Markos 12
12
Lɔga Ɛlɛhɛnnanɛa :Yesusi Lɔga Zuga Kɔ̀dhɔyɛsɛna Gua Woynuny
1Na koo ɛlɛhɛnɛsɛ lɔk gena na sɛɛsɛ, “Hir kona bere lɔmma gua bo goore na immo woyn#12.1 Woyn a kɛte hɛt ko kɔllɔlɔri na bhichang ngachillo. Hunde childe, hɛt ko kurmay oo gindiya dhisɛna rɛ kɛyɔ na chillana. Na bhɛa ku banggurra hɛo ginduy. Na hunde dhunga kawarɛ na eggiuye zugo dhuchchanɛ na chudhdhɛ na messɛ ke gimay. na lukko sari na kɔdhdhɛsɛna hayua kɛ̀bhɛgɛa na bhɔkkana loga ale kùchudhɛa. Na koo dhɔyɛsɛ zuga kɔhinɛna gena na kɛbhɛgɛ na ale kagadhi ahaa suneonɛa gena. Na nɔng ogu ɔr konnɔ rɛna. 2Na hunaa tewa kolea suniynyde, koo ego hira kachcha nɔng kona chɔɔ bhɛa zuga bere dhɔyɛsɛna gu na kɔgɛ kawara woynuny gen na kayɛsɛyɔ. 3Na yɔk zuga bere kɔ̀dhɔyɛsɛna gu ibhigi hiraa kèkkono na dhaga na chugu hɔlɔng. 4Na ɛnaa guyny koo ibha hira kachcha nɔng kona sɛgɛn na ego. Na yɔk zuga bere kɔ̀dhɔyɛsɛna gu ibhta hiri na dhaga sabba bɛl bɛl na ayɛ liya na chuguyɛ. 5Na ɛna koo ibha hir kona na ego sɛgɛn. Na yɔk zuga bere kɔ̀dhɔyɛsɛna gu kalda ibhta na indiyɛ. Na ɛna koo ego zuga bo mɛra gena na yɔk zuga bere kɔ̀dhɔyɛsɛna gu ibhta ngazuktonu na gen dhagayɛ, gen indiyɛ. 6Nɔng dha bere bhɛa zuga ekko :nɛa hira ngani kekkao dhɔnɛ dhɔynɛyɔ. Nɔng ngandonu dha bere a eriya nɛnɛ ibhɛsɛna hini. Na koo wurtɔ ɛsɛdhu lɔgɔ na seu, ‘Ale eriya nanu ɛngɛrsɛyɔ.’ Na ibha na egu. 7Na yɔk zuga bere kɔ̀dhɔyɛsɛna gu hunaa orrɛa hunde kunde, daga go na se, ‘Nɔng nganda a hoynɛye ale sɛrɛ ahaye. Na mɛa kàgo kìndi na aha kɛ̀sɛrɛ ꞉aggeu.’ 8Na koo ibhigi na indi na aytɛ na ujjugu sariyɔ bhɔ. 9Na igge hunde ɛlɛhɛnnoye, anda ɛnaa guyny ngazukta ale me ɛnɛng? Nɔng ale kun na dhi yɔk na gu ajjɛ zuga kɔhinɛna gena. 10Na igge ngangaye lɔga bere kɔ̀gɔdhdhɛsɛna dadaba lɔga Tumu bere ngani toyito?” Yɔk annaa bere sennɛa,
‘Bɛa marrɛa :zuga kɔdhdhɛa doriyo,
wa tewa inde egenggisheono dori sabbɔye.#12.10 Zuga Isirayeli doriyo kɔdhdhɛ bɛnne na aynde ɛlɛhɛnɛsɛnɛ Yesus huna bɛa marrɛa ꞉zuga kɔdhdhɛa doriyoye. Na nɔng agge damiya na, doriyo kɔ̀gɔn kɛnɛ. Na ko agge hunde kɛlɛhɛnɛsɛn Yesus kɛya dori ngairishshoo na marrɛa ꞉zuga kɔdhdhɛa doriyoye, a challi.
11Yɔk ngagiya a lɔga bere messo :Komoruyɔ Tumu.
