Markos 14
14
Lɔga Tɛriya Ɛrɛsɛna Yesus Sabba Mal
1Na hunaa unga ammɛa :zugu Gibiriya kèe Basika ko na Lottayiny dhɔttɛa rammanɔye, yɔk gɔldangɛa bibiyo doraa Tumu barara ko zuga madhdhɛa zugo Damiya Tumu bere kàjjɛa Muse dha bere lamiɛ ganggua senno kibhtɛ Yesus dari na kindɛ. 2Na koo daga go na se, “Ngalɔkta maya kolea gibiriyny ngakèmesso. Kako ale zugo dɛmnɛ na bhorɛɛ ba.”
3Na Yesus hunaa ngani iho Bitaniyagiye doraa hira dha bere amma :gedhdhe kèe Simon bhɛa aminɛnɛa ko zugo bayte, nɔng tɛri kona kuyɛy butulleye kèghendono bɛye kèe albatiro lɔ mala bo ɔngɔnaa hur hur gaw dhandala kèe nardo dha bere ko aha gena ngani kùshugurrandao. Na ino na ɛrɛsɛ Yesus sabba.
4Na zugaa ɛlla ngonu gen hunaa orrɛa ngalɔktaye, dɛbɛ na mɛzzi kɛngɔ na se, “Na dha mal nganga hung tiranyɛ kɛ ɔng? 5Ngamalda nɔng hunde wa kàtalday birinyaa bo mɛra jorronɛa ga kàgadhiyɛa hira messo zinggo oyo dhɔnɛ dhɔng#14.5 Tuga Giriki se, “...jorronɛa dinarinya 300.” Dinarinya a sara birinyaa zuga Rome. Na dha bere ngabɛrguonu hunde hiri me zinggo kali dhɔngge, kàgadhi dinar dhɔnɛ. na kàyɛ bhoyoga, anda a challi.” Na wologo tɛri gɛrrɛng gɛrrɛng.
6Na sɛɛsɛ :Yesusi, “Ɔddigiyɛ! Ngamargeo! Nɔng wa mesogonyɔ lɔga bo challa kɛr. 7Yɔk bhoyoga ɛllo ko igge kari tii, na kolee hinnonɛoye ɛanoyɔ. Nɔng anye ko igge kari tii ngakɛllo. 8Nɔng ngatɛrita wa messa lɔga ɔana :nɛa, na udhuyɛsɛa rɛa nanu mal sabbɔ hunde ngani kèrro na kòytonyoye. 9Ga shigitɔ! Ngalɔkta wa me :ngatɛritaye, ale yokkɛ :zugu ba kumulɔng hande hɛyɛ na madhɛsɛnɛ zugo kamannaa Tumu challaye, na kàgadhdhanɛ nɔng dhul ko kingi.”
10Na koo bhɛa zuga kɔbhbhɛa nɔng ku 12, na kèleo Yihudhaa Askorotu ogo bhɛa gɔldangɛa bibiyo doraa Tumu barara na kɔgɔdhɛsɛ Yesus. 11Na yɔk hunaa shikkɛa ngalɔktaye, hinisiya gɛ te hɔli. Na bhiiktɛsɛ lɔgɔ na ale kayɛ birinya. Na nɔng lamiu bhee ku tolu na kɔgɔdhɛsɛyɔ.
Lɔga Yesus Ammɛa Ko Zuga Kɔbhbhɛa Nɔng Gibiriya Basika Na Kennɛnɛa
12Na hunaa tewa unga ku sabba ammɛa :zugu Gibiriya Kàmmɛa Lottayi na zugo nissɛa mɛdɛrniya senno kusigi kolea Gibiriya Basikaye, yɔk zuga kɔbhbhɛa Yesus hoya gɔra nɛnɛ na ghini na seyɛsɛ, “Amissɛa ami Gibiriya Basika kàyto na kèmesoginy ori?”
