Yohanes 5
5
Yesus nefekaꞌosa mie ne oleono Sabat we oeno Betesda
5:1-18
1Nopalusi anaꞌa nandoo toha hohaeaꞌando miendo Yahudi maka Yesus nofoni we Yerusalem. 2We Yerusalem ne owano fointo bhalano koneaꞌano Kagualino Dhumba nandoo oe kaekadiuꞌa, weo wamba Ibrani dokonae Betesda. Oe aini doselie maka dowaliligiane tambi kafeoluꞌa lima onu. 3Ne tambi-tambi naꞌa dobhahi sepaliꞌa mie mosaki dendole-ndole. Nandoo o kabunto, o kakempa bhe kalu, [andoa dofenta-fentaa kaendono oe. 4Kapaꞌamo sepaku-sepaku seemie malaꞌekatino Ompu nosampu maka noꞌendu oe aitu. Sasuka maꞌinduluno sumampuno weo oe nopalusi kaendono oe lasao noꞌosa, o ae maka dua sakino.]
5Ne itu nandoo seemie moꞌane, tolu fulu alu taꞌumo nosaki. 6Yesus nowoha mie amaitu nendole-ndole bhe nopandeꞌaane nomponamo tapedamo amaitu, maka nopugau ambano, “Poindalo bhahaa moꞌosaa?” 7Ambano mie anaꞌa, “Waompu, miina bhe mie so mosampu kanau weo oe wakutuuno nokokaendo. Kaneꞌo akumala dogoloti kanaumo bhaindo.” 8Ambano Yesus, “Wanumo, sangke kampasi kaodoꞌamu maka kala.” 9Mie anaꞌa lasao noꞌosa, nosangke kampasino maka nokala. Tamaka oleo aitu oleono Sabat.
10Dadiꞌanomo miendo Yahudi dopugaumo ne mie nefekaꞌosa maitu ambado, “Oleo aitu oleono Sabat, weo tubhono agamantoomu ingka pae naembalia tumongku kampasimu.” 11Tamaka anoa notobhoosida ambano, “Mie mekaꞌosa kanau notudu kanau atumongku kampasiku maka akumala.” 12Dofeenamo ambado, “Laꞌae bhahaa tumuduko sumangke kampasimu maka kumala naꞌa?” 13Tamaka mie nefekaꞌosa naꞌa miina namandeꞌaanea mieno, hampano Yesus nekunsalomo ne kantawundo mie sampe miinamo natiwoha.
14Pada amaitu Yesus nopoꞌawaanemo weo Lambuno Lahataꞌala maka nopugauane ambano, “Aitu moꞌosamo, tiehemo mehabu dhosa keana nokantibhako dhumuluꞌano kadaha.” 15Mie amaitu nolimbamo maka nofohato miendo Yahudi putae Yesusmo maitu mekaꞌosae. 16Dadiꞌanomo miendo Yahudi dofekasabhamo Yesus, hampano nehabu peda maitu ne oleono Sabat. 17Tamaka Yesus tanopugau ambano, “Amaku nokahadhaa kansuhu taꞌampamo aitu, dadiꞌanomo Idi akahadhaa dua.” 18Dofetingke peda maitu miendo Yahudi tanodhulu dokopatudhu damongkoe, suano kaowu nelempagi tubhono oleono Sabat, tamaka mbaꞌinomo nokona Lahataꞌala Amano, maꞌanano nopototoꞌao wutono bhe Lahataꞌala.
Yesus nofotipandeꞌao Wutono
5:19-47
19Yesus notobhoosidamo ambano, “Amohatokoomu, kotu-kotuꞌu Anano Lahataꞌala - Idimo ini - miina bhe habu nepoolino maiꞌao ne kuasano Wutono, ane miina naoha deki nohabue Amano. Kapaꞌamo nehabuno Amano, nehabunomo dua Anano. 20Amano noasiꞌao Anano sampe nofosusuane sabhaha nehabuno Wutono; bhahamo namosusuane habu sedhuluꞌa dua kabhalano, somo kamenteꞌamiu. 21Amano nefowanu mie komate-mateno bhe nofodadida, pedamo dua anaꞌa Anano nefodadi dua ampa nepoindalono. 22Amano miina naebhitahaki laꞌae maka dua, tamaka kuasa so nafobhitahakiꞌao padamo nowaꞌane Anano, 23neanomo sabhaha mie damosibhala Anano napototo bhe Amano. Sasuka tapa mosibhalano Anano, anoa miina dua namosibhala Amano tumuduno Anano.