Na hunde kùguny kawarreye kìwachiyɔ.’ ”
12Na yɔk gulsachinaa Ayhudhi taga ngalɔkta ɛlɛhɛnnana :Yesusiye hunde dhaa agga kòwologɛa yɔkte na lami ganggua senno kibhtɛ nɔng. Na koo tɛngɛrɛ zugo na dhɔyɔ na ago.
Lɔga Kàgadhiya Komoru Kesar Gharata
13Na gulsachina zuga Ayhudhi ibhta zuga kɔbhbhɛa damiya Bhɛrɛsi gen ko bara Herediosi ke siwonyoga na koo ittono na kɔɔngɔ Yesus lɔkke. 14Na yɔk koo hoya na seyɛsɛ, “Hira madhdhiy, inye hunde ani hira yogi lɔga ku dhereye, agge kaggaoyɔ ke ngaya lɔga yokkɛinyɛa :zugu ngatɔgiyɛo na zugo gunyi kawariya dhɔnɛna na madhɛsɛn lɔga Tumu dhereye. Na agge ngaya kàgadhiyɛ Kesar#12.14 “Kesar” a bhɛa kènɛa “komoruya Rome.” gharataye, a challi oo a gɛrsi? 15Na maya kàgadhiyɔ oo ngakàgadhiyo?”
Na Yesus tagu ghanuna ngazuktonu tabhbhɛa nɔng nigiyayɔ na sɛɛsɛ, “Ngangaye, senno kɔngganyu kɛ ɔng? Ga ayanyu tamuniya ku biri dhɔnɛ#12.15 tamuniya ku biri dhɔnɛ Tuga Giriki se, “...dinar dhɔnɛ...” Dinarinya a sara birinyaa zuga Rome bere kinginye. Na dha bere ngabɛrguonu hunde hiri me zinggo kali dhɔngge, kàgadhi dinar dhɔnɛ. na kàrtɔ.” 16Na ayɛ. Na nɔng sɛɛsɛ, “Ngaɛssa ko ngasarra ɛl ngatamunitaye, agga gigi?”
Na yɔk yaktɛsɛ na seyɛsɛ, “Agga Kesari.”
17Na nɔng sɛɛsɛ, “Ee, gee Kesariye, ayɛ ɛna Kesar, na gee Tumuye, ayɛ ɛna Tumu.”
Na yɔk iwachi nɔng.
Lɔga Kìghinɛa Yesus Lɔga Gammany Hunde Ale Kàbansana Rɛsɛɔye
18Na koo zuga kɔbhbhɛa damiya Sodhokka#12.18 Zuga kènno Sodhokka a zuga lɔga ale bansanɛa :zugu rɛsɛyɔ ngayɛbhbhɛayo. lɔga ale kàbansanɛa rɛsɛyɔ ngayɛbhbhɛayo, hoya bhɛa Yesusi na kighini lɔk gena. 19Na ghini na seyɛsɛ, “Hira madhdhiy, nɔng Muse bere tɔgɔdhagiyɔ lɔgɔ dadabɔ na seagiyɔ, ‘Hunde gochonga hir konnuny dhumana tɛri na erro ngani kirriyoo na rɛse, tɛri any kɛsɛrɛ :gɔynɛ na kirriyɛsɛ erro.’ 20Na dha bere lɔ zukte ku issabbay ku gɔynggɛ. Na na ku aw koo ibha tɛri. Na eri ngani kirriyoo na ere. 21Na tɛri koo sɛrɛu :bhùguya nɛnɛ. Na ko nɔng eri ngani kirriyoo na ere. Na sɛrɛu :naa kɔbhbhana sɛgɛn. Na ko nɔng ere nganga. 22Na bhɛa anɛa issabbay tɛldi ko ngatɛritonu kumulɔng na erite dhɔnɛ ngani kirriytoo na ergiyɛ. Na koo wurtɔ ko nɔng tɛri dhaɛ. 23Na yɔk bhɛa anɛa issabbay annaa bere tɛlda ko nɔng kumulɔng. Na kolea ale bansanɛa :zugu rɛsɛyɔ, tɛri ale anna inong?”