13Na nɔng ibha zuga kɔbhbhɛa nɔng gee ku ramman na egu na sɛɛsɛ, “Ago ɔr toye. Aleo itinynyanɛno ko hirre may it ma jɔye, na kɔbhɔ nɔng. 14Na hunde dakto doree tunnuk :nɛaye, ghini ɛnaa dori na seyɛsɛ, ‘Hira madhdhiy wa senno dhɔlagiy doriye nɛn kɔmɔniny se kussɛ ko zuga kɔbhbhɛa nɔng Gibiriya Basikaye. Na a inong?’ 15Nɔng aleo dhɔllagung doraa ku balanggi tundɔ bo bhɔa dha kìghiro na lɔmma aha. Na amissɛa na mesigi ngonu.” 16Na yɔk ago chɔɔ ɔr toye na dakta lɔgɔ damiyaa yogɛsɛna :Yesusi na mesigi amissɛa ammɛa Gibiriya Basika.
17Na hunaa bho barsaye, Yesus dhiya ko zuga kɔbhbhɛa nɔng ku 12 chɔɔ dori. 18Na hunaa ɛlla bay na aminɛnaye, Yesus yogo lɔgɔ na seu, “Ga shigitɔ! Bhɛa nu kona ale kɔdhdhagany mirɔga. Na chɔɔ ngahirronu mɛa toye a nganda kumulnɛno kariye.”
19Na yɔk munyu na ghini Yesus bhiy bhiy na seyɛsɛ, “Nɔng anye ngakaniyo, oo kani anye?”
20Na nɔng yagɛsɛ na sɛɛsɛ, “Bhɛa nu anɛo 12, nɔng a inde kɛhɛyɛo sɛnɔ kɛdhɛmɔ kariye. 21Nɔng Hiri Hoynɛ damiya bere lɔga gɛnyɛ kɔ̀gɔdhdhɛsɛna dadab, ale kɔyɔ. Na nɔng hirre kɔdhdhɛsɛn mirɔgaye, ale ruɛ rɛ. Nɔng chɔɔ hunde bere ngairritinya, anda a challi.”
22Na yɔk hunaa ngani aminɛnaye, nɔng Yesus ibha lottay na tuhu Tumu na ngɛru na aynɛ zuga kɔbhbhɛa nɔng na sɛɛsɛ, “Nɔ! Nganda a rɛa nanu.”
23Na koo ibha kombiya lɔmma woyna kùchudhdhana na tuhu Tumu na aynɛ yɔk na irto chinyi chinyi kumulɔng. 24Na sɛɛsɛ, “Ngagiya a nyawaa ganyu ale kaalgalɛi zugo ga mɛra na kibhiigɛi lɔga ngani chaga. 25Ga shigitɔ! Anye kɔdhdhanɛ ngakalda na ngawoynda sɛgɛn ngakamayiyo ko bhee ale kamayɛ na ngani kùchudhdhana kolea ale lɔmɛa :Tumu zugo.” 26Na hunaa ɛrta Tumu yelloyɔ na tewa ushaye, dhɔyɔ ɔr na koo ago Kutula Girarruny.
Lɔga Yokkonɛa :Yesusi Bhɛa Ale Imagɛa :Betirosi
27Na koo Yesus sɛɛsɛ zuga kɔbhbhɛa nɔng, “Igge ale dhɔttanyu na bhasanɛno kumulɔng ke ngaya lɔga bere kɔ̀gɔdhdhɛsɛna dadaba lɔga Tumu senɛ,
‘Anye ale kinisi hira iwonɛna
na mɛdɛrniya gɛnyɛ bhasanɛyɔye.’
28Na nɔng hunde ale kabansan rɛsɛyɔ na te ushaye, ale kijimi Gelilagiye sabbɔ na kìtinyanɛnɛ ngonu.
29Na nɔng Betiros sɛɛsɛ, “Chɔɔ ko hunde kɔdhɔttiny kumulɔng, nɔng anye ngakɔdhɔttinyo dhul.”
