JOHAN 1
1
Hinghaih Lok
1Atangsuek ah Lok a oh boah; Lok loa Sithaw hoiah a oh moa Lok loa Sithaw ni. 2Amtong tangsuek nahoiah Lok loa Sithaw hoiah a oh. 3Lok ranghoiah Sithaw mah hmuen boiboih a sak; hmuensak boiboih thungah Lok hoiaiah loa a sak ih hmuen maeto doeh om ai. 4Lok#1:4 Lok loa hinghaih takung ah oh tihae A sak ih hmuen boiboih loa Lok hoiah nawnto hinghaih a tawnh tiah doeh thuih thaih. loa hinghaih takung ah oh moa ato hinghaih mah kami khaeah aanghaih to a paek. 5Aanghaih mah vinghaih thungah to a aang moa vinghaih mah natuek doeh paduek thaih mak ai.
6Sithaw mah angmah ih laicae Johan to a patoeh moa,#Mat 3:1; Mrk 1:4; Luk 3:1-2 7Johan mah kaminawk khaeah aanghaih kawng to thuih hanah angzoh. A thuih ih tamthang lok to mi boih mah a thaih moa taang o hanah ni angzoh. 8Anih loa aanghaih to loa na ai ni; aanghaih kawng to thuih hanah kangzo ni. 9Ato aanghaih loa longnui ah angzoh moa mi boih ka aangsakkung aanghaih tangtang ni.
10Lok loa longnui ah hae a oh moa anih ranghoiah Sithaw mah longlai hae a sak e long mah anih to a mat ai. 11Angmah ih prae thungah to angzoh e, angmah kaminawk mah anih to talawk o ai. 12Tocadoeh kami thoemto mah loa talawk o moa a taang o; topongah Sithaw ih caanawk ah coenghhaih ih akaa to a paek. 13Anihcae mah Sithaw ih caanawk ah coengh o haih ih loa longnui Tamthang lok ah, kami ampa ih caanawk batiah zah ih na ai ni; Sithaw angmah roeroe to anihcae ih ampa ah a oh.
14Lok loa kami ah angcoeng moa aicae salak thungah a oh; tahmenhaih hoi loktang hoiah koi. Aicae mah anih ih lensawkhaih to hnuk o, ato lensawkhaih loa Ampa mah a Capa longto ta khueh a tawnh ih khaeah a paek ih lensawkhaih to ni.
15Johan mah anih ih kawng to hitiah a thuih: “ ‘Anih loa kai hnukah kangzo ni; to-e kai pongdoeh a len kue, kawmawtiah anih loa kai ka zah ai na-ah a oh boah,’ tiah kang thuih ih to angmah ih kawng hae ni,” tiah a naa.
16Angmah tahmenhaih ka koi khik thung hoitoah tahamhoihhaih to ang paek boah moa tahamhoihhaih to loa maeto pacoengah maeto ang paek. 17Sithaw mah Tawklok to Mosi ranghoiah ang paek o; to-e tahmenhaih hoi loktang to loa Jesuh ranghoiah ni angzoh. 18Ami doeh Sithaw to hnuh vaih ai. Sithaw angmah hoiah vaanto ah ka om hoi moa Ampa ih saoek pongah ka om a Capa longto ta khueh mah hae Sithaw to amtuengsak boah.
Baptiskung Johan Ih Tamthang Lok
(Mat 3:1-12; Mrk 1:1-8; Luk 3:1-18)
19Jerusalem ih Judah kami akaatawn kungnawk mah qaihma thoemto hoi Levi kaminawk to Johan khaeah patoeh o moa, “Nang hae amimaw?” tiah a duengh o.
20Johan loa lokduenghhaih ih to pathim hanah angmaa aiah, “Kai hae Messiah na ai ni,” tiah mipui thaih ah kamnoek ah a thuih pae.
21Anihcae mah, “Totibaloa nang hae amimaw? Nang hae Elijah maw?” tiah a duengh pae o.#Deut 18:15,18; Mal 4:5
Johan mah, “Na ai ni,” tiah a naa.
Anihcae mah, “Nang hae tahma maw?”#1:21 tahma: Messiah angzohhaih to taphong hanah oepdoeng ih kami ni. tiah a duengh pae o bae.
Anih mah, “Na ai ni,” tiah pathim pae toengtoeng.
22Anihcae mah, “Totibaloa nang hae ami maw tito na thui ah. Na lok pathimhaih ih hae patoeh takungnawk khaeah thuih pae let han oh. Nangmah to loa ami maw na ti han?” tiah a naa pae o.
23Johan mah tahma Isaiah mah a thuih ih to a lak moa,
“Kai hae ‘Angraeng caeh haih hanah loklam to katoeng ta-ah sah oh,’ tiah
praetanghaeng ah kami longlongto hanghhaih ih lok to ni,” tiah a naa pae.#Isa 40:3
24Farasi kaminawk mah patoeh o ih laicaenawk mah, 25Johan to lok a duengh pae o bae moa, “Nang hae Messiah doeh na ai, Elijah doeh na ai, Tahma doeh na ai nahaeloa tipongmaw baptisma to na paek?” tiah a naa pae o.
26Johan mah, “Kai loa tui hoiah baptisma ka paek, to-e nangcae thungah hae na panoek o ai ih kami longto a oh. 27Anih loa kai hnukah angzoh, to-e kai loa anih ih khokbuen qui khramh pae han boe doeh ka krah ai,” tiah a naa pae o.