24Na yagɛsɛ :Yesusi na sɛɛsɛ, “Igge bhee ɛddɛyɛo lɔgɔye a ngaya imagɛo lɔga ɛlla dadabinyaa lɔga Tumu ko ɔnneya nɛnɛye. 25Yɔk zuga bere rɛsɛa hunde ale bansanɛye, ngagamnɛo. Na hɛt ko zuga ekko ꞉Tumu tumɔ. 26Chɔɔ lɔga dhugunnogiyɛa bhɛa zugo ale bansanɛa rɛsɛyɔ gena, a lɔga bere kɔdhdhɛsɛna :Muse dadaba nɛnɛ toye. Yɔk ngalɔktonu agga bere kòyogɛsɛna kala bere ihɛa :Tumu kuzubiyɔ toye na kèsenɛsɛna, ‘Anye kani Tumu Komoruya Awurahami ko na Isaki ko na Yaykobi.’ Na igge ngalɔkta bere ngani toyito? 27Nɔng Tumu a Komoruya zuga ɛlla basseyɔ. Komoruya zuga rɛssɛa ngayo. Na igge wa ɛddɛo goore dhogoy.”
Lɔga Ɛlla Damiya Tumu Jorronɛa Lalugɛ Kumulɔng
28Na hira madhdha zugo Damiya Tumu bere kàjjɛa Muse kona ko na shigu lɔgaa ɛkkɛnyannɛnɛa :Yesusi ko zuga kɔbhbhɛa damiya Sodhokka. Na hunaa tagga hunde Yesus dhugunɛsɛn zugo lɔgɔ dib dibte, ghinu na sɛɛsɛ, “Ngangaye bhɛa lɔga ɛlla kerɔ bere ajjiy :Tumu na kɛ̀bhɛgɛyɛ, inde jorrono lalugɛ kumulɔngge, a inong?”
29Na Yesus yagɛsɛ na sɛɛsɛ, “Inde jorrono lalugɛ kumulɔngge a inde se, ‘Zuga Isirayeliye, ga shigitɔ! Tumu Komoruya na, a dhɔnɛ sɔng, kona ninggɛ. 30Na ko inye ibhɛsɛ nɔng hini goore na teyel surr hinisɔ toye ko kuloyɔ ko lɔga ɛsɛdhi ko gidhdhinga nunu kumulɔng.’ 31Na inde kɔbh ngandaye se, ‘Hira bhakko kari ibhɛsɛ hini na teyel hunaa rɛa nunu.’#12.31 Ngalɔkta sennɛ, “Hira bhakko kari ibhɛsɛ hini na teyel hunaa rɛa nunuye,” dhugunnogiyɛ bhɛa ɛlɛhɛnɛa zukte kàgannɛye oo zugo kumulɔng hung. Bhee ɛlɛhɛnɛ zuga kàbhakka kari sɔng oo zuga yɛbhbhɛa Tumu sɔng ngayo. Nɔng damite jorrono ngagiya ku rammande kona ninggɛ dhul.”
32Na hira madhdha zugo Damiya Tumu bere kàjjɛa Muse yagɛsɛ na sɛɛsɛ, “A challi hira madhdhiy, ngaya dhugunnonɛ bhɛa Tumu anɛa dhɔnɛ sɔng na na hɛtta ko nɔng kona ningginɛna dhulde, a dhere. 33Ngadamita yokkonɛye, nɔng hiri maya ibhɛsɛn Tumu hini na yel surr hinisɔ toye ko bhɛa ɛsɛdhɛa lɔgɔ ko kuloyɔ ko gidhdhingɔ kumulɔng. Na dhaa hunde kìbhɛsɛn hira kàbhakka kari hinisi na kèyelde, jorrono chɔɔ ahaa kùddulɛsɛna Tumu ko ga kàjjɛa kumulɔng.”
34Na Yesus hunaa orro hiri hunde yagɛsɛn lɔgɔ huna hira gaa bho shɛɛye, sɛɛsɛ, “Inye bhɛa senno kɔtɔlɔmɛiny :Tumu dhaa tɛu jaa.” Na kalda wurtɔ hirre gissono nɔng na ghin lɔgɔ garu.
