Yohanes 4
4
Yesus nopuga-pugau bhe seemie hobhine miendo Samaria
4:1-42
1Miendo Farisi dofetingkemo mie mangkafino Yesus bhe nekadiuno nofoliuꞌemo kabhahino mangkafino Yohanes. 2(Gahaꞌaitumo sakotuꞌuꞌano wutono Yesus miina nafokadiu, mpahinomo anaguhuꞌino.) 3Nopandeꞌaane kaowu miendo Farisi dofetingkemo peda anaꞌa, Yesus nohunsamo kadieno Yudea maka nosuli we kadieno Galilea. 4Anoa tetewei nalumempagi kadieno Samaria.
5We Samaria nohatomo ne seꞌonu kota neano Sikar, ne owano wite kawaꞌaono Yakub endefiꞌini ne Yusuf anano. #Kej 33:19; Yos 24:32 6Ne itu nandoo sumuno Yakub. Yesus nowulemo sepaliꞌa nekala-kala dadiꞌanomo nengkoha ne wiwino sumu anaꞌa. Oleo hambi-hambi ompulu haa matamo. 7Gahaꞌa nohatomo seemie hobhine miendo Samaria naetambu oe. Ambano Yesus, “Bhe idi oemu aohoꞌu.” 8Anaguhuꞌino dokalamo we kota daeꞌoli oti. 9Nopugaumo hobhine miendo Samaria maitu, “Nada amai hintu miendo Yahudi mesalo mohoꞌu ne idi miendo Samaria?” (Kapugauꞌano peda anaꞌa, miendo Yahudi miina dapokala-kalaꞌia bhe miendo Samaria). 10Ambano Yesus, “Ane mandeꞌaane kadawuno Lahataꞌala bhe laꞌae sakotuꞌuno mesalono ne hintu, ‘Bhe idi oemu aohoꞌu’, tetewei hintumo so mesalono ne Anoa, maka Anoa namaꞌangko oe meowano dadi.”
11Ambano toha hobhine amaitu, “Waompu, maiane dua ne amai oe meowano dadi naꞌa? Ingka miina kotambua, pakade sumu aini nendalo. 12Foliuꞌemo hintu bhahaa bhe awua mani Yakub maꞌa kainsami sumu aini? Anoa nofohoꞌu dua oeno sumu aini bhe ana-anano bhe kada-kadadi kakaneano.” 13Ambano Yesus, “Sasuka mohoꞌuno oe aini nakekele toha wuꞌunoa, 14tamaka sasuka mohoꞌuno oe newaꞌaoku, paemo nakekele wuꞌuno ampa suhue dhamani. O oe so newaꞌaoku naembali matano oe we lalono, oeno napontalua-lua kansuhu naeowa dadi suhue dhamani.”
15Ambano hobhine naꞌa, “Waompu, bhe idi oe anaꞌa, neanomo paemo nakekele wuꞌukua, keana dua amai aetambu oe ne ini.” 16Ambano Yesus, “Kala saliꞌi moꞌanemu maka maiꞌomu se ini.” 17Ambano hobhine anaꞌa, “Miina akomoꞌanea.” Ambano Yesus, “Nokotuꞌu pugaumu itu, miina komoꞌanea, 18kapaꞌamo moꞌanemu dolidimamo, maka moꞌane pomeatefiꞌamu itu suano moꞌanemua. Dadiꞌanomo nokotuꞌu pugaumu.” 19Ambano hobhine anaꞌa, “Waompu, aitu apandeꞌaangkomo hintu ini seemie anabii. 20Awuaꞌi mani ⸤ miendo Samaria⸥ dosombai Lahataꞌala te wawono kabhawo aini, tamaka ambamiu ⸤ miendo Yahudi⸥ ampamo we kotano Yerusalem so kasombaꞌa ne Lahataꞌala.”
21Ambano Yesus, “Parasaea kanau waꞌina, tetewei nahumato tempono o mie paemo dasumombai Amaku Lahataꞌala te kabhawo aini, paemo dua we Yerusalem. 22Hintimiu ⸤ miendo Samaria⸥ sombaiꞌomu tapa nepandeꞌaomiu, insaodi ⸤ miendo Yahudi⸥ tasombai nepandeꞌao mani, kapaꞌamo kasalamati noangka ne miendo Yahudi. 23Tamaka nahumato tempono, aitu ingka nohatomo, mie kotu-kotuꞌu sumombano ne Amaku Lahataꞌala dasumombaiꞌe maiꞌao ne totono lalondo bhe kasombaindo nabanara, kapaꞌamo Amaku nopoindaloda mie medano maitu. 24Lahataꞌala maitu o Rohi, dadiꞌanomo mie sumombano ne Anoa, tabeano dasumombaiꞌe maiꞌao ne totono lalondo bhe kasombaindo nabanara.” 25Notobhoosimo hobhine anaꞌa, “Apandeꞌaane, nahumato kaowu Omputo Fosalamatino nekonando Mesias, naefebhihitaianemo kosasawiꞌae naꞌa ne insaodi.” 26Ambano Yesus, “Ingka Idimo ini, muga-mugaunomo bhe hintu ini.”