30Na sɛɛsɛ :Yesusi, “Ga shiktɔ! Inye koo ngabarta hunde kobiya ku sabba kɛngi ramman ngani kɔrɔkkoye, imaggany jagarɛ kɛngi sizzi.”
31Na kalda Betiros yogɛsɛ Yesus lɔgɔ ke dhandali na seu, “Chɔɔ ko hunde kàdaga lɔkte dhandali kèe kèrtɛ ko inye kari, anye ngakimagginyo dhul.” Na ko yɔk zuga kɔbhbhɛa Yesus ku gena se nganga kumulɔng.
Lɔga Yesus Allinɛnɛa Ko Tumu Getesemaniyagiye
32Na koo banda na ago bhee kèe Getesemaniya, na Yesus nɔng sɛɛsɛ zuga kɔbhbhɛa nɔng, “Anye hunde ngani kallinɛno ko Tumuye, igge ga reyɛ ngaya.” 33Na ibha Betiros ko Yaykob ko Yohanis na dhi kari. Na hunaa ngani hɛaye, nɔng shurɛ na munyuu goore. 34Na sɛɛsɛ, “Anye hinisa nanu wa ɛsɛdhdha lɔgɔ na kushurɛu goore na rɛa nanu ngani ngakoriyo. Na mɛa igge ga reyɛ ngaya, na tɛldi tunɔ!”
35Na ogo ko rɛna bhe chinyi na dhagɛ rɛ ba ke shura na alliyɛ ko Tumu na hunde kesea ɔninyaye, kolee ale kèe kɔ̀chɔllayɛyte, ngadokkono. 36Na seu, “Babae, Babae, inye ani na ɔani lɔgɔ kumulɔng. Na mɛa isogɛ ngakombita chɔllaunyde bhɛa nanu. Na nɔng any kubhugnyɛsɛ :lɔga sennani :inyo. Ga kesennani :anyo ngabhugnyɛsɛnɛ.”
37Na hunaa wokkono chɔɔ bhɛaa dhɔyɛa zuga kɔbhbhɛa nɔng ku sizziye, aru hunde dhaa tunggioye. Na eliu Betiros na sɛɛsɛ, “Simon, wa tungu? Na chɔɔ wa rɛginy bhɛa ihɛi sati dhɔnɛ tunɔ na renɛnɛi? 38Tɛldi tunɔ na mɛdhta na alliyɛ ko Tumu, ngadakta lɔkte illobbungɛ. Yɔk hinisiya zugony bhɛa senno kemesɛ lɔga challa ujjonɛyɔ, na yɔk rɛhi a laynɛ.”
39Na koo ogo ko rɛna bhe chinyi sɛgɛn, na alliyɛ ko Tumu na ogolu lɔgaa ogollo sabbɔ sɛgɛn. 40Na hunaa wokkono sɛgɛnde, aru hunde dhaa bhiikta :ungu na tunggioye. Na yɔk timaga chɔɔ lɔga senno kayaktɛsɛ nɔng.
41Na hunaa okka na alliyɛa ko Tumu sɛgɛn na wagaa jagarɛ kɛngi sizziye koo sɛɛsɛ, “Wa ngani rɛhi bhiiginɛ na ungusso dirr? Te usha! Mɛa wa tewa kolea bhugnyɛsɛnɛa :lɔga bere yokkono :Tumu. Chɔɔ ga argitɔ! Nɔng Hiri Hoynɛ mɛarrɛ kɔ̀gɔdhdhɛsɛn zuga messɛa lɔga gɛrsa na kɛ̀hɛyɛyɔ. 42Na mɛa banda, kago! Nɔng hira senno kɔgɔdhagany mirɔga a nganda kunde.”