Lɔga Ghinɛa :Yesusi Zugo Hunde Kirisos A Eriya Niniye
35Na Yesus hunaa ngani madhdha zugo doraa Tumu barara tu kɛngɔye, ghinu na sɛɛsɛ, “Ngangaye, yɔk zuga madhdhɛa zugo Damiya Tumu bere kàjjɛa Muse sennɛ, ‘Kirisos a eriya Dawiy’ ɛnɛng? 36Nɔng Dawiy rɛ, kala bere ajjɛa :Kuloya Tumu lɔgɔ na yokkono, annaa bere senno,
‘Tumu Komoru wa sɛɛsɛa Komoruya nanu#12.36 Ngalɔkta a lɔga bere kinginye dha bere kòyogɛsɛna Kirisos hunde mɛzzɛɛ ko Baba na Tumuye. Na ngalɔkta bere kɔdhdhɛsɛn Dawiy dadabte ɛlɛhɛnnɛ bhɛa Kirisos anɛa Komoruya nɛnɛ.,
“Anye ko bhee kɔmɔgɛ mirɔga gunyu na koddogɛsɛn ba na allinɛnɛ :inyo, ga tɛ siyɔ sɛtɛna nanu.”’
37Na Dawiy hunde a nganda dha bere eli ‘Komoruye’ go, anda eriya nɛnɛ a ɛnɛng?”
Na yɔk ngazuktonu bu mɛrte bere chirarrɛa nɔng ga bo hinisi hɔla.
38Na Yesus hunaa ngani madhinɛnaye ibbayu zugo na sɛɛsɛ, “Ngakitabhtung :zuga madhdhɛa zugo Damiya Tumu bere kàjjɛa Muse go! Yɔk a zukte hinnɛ bhɛa malugɛa ruminyaa bo rammaya dɛldɛla ghurtɛa ba ko bhɛa woyɛa gawugiye na kissa :zugu, 39na hunde hɛ doriyoa madhinɛnɛa zuga Ayhudhi lɔga Tumuye, hinnɛ alleyiya challa. Na hunde hɛ hana ammɛa ꞉zugu amissɛye, hinnɛ alleyiya ɛlɛa :zuga bibiyo. 40Na yɔk hunde allinɛ ko Tumuye ghurtɛ lɔgɔ tɔllɔng na kargi :zugu, na tiranyɛ tɛrroa ku bhoyoga na usurrannɛ ahaa gɛ. Yɔk ngazukta ku ngangaye kolea ale kedhdhɛa ꞉Tumu lɔgɔ, attiya nɛ a bu.”
Lɔga Tɛriya Ajjɛa Tumu Aha
41Nɔng Yesus dha bere i doraa Tumu barara bhɛa ranɛna ko bhɛa ihɛa :giligiliya kùmugɛsɛna ahaa kàjjɛa Tumu. Na zuga bo mɛra hunde ojjɛsɛnɛ ahaa gɛ giligiliye, ortɔ. Na aru zuga lɔmmɛa aha hunde ibhbhanɛ birinyaa bo mɛra na ojjɛsɛnɛ giligiliye. 42Na koo aru tɛrite ku bhoyogi hunde ko nɔng ibhbhana tamuninyaa chicho chicho chɔɔ biri dhɔnɛ ngaungusinɛnao gee ku ramman na ojjɛsɛn giligiliye. 43Na nɔng eleo zuga kɔbhbhɛa nɔng na sɛɛsɛ, “Ga shigitɔ! Ngatɛrita ku bhoyogi ojjɛsɛn ahaa gɛnyɛ giligiliye wa jaraa gaa ojjɛsɛnɛa :ngazukta kumulɔng. 44Yɔk ngagiya ku gende kumulɔng ajjɛ bhɛlɛga. Na nɔng ngatɛrita wa ibhaa ga gɛnyɛ kachchana bhoyomo kumulɔng na ojjɛsɛa dhɔng na tɛwa hɔlɔng.”
Айни замон обунашуда:
Markos 12: SUQ
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
©2023 Suri Translation Project which is a project of the Ethiopian Evangelical Church Mekane Yesus