PALABURU 7
7
Pesambori ue
7:1-24
1Ungka lairia ndatoʼo mPue Ala ri Noho, “Kukita podo siko waʼanyamo tau anu mangawianaka pepokonoku. Mewali, pesuamo ri duanga setu sangkani-ngkani pai waʼa bangani ncomborimu. 2-3Keni woʼu papitu mboko sangaya-sangaya tonci pai pinatuwu ntaninya anu bareʼe kapali, paikanya ungka ri pinatuwu anu kapali podo samboko sangaya-sangaya seʼe. Wianakamo ewanceʼe da naka ungka sangaya-sangaya pinatuwu seʼe da reʼe anu lapa ungka ri opisaka da naka reʼe muni anu mojene ri wawo lino. 4Maka jamo papitu ndeme waseʼi da kupatudumo uja anu bareʼe da wuro-wuro ri raya anu opompuyu ndeme pai opompuyu mbengi kasaenya, da naka waʼa anu moʼinosa anu roo kupapewali setu magero.” 5Nawianaka i Noho pura-pura anu ndasongkaka i mPue ri siʼa.
6Tinuwu i Noho 600 ntaʼumo ri tempo mpasambori ue sambawo lino. 7#Mat. 24:38-39, Luk. 17:27 I Noho pai rongonya, pai waʼa ananya sangkani pai waʼa rongo ntau seʼe, mesua ri duanga da naka neʼe malodongi. 8Sambaʼa laki pai sambaʼa tina ungka ri sangaya-sangaya tonci pai pinatuwu ntaninya – madago anu bareʼe kapali bara anu kapali – 9mesua ri duanga setu sangkani-ngkani pai Noho, silulu pai songka i mPue Ala. 10Papitu ndeme ungka njairia ratamo kojo ue mowo masambori lino.
11 #
2 Ptr. 3:6
Ri tempo i Noho tinuwu 600 ntaʼu, kono ri sampuyu papitu eo mbuya karadua, mabuntasimo pura-pura mata ue anu ri raya ntana. Waʼa dampo ue anu ri yangi telokamo, 12pai tudumo uja opompuyu ndeme opompuyu mbengi kasaenya. 13Ri eo setu seʼe, i Noho pai rongonya mesua ri raya duanga setu, sangkani pai ananya tatogo, inceʼemo i Semu, i Yapeti pai i Kamu sangkani pai waʼa rongo ntau seʼe. 14Sangkani-ngkani pai tau seʼe mesua woʼu sangaya-sangaya tonci pai pinatuwu ntaninya, madago anu manaya ewanceʼe seʼe anu maila, anu bose bara anu masiwu. 15Sambaʼa anu laki sambaʼa anu tina ungka sangaya-sangaya anu moʼinosa mesua ri raya duanga setu sangkani-ngkani pai Noho, 16silulu pai songka i mPue Ala ri siʼa. Butu tepesuamo pura-pura, nepa ndadampo i mPue wombo duanga setu.
17Ri raya anu opompuyu ndeme pesambori ue setu, kako mempone-mpone pesambori ue setu painaka molanto-lantomo duanga setu. 18Kako mempone-mpone ue, painaka maʼaimo polanto-lanto duanga setu ri wawo ue. 19Ue setu mampone mpaliu, painaka tampumo waʼa buyu anu ri wawo ngkandatekanya. 20Ue mempone mpaliu rantani gana papitu meteri kayombunya ri wawo waʼa lolo buyu. 21-23I Pue maʼopisaka pura anu moʼinosa ri lino seʼi: Tolino, tonci pai pinatuwu anu ri karatana anu masiwu bara anu bose. Anu bareʼe opi podo i Noho pai pura-pura anu njau sangkani-ngkani pai siʼa ri raya duanga setu. 24Ri raya anu 150 ndeme bereʼe kateloonya ue setu.
Айни замон обунашуда:
PALABURU 7: LAIPMF
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in