28Hitih hiah lok a duengh o haih ih hmuen loa Johan mah baptisma paekhaih ih Jordan tuiva niangzae bangih ka om Bethani vang ah ni.
Sithaw Ih Tuuca
29Akhawnbang ah Johan mah Jesuh kangzo to a hnuk moa, “Long zaehaih ka phawkung Sithaw ih Tuuca ho khen o e! 30Angmah hae boah ni, ‘Kai hnukah kami longto angzoh, to-e anih loa kai ponghdoeh a len kue, kawmawtiah kai ka zah ai nahlanah anih loa a oh boah,’ tiah ka thuih ih to. 31Anih loa ami ah maw om tihae ka panoek ai. To-e anih to Israel kaminawk mah panoek o thaih hanah tui hoiah baptisma to ka paek,” tiah a naa.
32Moa Johan mah, “Van hoitoah pahuu batiah kangzo tathuk moa anih nuiah ka cuk Pakhra to ka hnuk. 33Anih to amimaw tito ka panoek ai toengtoeng vop, to-e tui hoiah baptisma paek hanah matoehkung Sithaw mah kai khaeah, ‘Pakhra kangzo tathuk moa kami longto nuiah ka cuk to na hnuh tih; ato kami loa Cai Pakhra hoiah baptisma ka paek han kami ni,’ tiah ang thuih. 34Ato kami to ka hnuk boah. Loktang ta-ah kang thuih: Anih loa Sithaw Capa ni,” tiah a hnuk ih to a thuih.
Jesuh Ih Hnukbang Hmaloe Koeknawk
35Akhawnbang ah Johan loa angmah hnukbang longhnetto hoiah toah to angdoet o let moa, 36Johan mah Jesuh kangzo to a hnuk o na-ah, “Sithaw Tuuca ho khen o e,” tiah a naa.
37Totiah a thuih ih to a hnukbang longhnetto hnit mah a thaih hoi moa Jesuh khaeah to a caeh hoi toengh. 38Jesuh loa ahnuk bangah angqoi, tona-ah anih hnit mah a hnukah ka baang to a hnuk moa, “Timaw na pakrong hoi,” tiah a duengh pae hoi.
Anih hnit mah, “Rabbi, naamaw na oh?” tiah a duengh hoi. (Rabbi tihaih loa “Patukkung” tihaih ih ni).
39Anih mah, “Angzo hoi aloa khen hoi khaeh ah,” tiah a naa pae hoi. (Ato tue loa duembang nitue palito thuemtham ni). Topongah anih hnit loa anih khaeah a caeh hoi moa a ohhaih ih hmuenh to a hnuk hoi, moa ato ni loa anih khaeah khoving khoekto oh hoi.
40Ato hnit thungah longto loa Simon Piter ih amnauk Andru ni. 41Andru mah amza Simon a pakrong ih to a hnuk phrat hoiloa anih khaeah, “Aihnit loa Messiah to hnuk hoi boah,” tiah a naa pae. (Messiah ti ih loa Khrih tihaih ih ni). 42Topacoengah Simon to Jesuh khaeah a caeh haih.
Jesuh mah a khet moa, “Na hmin loa Johan capa Simon ni, to-e Kefas tiah kawk ah om tih,” tiah a naa. (Kefas tihae loa Piter tihoiah ahmong moa a thuihkoehhaih ih loa “lungsong” tihaih ih ni).
Jesuh Mah Filip hoi Nathanael A Kawk
43Akhawnbang ah Jesuh loa Galili ah caeh han a thuih. Filip to a hnuk moa, “Kai hnukah na baang ah,” tiah a naa. 44(Filip loa Andru hoi Piter ohhaih ih vang Bethsaida vang ih kami ni). 45Filip mah Nathanael to a hnuk moa anih khaeah, “Tawklok cabu thungah Mosi mah akawng tarik ih hoi tahmanawk mah doeh akawng tarik ih kami to ka hnuk o boah. Anih loa Nazareth vang ih Joseph capa Jesuh to ni,” tiah a thuih pae.
46Nathanael mah, “Nazareth vang hoitoah hmuen kahoih to tacawt thaih maw,” tiah a duengh.
Filip mah, “Angzo loa khen ah,” tiah a naa.
47Jesuh mah Nathanael to angmah khae bangah kangzo to a hnuk na-ah anih ih kawng to, “Israel kami tangtang hae hiah a oh; anih ih palungthin thungah mi alingmahaih ih zaehaih tidoeh om ai,” tiah a thuih.
48Nathanael mah, “Kawbangmaw kai hae nang panoek?” tiah a duengh.
Jesuh mah, “Filip mah ang kawk ai nahlanah thaiduet kung hlimah na oh na-ah kang hnuk,” tiah a naa.
49Nathanael mah, “Patukkung, nang loa Sithaw Capa ni! Israel Sangpahrang ni!” tiah a naa.
50Jesuh mah, “Thaiduet kung hlimah na oh na-ah kang hnuk, tiah kang thuih pongah nang tang maw? Ahi ponghdoeh hmuen kalen aep zetpui to na hnuh vop tih!” tiah a naa. 51Topacoengah anihcae khaeah, “Loktang ta-ah kang thuih o: Van kam-ong to na hnuh o ueloa Sithaw ih vanminawk to Kami Capa nuiah ka daw hoi ka hum to na hnuh o tih,” tiah a naa.#Gen 28:12
Айни замон обунашуда:
JOHAN 1: AKNT2023
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Asang Khongso New Testament in Eastern Khumi © Bible Society of Myanmar, 2023.