योहान 2
2
कानामा वियाव
1एने तिसरे दाहळान बादमा गलीलोन सोहोरोन काना गावमा काहनासून वियाव होतु, एने येसुन आया बी चा होती. 2येसु एने तेरा चेला बी तिना वियावोमा बुलावला होता. 3जेतार आंगुरोन रोस कोम पोळ्यु, ती येसुन आया येसु काजे कोयी, “तिंदरे जूव आंगुरोन रोस नि रोयू.” 4येसु तिनीक कोयू “हे बायर, मेसेक तारेसी काय काम? हिमी मारी टेम नि आवी.” 5तेरी आया पावर काजे कोयी, “होयू जो काय तुमु काजे कोये, चोत कोरजू.” 6चा यहुदियान चुखो कोरनेन रितीन अनसारे दोगळान छोव ठारला डूचरा मेक रोया होता, जीनुमा दुय-दुय तीन-तीन मोन सोमायतो होतो. 7येसु तीनुक कोयू, “डूचरामा पाणी भोर देवू” चे तीनुक काठेलोग भोर देदा. 8तेत्यार चू तीनुक कोयू, “हिमी निकावीन खाणान कारभारीनचा लीन जावू” एने चे लीगोया. 9जेतार खाणान कारभारी चो पाणी चाख्यू चो आंगुरोन रोस बोन गोयलो होतो एने नि जानतू होतु कि चो का गोथो आवलो छे (बाकीन जे पावरे पाणी निकावला होता चे जानता होता), ती खाणान कारभारी दुल्हा काजे बुलावीन तीनाक कोयू, 10“हर एक माणूस पेहेलेत वारलो आंगुरोन रोस आपतलु छे, एने जेतार माणसे पिन छाक जातला ती, तेत्यार कोमजुर आपतला; बाकीन तू वारला आंगुरोन रोस हिमी तोक राख रोयू.” 11येसु गलीलोन कानामा तेरो यो पेहेलो चमत्कार देखाळीन तेरी महिमा कोराव लेदू एने तेरा चेला तीना पोर भुरसू कोऱ्या. 12एरेन ओवतेन चू एने तेरी आया एने तेरा भाशे एने तेरा चेला कफर्णहुम काजे गोया एने चा थुलाक दाहळा रोया.
मंदीरमा गोथा धंदू कोरन्याक निकावनो
(मत्ती 21:12-13; मरकुस 11:15-17; लुका 19:45-46)
13यहुदिन वोलांडोनोन तीहीवार साते होतो, एने येसु यरुशलेममा गोयू. 14चू मंदीरमा बुल, गाडरा एने पेरवा काजे वेचने वावा एने लेन देन कोरने वावाणूक बोसला देख्यू. 15तेत्यार चू दुवळान चाबकु, बोनावीन आखा गाडरा एने बुल्यो काजे मंदीरमा गोथू निकाव देदु, एने लेन देन वावान पोयशा वेरवी देदु, एने चौरंग काजे वेछडी देदु, 16एने पेरवा वेचने वावा काजे कोयू, “इनू काजे न्या गोथो ली जावू मारा प्रार्थनान घोरो काजे व्यापारोन घोर मा बोनावू.” 17तेत्यार तेरा चेला काजे फोम आवी कि लिखलो छे, “तारा घोरोन आवाज मेसेक खाय जासे.” 18इनापोरसी यहुदि अगवा तीना काजे कोया, “तू जो यो कोयतलू छे ती आमुक काहनलो चमत्कार देखाळतलु छे?” 19येसु तीनुक जवाब आप्यू, “इना मंदीर काजे पाळ देवू, एने मे इनाक तीन दाहळामा उभो कोर दिस.” 20यहुदि अगवा कोया, “इना मंदीर काजे बोनावनेमा चावीस ने छोव साल लागला छे, एने काय तू इनाक तीन दाहळामा उभो कोर दिस?” 21बाकीन चू आपना डीलोन मंदीरोन बारामा कोयलु होतु. 22आखरी जेतार चू मोरलामा गोथू जीव उठ्यू ती तेरा चेला काजे फोम आवी कि चू यो कोयलु होतु; एने चे पवित्र शास्त्रान एने तीना बुलोन कि यो येसु कोयलु होतु, फोम कोऱ्या.
येसु माणसोन मोन काजे जानतेला
23जेतार चू यरुशलेममा वोलांडोनोन तीहीवारोन टेमे होतो, ती जुदा सोवटा जोना इना चमत्कार काजे यो चू देखाळतू होतु देखीन तेरे नावो पोर भुरसू कोऱ्या. 24बाकीन येसु आपना खुदो काजे तिंदरा भुरसा पोर नि छुळ्यु काहाकि चू आखा काजे उवखतू होतु;. 25एने तीना काजे गोरोज नि होती कि माणसोन बारामा कुदु गोवायी आपे, काहाकि चू खुद जानतू होतु कि माणसोन मोनोमा काय छे?
Айни замон обунашуда:
योहान 2: BFBNT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Bareli Pauri (बारेली पावरी) Bible by The Love Fellowship is licensed under Creative Commons Attribution-ShareAlike 4.0 License.