24Amohatokoomu, kotu-kotuꞌu sasuka metingkeno wambaku bhe marasaeano ne Tumudu kanau, ingka neꞌawamo dadi suhue dhamani. Paise naeꞌawa kahukumu, kapaꞌamo nogampimo maiꞌao ne mate nopesuamo weo dadi. 25Amohatokoomu dua, kotu-kotuꞌu nahumato tempono, aitu nohatomo, mie mateno dametingke suahano Lahataꞌala maka andoa metingkeno naꞌa dadumadi. 26Amano kamaiꞌaoꞌanomo dadi; pedamo dua aitu Anano nowaꞌane kuasa nembali kamaiꞌaoꞌano dadi. 27Pedamo dua anaꞌa padamo nowaꞌane kuasa so nafobhotusiꞌao, hampano Anoa Anano Manusia. 28Koise menteomu ane metingkeomu peda ini, kapaꞌamo nahumato tempono kosasawindo mie weo kobuhu dametingke suahano. 29Mie humabu metaano dalumimba maiꞌao ne kobuhundo, damanu bhe dadumadi suhue dhamani, tamaka humabu modaino damanu daetahima kahukumu.
30Idi miina akonipoolia maiꞌao ne kuasaku Wutoku, Idi afobhotusi noposahataa bhe nefetingkeku ne Amaku. Kabhotusiku noꞌadhili kapaꞌamo miina amangkafi kapoindaloku Wutoku, tamaka kapoindalono Tumudu kanau. 31Ane aembali sakusii so Wutoku, wambaku maitu miina nakumotuꞌua, 32tamaka nandoo mie sigaoꞌano sumakusii kanau, apandeꞌaane nesakusiiꞌaono naꞌa nokotuꞌu. 33Hintimiu padamo metuduomu mie ne Yohanes maka nesakusiiꞌaono nopulaoꞌao Idi nokotuꞌu. 34Ampamo kaowu sakotuꞌuno Idi ini miina aefaraluu kasakusiino manusia, ingka taꞌafohatokoomu kaowu neanomo osumalamatiomu. 35Yohanes maitu tapedamo kantalea humende nokotilanga, hintimiu moꞌiaꞌaneomu tilangano, tamaka sebantaha kaowu.
36Tamaka Idi bhe kasakusiiku noliuꞌe nesakusiiꞌaono Yohanes. Nepulaoꞌaoku sabhaha kahadhaa nehabuku; kahadhaa naꞌa nofotaka kanaꞌe Amaku so ahumabu. Kahadhaamo amaitu nembalimo kasakusiiku, nembalimo dua bukutiino Idi ini notudu kanau Amaku. 37Amaku tumudu kanau, Anoamo sumakusii kanau. Hintimiu miina metingkeomu suahano, miina dua mohaomu ulano. 38Bhoasaono miina dua naeate weo totono lalomiu, mbaꞌinomo miina marasaeaꞌomu ne Katuduno. 39Hintimiu poguhuꞌaoꞌomu Kitabindo anabii, kunaꞌemiu peda aitu so kaeꞌawaꞌamiu dadi suhue dhamani. Gahaꞌaitu Kitabi andoa naꞌa nosakusiiꞌao Idi. 40Ampamo kaowu hintimiu mokiidoomu maiꞌomu ne Idi so meꞌawaꞌaoꞌomu dadi suhue dhamani maitu.
41Idi miina aeꞌondofi kafosibhalando manusia. 42Apandeꞌaangkoomu, weo totono lalomiu miina sepaliꞌa bhe kaasimiu ne Lahataꞌala. 43Amai weo kuasano Amaku, gahaꞌa miina tumahima kanauꞌomu, tamaka mie sigaoꞌano domai weo kuasando wutondo, ingka tahimadaomu. 44Hintimiu gaomiu damosibhalakoomu mie bhaimiu, miina meꞌondofiomu kafosibhala maiꞌao ne Kaseemie-mieꞌano. Dadiꞌanomo, nada amai marasaeaꞌomu gahaꞌa? 45Koise kofekihiomu Idi aobhieangkoomu ne Amaku; so mobhieangkoomu anabii Musa, kapaꞌamo anoamo neposahunaꞌaomiu. 46Ane kotu-kotuꞌu marasaeaꞌomu ne anabii Musa, tetewei marasaeaꞌomu dua ne Idi, kapaꞌamo nebuhino anabii Musa nopulaoꞌao Idi. 47Tamaka ane pae marasaeaꞌomu nebuhino anabii Musa, nada amai marasaeaꞌomu gahaꞌa ne wambaku ini?”
Айни замон обунашуда:
Yohanes 5: mnbSD
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.