یوہانان 2
2
حضرت عیسیٰ سی چُھوا رگونچھانگ گیورچوگّا زادس۔
1جاگ نییسّی ستینگنے، گلِیلی یولجونگسّی کانا ڈونگکھیرّی نانّگا باگستونجیگ یودپین، یانگ حضرت عیسیٰ اما تیرو سونگ۔ 2حضرت عیسیٰ تانگ کھونگی لوبٹوگسگونّانگ تے باگستونلا بودتے یودپین۔ 3تیرو باگستونّی ڈونّی توسلا رگونچھانگ تشارّاچیگ، حضرت عیسیٰ امے حضرت عیسیٰ زیرس، ”کھونگونلا رگونچھانگ تشارتے میدوگ۔“
4حضرت عیسیٰ سی اما مولس، ”چیسپے بومو، نگا ای نانّگا چیا ثیاد۔ تارُونگ نگے توس مالیبا این۔“
5امے یوگپوگونلا زیرس، ”کھونگی چی مولنانگ تیزوگ چوس۔“
6تینّا لدُونلا یہُودی پے ژانگما چوچیسّی لوگثول نانگجین ٹھوچیسلا چھوی دزاما ڈوگ یودپین۔ ای دزاما ریرے نانّگا ہالام چھو لیٹار 80 نے 120 زام چھودّادپین۔
7حضرت عیسیٰ سی یوگپوگونلا مولس، ”تے دزاماگونّی نانّگا چھو سکونگ“ یوگپوگونّی کھونگی مولکھان نانگجین دزاماگون گانگچوگستے چھو سکانگس۔
8تے ستینگنے حضرت عیسیٰ سی یوگپوگونلا مولس، ”تا دزامے نانگنے چھو چوستے، ڈونّی لدینگسپونلا کھیر“ یانگ کھونگونی حضرت عیسیٰ سی مولکھانبو چوس۔
9لدینگسپونّی رگونچھانگ گیورکھانّی تے چھوبو نیانگس، کھوا ای رگونچھانگبو کانے کھیونگس گیُوس میدپین، (اینّانگ چھو کھیونگکھانّی یوگپوگونلا گیوسیودپین) کھوے ماگپا بودتے زیرس، 10”تشانگمے ڈونپوگونلا چھانگ گیالّابو سنگونلا تانگستے ڈونپوگون راروسّاچیگ چھانگ تھوابو کھیونگچین، اِین نانگ کھیرانگی تشانگمیسانگ چھانگ گیالّابو داگسا تشوگپا بورتے راگ۔“
11ایبو حضرت عیسیٰ سی معجزہ ستاس دانگپوبو اینپین، کا بو کھونگی گلِیلی یولجونگسّی کانا ڈونگکھیرلا ستانّا زادتے کھونگرانگی شان سنگون چوگّا زادس، یانگ کھونگی لوبٹوگسگونّی کھونگی کا ایمان چوس۔
12تے ستینگنے حضرت عیسیٰ، کھونگی اما، نو تانگ لوبٹوگسگون کفرنحُوم ڈونگکھیرلا سکیودس، تیرو جاگ کھاچیگ ژوگس۔
بیت المقدِس ژانگما زادس۔
13یہُودی پے پیساگی توسچھین نیمو لیبّاچیگ، حضرت عیسیٰ کیینلا یروشالیمّا سکیودس۔ 14کھونگی تیرو بیت المقدِس سی گیانگسکورّی نانّگا لانگتو، لُوگ تانگ، پھورگون گُون تسونگکھان یانگ پینے ردیبکھان گُون کھورانگونّی چوگتسے لدُونلا دُوگستے یودا زِیگس۔ 15حضرت عیسیٰ سی تھاگپاجیگّا ستالچاگ زادتے، بیت المقدِس سی گیانگسکورّی نانّگا یودکھانّی لُوگ، لانگتو تانگ پھورگون ژانگما پھیلوگا پھینّگا زادس، یانگ پینے ردیبکھانگونّی لچاگسّی پینیگون ٹھیسّتور زادتے چوگتسیگون لوگّا زادس۔ 16یانگ پھورگون تسونگکھانگونلا مولس، ”ای ژانگما پھینگستے کھیر، نگے یابّی بیت المقدِس بو ٹھومسّا ماچوشیگ۔“
17حضرت عیسیٰ سی لوبٹوگس گونلا ہلژخمہ شوقبُو بوے نانّگا ڈِیستے یودکھانبو ایدتو یونگس، ”نیرانگی بیت المقدِس سی پھیا نگے چیسپابو نی، بارکھانّی میے ژوگس این کابوے نگا میدکھان چوین۔“ #2:17 زابور شوقبُوئ 69۔ 9
18یہُودی پے سپونبوگونّی حضرت عیسیٰ سی زیرس، ”اِیگون چوچیسّی وانگ یودکھانبو ستانچیسلا کھیرانگی چی معجزہ جیگ ستانین۔“
19حضرت عیسیٰ تے میگونلا لانسالاین مولس، ”ای بیت المقدِس بو شیگسدونگ، نگے جاگ سومی نانّگا یانگسکیار لانگین۔“
20یہُودی پاگونّی کھونّگا ٹیس، ”ای بیت المقدِس بو سیگّالا لو ژیبچو ژاروگ گورتے اینپین، چی کھیرانگی ایبو جاگ سومی نانّگا ژانگاینّا؟“ 21اِین نانگ حضرت عیسیٰ سی مولکھانّی بیت المقدِس بو نی کھونگرانگی سکوزوگسّی سکورلا اینپین۔ 22کھونگ شیکھانگونّی ٹونے سونتیا جانگستے ستینگنے کھونگی لوبٹوگس گونلا کھونگی ای جالتا مولکھانگون ایدتو یونگس، یانگ کھونگونی ہلژخمہ شوقبُو تانگ حضرت عیسیٰ سی مولکھانّی ژالتاگونّیکا ایمان چوس۔
23حضرت عیسیٰ پیساگی توسچھینلا یروشالیمّا جُوگستے یود زانے، تیرو می مانگپوے کھونگی معجزہ گون تھونگتے، کھونگی کا ایمان کھیونگس۔ 24اِین نانگ حضرت عیسیٰ سی تے میگونّیکا لوماکھییل چیاجونا کھونگی تشانگمے سنینگ کھیینّا زادس۔ 25میریگس کازوگشیگ اینکھانبو کھونّگا سوینگ شادگوس میدکیاگ چیاجونا کھونگی کھونگونی سنینگی نانّگا یودکھانبو کھیینّا زادّانوگ۔
Айни замон обунашуда:
یوہانان 2: LBJNT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Ladakhi Bible by The Love Fellowship is licensed under Creative Commons Attribution-ShareAlike 4.0 License.