یوہانان 12
12
حضرت عیسیٰ سی ژابسّیکا ٹیجیم چانّی مار لوگس۔
1پیساگی توسچھینّی سانگ جاگ ڈوگی سنگونلا، حضرت عیسیٰ مسیح سونتیا لانّگا زادکھان لعزر ی کھانگپا بَیت عَنِیّاؔہ ڈونگکھیرلا سکیودس۔ 2تیرو حضرت عیسیٰ مسیح سیوے نانّگا غونگزانّی ڈالڈیگ چوستے مارتھے جابستوگ چوادپین ، حضرت عیسیٰ سی نیامپو دونتانگ دونکھانگونّی ٹوا لعزر انگ یودپین۔ 3تے توس حضرت مریم می ما کوسپو ٹیجیم چانّی مار لیٹار پھید زامشیگ حضرت عیسیٰ سی ژابسّیکا لوگستے کھورانگی ثا نیامپو پھیس، تینے کھانگپا گانگپو ٹیجیم ّی گانگ۔
4اِین نانگ کھونگی لوبٹوگسگونّی ٹونے یہُوداؔہ اِسکریوت پے (کابوے ستینگنے حضرت عیسیٰ نگولوگ چوس) حضرت مریم زیرس، 5”ای ٹیجیم ّی ماربو تسونگستے پینے نیالباچانگونلا چیا ماتانّگا این ہے؟ ایبوا لو چیگی لاچھا زامشیگ ریچیس دوگ۔“ 6نیالباچانگونّی پھیا تشیرکھا یودتے مانپا کھورانگ کونما این پاسانگ کھوے تیبو زیرس۔ لوبٹوگسگونّی کولچیسّی پینے کھوماگس، کھوے لاگا بورکھانبوے نانگنے کھوے کوادپین۔
7حضرت عیسیٰ سی مولس، ”کھو تشیرکھا ماستان، کھوے ایبو چوستے نگے زوگسپو قبرستان کھیرچیسّی پھیا ڈالڈیگ چوستے این۔ 8نیالباچانگون توسگیون کھیوجا نیامپو لوسین، اِین نانگ نگا کھیوجا نیامپو توسگیون میلوس۔“
9تینّا توسلا یہُودی پے میتشوگس چھینموا حضرت عیسیٰ تیرو یودکھانبو گیوسّونگپا کھونگون یونگس، چیازیرنا کھونگونلا حضرت عیسیٰ سی تُھوگچیس چیگپو مانپا، کھونگی سونتیا لانّگا زادکھانّی لعزر لانگ ستانیین یودپین۔ 10تینے اِمام کُنی چھونمو گونی لعزر انگ سادچیسّی جوسنگان لدینگس۔ 11چیازیرنا لعزر لا چونگکھانبوے یہُودی پا مانگپوجیگی کھونگون پھانگستے حضرت عیسیٰ سی یکا ایمان کھیونّگادپین۔
حضرت عیسیٰ مسیح گیالپوے تشولّا گاسوس جْوس ۔
12ستینگماجاگپو توسچھینلا یونگسکھانّی میتشوگس چھینموے حضرت عیسیٰ مسیح یروشالیمّا سکیودّوگ زیرتے تشورپا، 13کھونگونی کھوپے لچانگمے یالگا ژوگس کھورتے کھونّگا گاسوس جوالا بینگتے کُوچو تانگین زیرس،
”ستودپا پھولشیگ۔
مسیح خُدے وانگچھے نانّگا سکیودکھانبو برکت چان۔
بنی اِسرائیلی گیالپو برکت چان۔“
14حضرت عیسیٰ سی بونگسارجیگ زیگسپا لونگستان ڈانڈا ڈوبچیسّی پھیا کھونگ تیکا ژونّا زادس، کا بو نی،
15”یروشالیم پاگون#12:15 یُونانی سکادّی نانّگا ای تشیگسپو نی ”ری زییونّی بوموا تا ماجیگسشیگ“ ڈِیستے دوگ۔ ماجیگسشیگ۔
ستوسّانگ کھیوجے گیالپو،
بونگسارّیکا ژونتے سکیودّالا۔“ #12:15 حضرت زکریے شوقبُوئ 9۔ 9
16طِطُس لوبٹوگس گونلا کھونگی زادکھان گُون چانگ ہاماگو، اِین نانگ حضرت عیسیٰ سی سپال#12:16 سپال دونّی حضرت عیسیٰ سی ڈونگستے سکو سونتیا جانگستے نامکھا کھیرّا زادچیسپو این۔ تھوبتے ستینگنے، کھونگی کا تے جونگکھان ژانگما ہلژخمہ شوقبُو بوے نانّگا ڈِیازادتے یودکھانبو کھونگونلا ہاگو۔