27Tangasano dopuga-pugau, dohatomo anaguhuꞌino. Andoa domente sepaliꞌa dowoha Yesus nopuga-pugau bhe seemie hobhine, tamaka bhe seemie miina bhe meenano ne hobhine naꞌa, “Meꞌondofi ae?” Miina dua dameena ne Yesus noafaꞌao dua nopuga-pugauꞌao bhe hobhine amaitu. 28Gahaꞌa hobhine amaitu nohunsamo kaiꞌino lasao nokala we kota nofohato miendo kota. 29Ambano “Mai ondoomu, ne tatu nandoo seemie nofohato kanau sabhaha nehabuku. Bhahaa Anoamo maitu Mesias, Omputo Fosalamatino?” 30Dadiꞌanomo o mie dokalamo we simbalino kota dopoꞌawaꞌao Yesus.
31Tangasano andoa we laano sala, anaguhuꞌino dosaliꞌimo Yesus naomaa. Ambado, “Guru, humaa kadeki.” 32Tamaka Yesus tanotobhoosida ambano, “Bhe otiku tapa nepandeꞌaomiu.” 33Anaguhuꞌino tadopofee-feenamo sapada-pada andoa ambado, “Bhe mie bhahaa maꞌane oti?” 34Ambano Yesus ne andoa, “Aangkafi kapoindalono Tumudu kanau bhe amotoka kahadhaano, aitumo oti nehumaaku. 35Ingka ambamiu, ‘Tana fato wula o tobheꞌamo’, tamaka amohatokoomu: fosela matamiu, ondoomu kaampono gandum tatu, ingka nokunimo, nohatomo tempono datumobhe. 36Aitu mie tumobheno notahimamo ponambono, nefoꞌonu pehapino so kadadiꞌa ampa suhue dhamani. Dadiꞌanomo metisano bhe tumobheno sanea mowulano lalo. 37Pedamo naꞌa nokantibhamo kapalenda aini: seemie metisano, seemie tumobheno. 38Hintimiu atudukoomu tumobheomu ne kaampo tapa nemowuleꞌaomiu; bhaindo mowuleane, hintimiu kolabaꞌaono kaowuleꞌando.”
39Dobhahi miendo Samaria maiꞌaono ne kota aitu doparasaeamo ne Yesus hampano pugauno hobhine amaitu peda ini, “Anoa nofohato kanau sabhaha nehabuku.” 40Dohato ne Yesus miendo Samaria maitu, desaloiꞌe naeate kadeki bhe andoa, sampe Yesus neate ne itu haa oleo kaomponanoa. 41Sedhuluꞌa dua kabhahindo mie marasaeano ne Yesus hampano kafoinaꞌuno. 42Dopugaumo ne hobhine amaitu ambado “Insaodi taparasaea suano mbaꞌinomo tafetingke pugaumu, tamaka hampano tafetingkeꞌao wuto mani ne Anoa. Aitu tapandeꞌaanemo Anoamo ini kotu-kotuꞌu Mosalamatino dhunia.”
Yesus nosuli we Galilea
4:43-45
43Nopalusi haa oleono naꞌa Yesus nopansuhumo we kadieno Galilea, 44kapaꞌamo wutono Yesus padamo nopugau, “Seemie anabii miina damosibhalaea we liwuno wutono.” 45Nohato we Galilea miendo kadie naꞌa dotahima metaaꞌe, hampano padamo dowohae sabhaha nehabuno Yesus we Yerusalem ne hohaeaꞌa endefiꞌini, wakutuu anaꞌa bhe andoa.
Yesus nefekaꞌosa anano seemie tungguno kamali
4:46-54
Mat 8:5-13; Luk 7:1-10
46Palusi anaꞌa Yesus nosulimo toha we liwuno Kana kadieno Galilea, kaebhaliiꞌano oe nembali angguru endefiꞌini. Ne itu nandoo seemie moꞌane tungguno kamali, nosaki anano we liwuno Kapernaum. 47Nofetingke Yesus nomaiꞌao we Yudea nofoni toha we Galilea, tungguno kamali naꞌa nokalamo nopoꞌawaꞌao Yesus, nesalo nakumala namekaꞌosa anano, kapaꞌamo anano nosaki tamomateꞌano. 48Ambano Yesus, “Ane paise mohaomu tanda tapa mentela bhe giu timenteꞌaono, paise marasaeaꞌomu.” 49Ambano tungguno kamali naꞌa, “Waompu, maimo tinangke miinaꞌo namate anaku.” 50Ambano Yesus, “Kalamo, anamu noꞌosamo.” Mie anaꞌa noparasaea pugauno Yesus lasao nokala. 51Nandooꞌe we laano sala, dosumpuiꞌemo bhatuaꞌino dofohatoe anano noꞌosamo. 52Anoa nofeenada bhahaꞌi hambi seꞌae anano notanda nototomata. Ambado, “Endewi, hambi semata pana oleo sodono tanosipadaꞌamo.” 53Tungguno kamali naꞌa nokofeꞌulaimo lalono ingka wakutuumo anaꞌa Yesus nopugau ne anoa, “Anamu noꞌosamo.” Dadiꞌanomo anoa bhe kosasawindo mie weo lambuno doparasaeamo.
54Ainiꞌaemo tanda kahaa pakuno nehabuno Yesus wakutuuno nosuli we Galilea nomaiꞌao we Yudea.
Айни замон обунашуда:
Yohanes 4: mnbSD
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.