लायके कव्हन लगीन, “इफिसिलोक गीन की देवी अरतिमिस मोठी से” 29नगर मा हुल्लड़ मच गयो अना लोकगीन न मकिदुनिया लक आयो गयुस अखीन अरिस्तखुरस नामको पौलुस को संगी यातरी गिनला दबोच लेइन। अना वय रंगसाला पराय गईन। 30पौलुस न जमघट को पूड़ा जावनो चाहत होतो। पर चेला गीन न वोला नही जान देईन। 31काही पिरान्त को अधिकारी गीन जोन वोका सँगी होतीन। खबर धाडिन का उ रंगसाला मा जानो को जोखिम नोको उचलेत। 32अना कोनी काही चिल्लाय रही होतीन। अखीन कोनी काही, काहेकी सभा मा उथल-पुथल मची होती। लगत सा लोकगीन ला यो भी मालुम नही होतो का हमी जमा कायलाई भई सेजन।
33तबा यहुदीगिन ना भीड़ ला सान्त करन लाय सिकन्दर को नाव सुझाइन। तबा सिकन्दर न हात उभो करके लोकगिन को पूड़ा बचाव पक्स जाहिर करनो चाहयो। 34पर जबा लोकगीन न चीन्हिन का यो तो यहूदी से। ता लगभग दूई घंटा तकन सबच का सब एकच आवाज लक चिल्लावत रहीन। “इफिसिलोक गीन की अरतिमिस देवी मोठी से” 35तबा नगर को दिवान न जमघट ला उगो-मुगो करके कहीस “अरे इफिसिलोक गीन असो कोनतो मानूस से जोन नही जानासे का इफिसुस को यो नगर मोठी देवी अरतिमिस को मंदिर अना बादल लक पडी हुई पवितर गोटा को रखवालो से?” 36एना गोस्टी को कोनी तोड़ नाहती। त तुमी उगो-मुगो रहवो अना उताली मा काही नोको करो। 37काहेकी तुमी एना मानूसगिन ला धरके आनीसेऊ। जोन न त हमरो मंदिर गीन का लुटेरा सेत, ना आमरो देवी का निन्दा करनवारा सेत। 38मंग अदी देमेतिरयुस अना वोना कारीगीर ला जोन वोको संग सेत। कोनी मानूस लक कोनी सिकायत सेत त न्यायालय खुल्लो सेत। अना मोठो राजपाल मोजूद सेत। वहान वय एक दुसरो पर नालीस करो। 39पर तुमी एको लक जादा जाननो चव्हसेत ता एको फैसला नागरिक अदालत मा होहेत। 40काहेका अबा जोन काही भी सेत वोको अनुसार अमीला यो गोस्टी को भेव सेत। आज को बलवा को ठेका कहिं आमरो डोस्की मा नोको फूटे। काहेका यो दंगा को कोनी कारन नाहती। 41वोना ऐतरो कहेके पंचायत ला खत्म कर देइन।
Айни замон обунашуда:
पेरीत 19: NTPSP23
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
The New Testament in Powari Language © The Word for the World International and Powari Madhya Pradesh, 2023.