17حضرت عیسیٰ سی لعزر لا قبرستان نے بودّا زادتے شیکھانگونّی ٹونے سونتیا لانّگا زاد زانے، تیرو یودکھانّی میتشوگسپوے تے ناتشولبو کانیکارو کھییبشوگّادپین۔ 18حضرت عیسیٰ سی تے معجزہ زادکھانبو تشورتے می مانگپو یروشالیم نے کھونّگا تھوگّالا یونگس۔ 19فریسی پاگونّی چیگ تانگ چیگّا زیرس، ”نگاتانگونّی میگژی ٹھانگسپو میلوسشیسپو سالپو تھونگدوگ۔ ستوسّانگ دُنیائی می ژانگما کھوے ستینگرانگنے چھالا۔“
حضرت عیسیٰ مسیح کھونگ ٹونگشیسپو لونگستان زادس۔
20تا توسچھینّی توس خُدا چولّا یونگکھانگونّی ٹوا یہُودی مانکھان کھاچیگّانگ یودپین۔ 21گلِیلی یولجونگس بیت صیدانے اینکھانگون، فِلپُس لا یونگستے کھوا جُووا پھولس، ”سپونبولے، نگاجا گُونلا حضرت عیسیٰ مسیح جال نیینراگ۔“ 22حضرت فِلپُس حضرت اندرؔیاس شادّالا سونگ، یانگ کھونگ نیسکو سونگتے حضرت عیسیٰ سی شادس۔
23حضرت عیسیٰ سی لانسالس، ”اِبنِ آدم خُدے چھوگسنے سپال تھوبچیسّی توس لیب تشار۔ 24نگے کھیوجا لدینبا لدینبا زیرّاد، نامتشوگپا ٹوے ساون سے نانّگا سوبستے شی میشی تیبو ٹو چیگّا لوسّانوگ، اِین نانگ شیتے ستینگنے سمینتے تیبوا ڈاسبو مانگپو چھاگسّانوگ۔ 25نگا سانگ مانّگا رانگی سروک یاشا چوکھانگونّی لدینبے میتشے سکیالاین، اِین نانگ رانگی ثوگی سانگ مانّگا نگا یاشا چوکھانگونّی کھونگی ثوگپو تھامیدپے میتشیے پھیا سکیوبین۔ 26نگا جابستوگ ژوکھانگون نگے گیابنے ڈانگسگوس، نگا یودسا نگے یوگپوگونّانگ دوگین۔ نگا جابستوگ جوکھانگونلا نگے نامکھا ژوگسکھانّی یابّیانگ سیوا زادِین۔“
27”نگے سیمسلا ماثانٹے ناگس راگ۔ تینے چی نگے زیرّا، ’کیے نگے یاب، تا نگا ای ردوگنگالّی توسپونے سکیوبّا زاد؟‘ مانے میزیر چیازیرنا نگا اینّا گیونتشانبوے پھیا یونگستے این۔ 28کیے یاب، نیرانگی ژانلا سپال تھوب چوگّا زاد۔“
تینے نامکھانے سونگسکادچیگ تشور، ”نگے سپال تانگستے این، تارُوانگ سپال تانگین۔“ 29تیرو یودکھان میتشوگس سونگسکاد تشورکھانگونّی ڈوگلدیرّا راگ زیرس، یانگ کھاچیگی زیرس، ”فرشتے کھونّگا جالتا سالتے اینوگ۔“
30حضرت عیسیٰ سی مولس، ”ای سونگسکادپو کھیوجاگونّی پھانتھوگسّی پھیا این، نگے پھیا مان۔ 31تا ای دُنیائی می گونلا ٹھیمسچادچیسّی توس لیبستے این، ای دُنیائی ایمان میدکھانگونّی وانگثولپا شیطان، پھیلوگا پھینّگا زادِین۔ 32یانگ نگا کیینلا ستاگ زانے نگے می تشانگمے سیمس نگارانگ چھوگسلا کھیونگین۔“ 33حضرت عیسیٰ سی تیزوگ مولتے کھونگ ڈونگستشولبو سنگون چوگّا زادس۔
34میتشوگسّی زیرس، ”نگاجا شریعت تی نانگنے ژور، مسیحا توسگیون جوگسین زیرتے تشور۔ تینے نیرانگی کازوگّا مولّاد، ’اِبنِ آدم کینلا ستاگ گوس؟‘ ای اِبنِ آدم بوسو اینوگ؟“
