Lɔgɔ Sabba 6
6
Lɔga Messɛa :Zugu Kuhuyamo
1Na hunaa zugo bay bhɛlddɛa na teya mɛriye, koo irritto dhɔgɔlyaa bo challa ngani chillanɛa. 2Na zuga honynyo tumɔ#6.2 Tuga Hibiru se, “...lusa Tumu.” argi dhɔgɔlyaa zugony hunde a challiye na bɛrta gee hinnɛye na gamayɛ. 3Na Tumu seu, “Zugo ko Kuloya nanu basseyny bhɛa ɛlɛa kari dhul ko kingi, ale ngani ngaɛllo ke ngaya yɔk ale rɛsɛ na mujjussɛye. Na oynyaa gɛ bhagɛa ba any kete 120 sɔng.”
4Na ngabɛrguonu zuga bere honynyo tumɔ na hɛyɛa dhɔgɔlyaa zugony koo irritto zuga bo rammaya. Na yɔk dha bere agga bo ɔnnɛna na toynɛna.
5Na Tumu aru zugo hunde dɛmnɛ na hinisiya gɛ ɛsɛdhɛ kuhuyamo sɔngge. 6Na munyuu goore ke ngaya bere ghendonɛ zugo na kabhaktɛ baye. 7Na seu, “Anye bhɛa bɔɔ keghendonɛi zugo ko kɛginya ko ahaa silolnɛna bay bay ko ga chicho chicho gen ko shɔa wa kumunyuwa goore. Na mɛa keni kìdhiytɔ.” 8Na hira kenno Nɔa nɔng dha bere a hira messo lɔga challa na aru ꞉Tumu na tɛhɛnu.
Lɔga Nɔa
9Na mɛa te lɔga bere messo :Nɔa. Nɔa dha bere a hira ridhing ningginɛna lɔga gɛrsa ngani kɛddɛayo. Na kɔbh ganggua Tumu sɔng. 10Na koo irriyo erroye may ku sizzi. Kona keli Sem, kona keli Kam, kona keli Yabet.
11Na ngabɛrguonu zuga bhakkɛa ba te kuhuyaga bhɛa Tumu ke ngaya messɛ lɔga gɛrsa na bhorɛɛ baye. 12Na nɔng dharɛsɛ ba na aru hunde zugo messɛ kuhuyamo na ba a gɛrsiye. 13Na sɛɛsɛ Nɔa, “Anye mɛa keni kìdhi zugo kumulɔng ko ngabaya kari ke ngaya zugo anɛ kuhuyaga na ɛddɛɛ baye. 14Na nɔng inye mɛa tɛngɛdha bando na tegenyo gonggula bo goore lɔmma ghohiɛna toye. Na bhɔ ko toye ighir dhɔllangɔ. 15Na rammatina ungusɛa bay makkeo siyɔ kɛngi 280. Bhɛa ku kɛngɔ makkeo siyɔ kɛngi 46. Na gɔm makkeo siyɔ kɛngi 27. 16Na gonggul tegenyɛsɛ kura. Na bhɛa itinynyanɛnɛa gɔmɔ ko kuraɔ, makkeo siyɔ kalde dhɔnɛ na oy ke tolu. Na toye kedhdha kete gɔminya sizzi na tutuk ojjɛsɛ kaanyiyɔ. 17Anye keni kùtuguro ma na kùhuga ngaahaya lɔmmɛ bassey ɛl bayte kumulɔng na kagaratɔ. 18Na mɛa anye keni kibhiigi ko inye lɔgɔ. Na inye ale ibha tɛriya nunu ko erroa gunyu ko mɛrɛyaa gunyu na ago gonggulɔ toye. 19-20Na ko yɔk shɔa ko kɛginyaa bibiyo ko ga silolnɛna bay bay ko ga chicho chicho gen doriyo doriyo ale hony ramman ramman na assaninyɛyɔ. Na inye ibha kɛginya doriyo doriyo kumulɔng ramman ramman, na maya ko na ngaha, na tɔgɛsɛ gonggul toye na kushurtiyaayɔ. 21Na ibha amissɛa ale ammo ꞉iggeu ko ahaa ale ammɛa ꞉kɛginyau na ojjɛsɛ gonggul toye.”
22Na Nɔa koo mesu damiya yogɛsɛna ꞉Tumu kumulɔng.
Айни замон обунашуда:
Lɔgɔ Sabba 6: SUQ
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
©2023 Suri Translation Project which is a project of the Ethiopian Evangelical Church Mekane Yesus