Johanes 3
3
Jesus na Nikodemus
1Pa ri omunane Omujuda wena Nikodemus, ngwa ri owotjira tjOvafarisei. 2Ouṱuku umwe eye we ere ku Jesus na tja: “Rabi, matu tjiwa kutja oove omuhonge ngu wa hindwa i Ndjambi. Kape nomundu ngu ma sora okutjita ovihimise mbi u tjita, Ndjambi tje he ri puna ye.”
3Jesus arire tja ziri a tja: “Tjiri, tjiri, ami me ku raere ouatjiri, omundu tje hi nokukwatwa rukwao, kamaa sora okumuna ouhona wa Ndjambi.”
4Nikodemus a pura a tja: “Omundu ngwa kurupa ma sora vi okukwatwa rukwao? Indu eye ma sora okuyaruka mezumo raina na pandukwa rukwao porutjavari are?”
5Jesus wa zirire a tja: “Tjiri, tjiri, ami me ku raere ouatjiri, omundu tje hi nokukwatwa momeva na mOmbepo, kamaa sora okuhita mouhona wa Ndjambi. 6Ihi tji tja kwatwa momundu otjo omundu, nu tji tja kwatwa mOmbepo otjo ombepo. 7Okumwa, tji me ku raere kutja eṋe amuhe mamu sokukwatwa rukwao. 8Ombepo i hinga ku mai vanga. Ove mo zuu ombosiro yayo, nungwari ko nokutjiwa kutja mai zu pi nu mai i pi. Otjinga ape ri nao wina na ngamwa auhe ngu ma kwatwa mOmbepo.”
9Nikodemus wa purire a tja: “Oviṋa mbi mavi sora okutjitwa vi?”
10Jesus arire tja ziri a tja: “Oove omuhonge omutjiukwa mOisrael, noviṋa mbi ko vi i are? 11Tjiri, tjiri, ami me ku raere ouatjiri, eṱe tu hungira imbi mbi matu tjiwa, nu tu hongonona imbi mbi twa munu, nungwari eṋe kamu vanga okuyakura omahongononeno wetu. 12Ami tji mbe mu serekarerere oviṋa vyouye mbwi, eṋe kamaamu kambura mu ami, nu mamu kambura vi mu ami tji mbe mu serekarerere imbi ovyeyuru? 13Kape nomundu ngwa rorere okuronda keyuru posi yOmuna wOmundu. Eye porwe ongwa zire keyuru.”
14 #
Num 21:9
“Nu Moses otja punga a turikire onyoka yongoporo kotjihenḓe mokuti onguza, Omuna wOmundu wina opunga ama turikwa nao, 15kokutja auhe ngu ma kambura mu ye a kare nomuinyo waaruhe. 16Orondu Ndjambi wa suverere ouye tjinene nai nga tja yandja Omuna we omukwatwa erike, kokutja auhe ngu ma kambura mu ye a ha pandjara, nungwari a kare nomuinyo waaruhe. 17Ndjambi ka hindire Omuna we kouye okuyekuupangura, nungwari we mu hindira kutja ouye u yamwe i ye.
18“Ingwi ngwa kambura mOmuna ke nokupangurwa, nungwari ingwi ngu hi nokukambura, eye wa pangurwa rukuru, tjinga e ha kamburire mOmuna wa Ndjambi omukwatwa erike. 19Nombanguriro ya Ndjambi i ri nai: Eye wa hinda Ondjerera ye mouye, nungwari imba ovandu ave suvere onḓorera okukapita Ondjerera, ozondjito zawo tjinga aze ri zouvi. 20Omundu auhe ngu tjita ouvi wa tonda ondjerera, nu kemee ya kondjerera, tjinga e ha vanga kutja ozondjito ze zouvi ze horoke. 21Nungwari auhe ngu tjita ouatjiri, eye meya kondjerera, kokutja ondjerera i raise kutja ozondjito ze za tjitwa monḓuviro ku Ndjambi.”
Jesus na Johanes
22Kombunda yoviṋa mbi, Jesus novahongewa ve va ire korukondwa rwa Judea, neye wa kakara ngo puna wo na papitisa ovandu. 23Johanes wina aa papitisire mOenon, popezu na Salim, tjinga apa ri omeva omengi. Ovandu aave ya ku ye, neye e ve papitisa. 24#Mt 14:3; Mk 6:17; Lk 3:19, 20Oviṋa mbi vya tjitwa, Johanes ngunda e hiya yumbwa motjovakamburwa.
25Ovahongewa tjiva va Johanes nOmujuda umwe va uta okupatasanena otjiṋa tjomerikohororero. 26Owo opu va ira ku Johanes ave katja nai: “Muhonge, ove mo tjiwa omundu ngwi ngwa ri puna ove munda mbwina na Jordan, ingwi ngu wa hongonona are? Tara, eye nambano ma papitisa wina, novandu avehe mave i ku ye!”
27Johanes wa zirire a tja: “Omundu kamaa kara notjiṋa tjinangara eye ke tji perwe i Ndjambi. 28#Jhn 1:20Eṋe oveni oweṋe ovahongonone vandje indu tji mba tja: ‘Ami hiwami Omutwirisiwa, nungwari mba hindwa komurungu we.’ 29Omuvareke onguri omuini womuvarekwa, nungwari epanga romuvareke nda kurama mbo amari puratene, oro mari nyanda omutima tjinene tji ra zuu eraka romuvareke. Ami opu mba zu okukara nondjoroka onene tjinene. 30Onḓengu ye ngai kure, nu indji oyandje i yaruke kehi.”
31Ingwi ngu ma zire kombanda, eye omunene pu avehe. Nu ngu ma zu mouye, eye owouye nu u hungira ovyouye. Nungwari ingwi ngu ma zu keyuru, eye u ri kombanda yaavehe. 32Eye u serekarera ihi tja munu nu tja zuu, nungwari kape na ngu yakura ombuze ye. 33Nu ngu ma yakura ombuze ye, okutja nao wa zikamisa kutja Ndjambi omunauatjiri. 34Ingwi ngwa hindwa i Ndjambi u hungira omambo wa Ndjambi, Ndjambi tjinga ame mu pe Ombepo ye okuura. 35#Mt 11:27; Lk 10:22Ihe wa suvera Omuna we, notja yandja avihe momake we. 36Auhe ngwa kambura mOmuna, u nomuinyo waaruhe; nu auhe ngu hi nonḓuviro kOmuna, kamaa munu omuinyo, nungwari omberero ya Ndjambi mai kara kombanda ye.
Айни замон обунашуда:
Johanes 3: HRR-UNI
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Herero Revision Bible © Bible Society in Namibia, 2021.