35حضرت عیسیٰ سی مولس، ”نگے اوت پو کھیوجاگون نیامپو توس نیونگونجیگی پھیا لوسین۔ مونڈیگی کھیوجاگونّیکا وانگ میثولچیسّی پھیا تے اوت یودی اوت پو تینانّگا ڈولشیگ۔ مونڈیگی نانّگا ڈولکھانگونلا کارُو چھاچین چانگ گیُوس میدکیاگ۔ 36کھیوجاگون نیامپو اوت یودی توسلا کھیوجاگون تے اودّی ٹھوگو گیورچیسّی پھیا تے اوت پویکا ایمان کھیونگّوس۔“ تیبو مولتے ستینگنے حضرت عیسیٰ سی تیکانے بینگستے سکیودس یانگ کھونگّونّے ایبّا زادس۔
میگونّی حضرت ہارُونگانگ ایمان ماچوس۔
37حضرت عیسیٰ مسیح معجزہ گون ستانتیانگ می مانگچھیا کھونگی کا ایمان ماکھیونگس۔ 38ایبو پیغمبر حضرت یسعیاہ مولکھانبو ڈانڈا ڈوبتے این،
”نیرانگی کھیودچان چھاگلاس گُون سنگونچوگستیانگ،
مسیح لے، سوی نگاتانگی لونبوا ایمان چوس۔“
39تینّا گیونتشانبوے پھیا کھونگونی ایمان ماکھیونگس۔ ہلژخمہ شوقبُو بوے یانگ کھاگشیگیکا پیغمبر حضرت یسعیاہ مولتے دوگ،
40”کھونگی کھونگونی میگون جارا تانگ
سنینگّون سکیونگپو چوا زاد پاسانگ
کھونگونی میگنے میتُھونگ
یانگ سنینگّونلا ہاگو میتھوب،
تے مانے کھونگونی گیودپا چوستے
نگے کھونگون پھانچوگستے یودڈو۔“ #12:40 حضرت یسعیاہ شوقبُوئ 6۔ 10
41پیغمبر حضرت یسعیاہ حضرت عیسیٰ سی سپالبو تھونگ پاسانگ، کھونگی سکورلا تیگون مولتے اینپین۔
42تیتوسلا می مانگپوجیگی کابوے ٹوا یہُودی پے اُسکیونگ کھاچیگّانگ یودپین، حضرت عیسیٰ سی نانّگا ایمان کھیونگس، اِین نانگ سوانگ ماشادس، چیازیرنا فریسی پاگونّی کھونگون مجلِسی ٹونے پھینگس تانّگانوگ سامتے جیگسّادپین۔ 43کھونگونی خُدے ستودپے سانگ میچھوگسّی ستودپا رینچھیا تشورّادپین۔
44تینے حضرت عیسیٰ سی کُوچو سالتے مولس، ”نگا ایمان چوکھانگونّی نگا چیگپو مانپا نگا کالا زادکھانبوانگ ایمان چوانوگ۔ 45یانگ نگا تھونگکھانگونّی نگا کالا زادکھانّی یاب جالتے اینوگ۔ 46نگیکا ایمان کھیونگکھانگون مونڈیگی نانّگا میلوسشیسّی پھیا نگا دُنیائی نانّگا اودّی تشولّا یونگستے این۔“
47نگے سپیراگون نیانتے لاگلین ماچوکھانگونلا نگے سکیون میکال، چیازیرنا نگا دُنیائی می گونلا سکیون کالا مانپا تھارپا تانّگا یونگستے این۔ 48نگا پھانگستے نگے سپیراگون مانیانکھان ژانگما نگے زیرکھان تینّا سپیراگونّی تھامے جاگّا کھونگونلا شاگس چادین۔ 49نگے نگارانگی وانگی نانّگا زیرّامید، اِین نانگ نگا کالا زادکھان نامکھا ژوگسکھانّی یابّی نگا چی زیرچیس تانگ کازوگی زیرچیسلا کا سالّا زادتے این۔ 50کھونگی کے تھامیدپے میتشیے نانّگا ٹھیدّا زادچیسپو نگے شیسّاد۔ تینّابویپھیا نگے یابّی نگا زیرچیسّی کا سالکھانبو نگے زیرّاد۔
Айни замон обунашуда:
یوہانان 12: LBJNT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Ladakhi Bible by The Love Fellowship is licensed under Creative Commons Attribution-ShareAlike 4.0 License.