Lɔga Kìbhɛa Yesus
43Na hunde chinyi ngani yokkono lɔgɔ ngangaye, bhɛa zuga kɔbhbhɛa nɔng ku 12, na kènno Yihudha ko. Nɔng bere dhɛanɛa ko zuga bo mɛra ekkonɛa :gɔldangɛa bibiyo doraa Tumu barara ko zuga madhdhɛa zugo Damiya Tumu bere kàjjɛa Muse ko zuga Ayhudhi bibiyo na honynyo ga bo lɔmmanɛa mashachina ko lurginya. 44Nɔng hira kɔdhdhɛsɛna Yesus mirɔga dhaa sabbɔ dogɛsɛn zugo go na senɛsɛn, “Hirre ginaye aynde aleo kisai na kɔchɔmiye. Na igge ibhigi na kidhigana :bholisɔ shɛɛ.” 45Na hunaa dokkɛa ngonuye, nɔng Yihudha ogu na assa Yesus ke tiri na sɛɛsɛ, “Hira madhdhiy!” Na chɔmu. 46Na zugo ibhigi Yesus na chɛbɛyɛ. 47Na bhɛa zuga bere chillɛa ngonu kona hɔrɔa mashaa nɛnɛ na kedhdha gaymaya gɔldanga bo doraa Tumu barara nyabhi.
48Na nɔng Yesus sɛɛsɛ zugo, “Ngangaye wa muktiyao na lɔgɔndao mashachina ko lurginya na ibhtonyu huna naa kani chimtay? 49Nɔng anye annaa taa kɛ̀lla kari na kamadhi zugo tu kɛnga doraa Tumu barara na igge ngani ibhtonyuo. Na nɔng bhee ibhbhɛanyu mɛaye, a ngaya kèe kubhugnyɛsɛ :lɔga bere kɔ̀gɔdhdhɛsɛna dadabinyaa lɔga Tumuye.” 50Na yɔk zuga kɔbhbhɛa nɔng dhɔyɔ kumulɔng na bhassayɛ.#14.50 Tuga Giriki se, “...jarayɛ.”
51Nɔng ngonu bere lɔmma tɛgayte maluk ruma ku salala hɛtta ko bharasi na kɔbhbha Yesus wurtɔ wurtɔ. Na hunaa ibhbhɛa :zuguye, 52dhɔyɛsɛ ruma nɛnɛ na ngeu ngaulo.
Lɔga Kɛ̀hɛyɛa Yesus Bhɛa Zuga Ayhudhi Bibiyo Kedhdhɛa Lɔgɔ
53Na yɔk zugo ibhta Yesus na aytɛ chɔɔ tu kɛnga gɔldanga bo doraa Tumu barara. Na gɔldangɛa bibiyo doraa Tumu barara ko zuga madhdhɛa zugo Damiya Tumu bere kàjjɛa Muse ko zuga Ayhudhi bibiyo muktiyaa kumulɔng. 54Na nɔng Betiros tɛa wurtɔ ko rɛna na kɔbhbhɛ wurtɔ wurtɔ ko bhee dogɛ tu kɛnga gɔldanga bo doraa Tumu barara. Na koo assa zuga bhɛginɛna ngonu na tɛa bay na sa go kari.
55Na yɔk gɔldangɛa bibiyo doraa Tumu barara ko zuga Ayhudhi bibiyo kedhdhɛa lɔgɔ kumulɔng lami lɔga dha bere ɛddɛa :Yesusi na kòrɛsɛna na kichildɛ na kinditɔ. Na koo lami na ngani ngajɔanɛo dhul. 56Na zuga bo mɛra hoya na makta lɔga ku butomo Yesus ngani kemessao. Na ngalɔktonu dhugunnonɛ :yɔkkuye kumulɔng, tɛldi bhiy bhiy na bhee anɛ dhɔnɛ garu.
57Na koo zug gena banda na makta lɔga ku butomo na se, 58“Nɔng ngahirra bɔɔ yogoa lɔgɔ na kishikto hunde se, ‘Anye ale kobolkii ngadoriya Tumu barar bere kɔdhdhɛ :zugu sɛnɛye, na kɔgɔdhdhi na zugo sɛnɛ ngani kɔgɔndao kona ungo sizziyɔye.’” 59Na yɔk chɔɔ ko hunde kɔɔbhta lɔgɔ nganga, yɔk ngalɔktonu dhugunnonɛ :yɔkkuye, tɛldi bhiy bhiy na bhee anɛ dhɔnɛ garu.
