Lɔgɔ Sabba 9
9
Lɔga Bere Bhiigɛsɛna :Tumu Ko :Nɔa
1Na Nɔa ko erroa gɛnyɛ tuhu ꞉Tumu na sɛɛsɛ, “Bhɛldɛ na te mɛri na tɛhɛtɛy ko ba. 2Na kɛginyaa bibiyo ko ga silolnɛna bay bay ko shɔa ko urgusa kumulɔng any kɔtɔlɔmɔ dɛɛsey na kɛtɛngɛrtung na alliyɛy ꞉iggeu. 3Na mɛa ngaahaya lɔmmɛ bassey woɛ bayte, usigi kumulɔng damiya bere kajjɛungu kɛnɔ kawarɛ sabbɔ.
4Na ayuga kɛga nyawa bay ngani kataandao ngaammo ke ngaya bassey i nyabbe toyeye.#9.4 Zuga Isirayeli sennɛ basseya kɛginyany ko na zugony kumulɔng i nyabbe toye. Na hirre am ayuga kɛga nyawa bay ngani kataandaoye heo ko am kɛga ngani iho basseyɔ. 5Na ko yɔk nyawaa gu lɔmmɛ bassey. Na hunde kɔdhdhung :hir konnɔye, ngahirronu lɔ nyawa bhɛa nanu na ale kighini na kattiiyɔ. Na chɔɔ hiri hunde am :kɛk konnɔye, ngagalitonu ko nɔng lɔ nyawa na ale kighini na kattiiyɔ. Na ko nɔng hir kona hunde kɔn lallɛnde, ngahirronu lɔ nyawa na ale kighini na kattiiyɔ.
6Na hirre kɔn hiriye
ko nɔng ale kɔn ꞉hiriyɔ,
ke ngaya bere kèghendonɛ
na kɛ̀lɛhɛnagɛany anyeye.
7Na igge bhɛldɛ na te mɛri na tɛhɛtɛy ko ba.”
8Na koo sɛɛsɛ Nɔa ko erroa gɛnyɛ, 9-10“Mɛa keni kìbhiigi lɔgɔ ko inye ko ashaa gunyu ale bhɛllinynyana ko ngaahaya lɔmmɛ bassey ɛl bay bhonsanɛ gonggulɔye kumulɔng, shɔa ko ahaa kìwoo ko kɛginyaa dusuny. 11Yɔk lɔkte keni kìbhiigagungge a ɛnɛnggeo, anye ale wurtɔ ahaa lɔmmɛa bassey ko ba kumulɔng ma sɛgɛn ngani ngakidhiiyo.”
12-13Na seu, “Igge ko ahaa ɛllo kari lɔmmɛa bassey kumulɔng galite ale keni kàgatay lɔga kìbhiikko ko igge kari ko kingiye, a bhɔrɔgɛɔ. Na ale koji idhogiye. 14-15Na hunde kulubba tumu idhogiye na idho tɔlɔ bhɔrɔgɛye, anye ngangaye kagadhdhan lɔga bere kìbhiikko ko igge ko kɛginya kumulɔng na kesenɛi, ‘Ahaa lɔmmɛa bassey kumulɔng ma sɛgɛn ale ngani ngakidhiiyo.’ 16Na hunde karra bhɔrɔgɛ idhogiyeye, ale kagadhdhan lɔga bere kibhiikko ko ahaa ɛlla bay kumulɔng lɔmmɛa bassey. Na ngalɔktonu ale ɛl dhul ko kingi.”
17Na sɛɛsɛ Nɔa, “Ngabhɔrɔgɛya anna ale kagadhdhanɛi lɔga bere kibhiikko ko ahaa ɛlla basseyɔ bhakkɛa ba kumulɔng.”
Nɔa Ko Erroa Gɛnyɛ
18Erroa Nɔa bere bhonsanɛa gonggulɔ a Sem, Kam ko Yabet. (Nɔng Kam dha bere a baba Kanani). 19Na mɛa ngazukta bu mɛr hɛtinɛnɛ ko ba kumulɔngge bere bhɛllinynyana bhɛa ngaerroya Nɔa ku sizziye.
20Nɔng Nɔa dha bere a hira kɔhinɛna na dukkana woyn sabbɔ.#9.20 Woyn a kɛte heo ko kɔllɔlɔri oo dhegerey. 21Na kali kona iru chuttaya woynuny na dhuttiu na bhuruya ruminyaa gɛnyɛ na tungu ngaulo dukuwaa nɛnɛ toye. 22Na hunaa ungusso ngauloye, eriya nɛnɛ kèe Kam ku baba Kanani, tunnugu dukuwa toye na aru chɔgɔnɛ hunde ungu ngauloye. Na bhonu bhɔ na yogɛsɛ gɔynggɛ kari. 23Na hunaa yogɛsɛna ngangaye, Sem ko Yabet ibhta rum na tattɛ gawuloa gɛ na yaga kawarɛ dusɔ na ago bhuguyɔ bhuguyɔ na ulubtɛ baba nɛ. Na yɔk dha bere hunde baba nɛ ungu ngauloye, ngani kargito.
24Na Nɔa hunaa tunga ke dhutti na sabba arraye, shigu lɔga dha bare messo ꞉hoya nɛnɛ chinynyo kèe Kam. 25Na seu,
“Kanan nɔng any ke chɔrnɛ
na kete gaymaya#9.25 “Gaymay” a bhɛa kèsenɛa ashakaray. kachcha gaymanyaa gɔynggɛuny.
26Na koo seu, “Komoruya Semi Tumu any kutuhɛ,
na nɔng Kanan any kete gaymaya Semi.
27Na Tumu any kɛbhɛl Yabet
na ashaa gɛnyɛ ko ga Semi kabhaga bhee dhɔnɛ.
Na Kanan nɔng any kete gaymaya Yabeti.”
28Na hunaa Tumu dhitta ba ma na tewa ushaye, Nɔa bhagu ba oynya 350. 29Na hunaa oynyaa gɛnyɛ kumulɔng tewa 950de, ere.
Айни замон обунашуда:
Lɔgɔ Sabba 9: SUQ
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
©2023 Suri Translation Project which is a project of the Ethiopian Evangelical Church Mekane Yesus