60Na koo gɔldanga bo doraa Tumu barara bana zukke toye na ghinu Yesus na sɛɛsɛ, “Na inye mɛa seni ɛnɛng? Na ngalɔkta chillɛinyɛ :zugu na kɔbhbhanɛye, a dhere oo a butomo? 61Na nɔng Yesus tɛu rib na lɔgɔ ngani ngayagɛsɛnno.
Na gɔldanga bo doraa Tumu barara ghinu sɛgɛn na sɛɛsɛ, “Ngangaye inye ani Kirisos Eriya Tumu Komoruya Tuhinɛna chi dha?”
62Na nɔng Yesus yagɛsɛ na sɛɛsɛ, “Ee! Kani nɔng chi. Na nɔng igge ale orro Hiri Hoynɛ hunde i siyɔ sɛtɛna Tumua Bo Ɔnnɛna na kun tumɔ na bo woono idhogiye toyeye.” 63Na gɔldanga bo doraa Tumu barara dɛbu na ɛrrɛyu ruma nɛnɛ na sɛɛsɛ zugo, “Ngangaye bhee kàlamɛɛ zukte orronɛ lɔgɔ kawarreye, a ore? 64Nɔng a nganda wa dhɔmma Tumu na shiktoye. Na mɛa igge senno ɛnɛng?”
Na yɔk ujjukta kumulɔng na se, “Maya rɛsɔ!” 65Na bhɛa ngazuktonu sennɛ ngangaye, gena tusɛsɛ mɔdha na chɛbɛ kawarɛ na chɔ sɛnɛ na bhɔsɔrɔ na seyɛsɛ, “Hunde ani hira yokkoni lɔga yokkono :Tumuye, ga yogogiy inde ujjenyde!” Na ko yɔk zugaa bhɛginɛna ibhta na nyɔgɔ ring ring na aytɛ.
Lɔga Kɛngnganɛa :Betirosi Yesus
66Na Betiros hunaa ngani iho tu kɛngɔ tana karanɛye, sedhdhea kachchɛa gɔldanga bo doraa Tumu barara kona ko. 67Na aru Betiros hunde so goye, na gɔnyu churr na sɛɛsɛ, “Ko inye ani hira taa ɛllo ko Yesusa Nazireti kari so.”
68Na nɔng Betiros kɛnga na seu, “Ngasedhdheyta nganda, anye ngalɔkta yogiye kimagiyɔ, ngakaggayo!” Na dhɔyu tu kɛngɔ na ogo gɔrre waranunyde. Na kobiya ku sabba rɔgu.
69Na sedhdheyaa gina hunaa orro Betiros ngonu sɛgɛnde, sɛɛsɛ zuga chillɛa ngonu, “Bhɛa zuga kɔbhbhɛa nɔng kona a nganda.” 70Na nɔng kɛnga sɛgɛn.
Na hunaa ihono bhe chinyiye, zugaa chillɛa ngonu seyɛsɛ, “Dhaa bhɛa zuga kɔbhbhɛa nɔng kona ani :inyo chi, ke ngaya anɛ hira Gelilaye!”
71Na nɔng Betiros kalda kɛnga na chɔru rɛ na sɛɛsɛ, “Anye ngahirra yokko :iggeuye, kimagiyɔ!”
72Na nɔng hunde chinyi ngani yokkono lɔgɔ ngangaye, kobiya ku sabba rɔgu ke tiri sɛgɛn. Na nɔng kadha lɔgaa yogɛsɛna :Yesusi na senɛsɛna, “Inye koo hunde kobiya ku sabba kɛngi ramman ngani kɔrɔkkoye, imaggany jagarɛ kɛngi sizzi.” Na turu sak sak.
Айни замон обунашуда:
Markos 14: SUQ
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
©2023 Suri Translation Project which is a project of the Ethiopian Evangelical Church Mekane Yesus